Türkiye toy kiyimi yermenkisige xitayning qatnishishini ruxset qilmidi

Yermenkige qatnashquchilarning 20% i chet'el karxaniliri bolup, muxbirlargha yiraq sherq döletlirini, bolupmu xitay shirketlirini bu yermenkige qatnashturmasliq heqqide sözligen toqumichiliq karxaniliri jem'iyiti bashliqi ilker qaratash ependi munularni ilgiri süridu:
“Ötmüshte türk karxanilirining chet'eldiki bu xil yermenkilerge qatnishishi nahayiti qiyin idi. Türk shirketlirining qatnishishigha ruxset qilmighan yermenkilermu ötküzüldi. Bügünki künde xitay türkiye üchün pursetmu yaki xewpmu, dégende bu téma téxi munazire üstididur. Xitayni qatnashturmasliqimiz tolimu tebi'iy bir ehwal. Bezi xitay toy kiyimliri shirketliri hazirdin bashlap yermenkige qatnishishni iltimas qilmaqta. Emma biz ularni peqetla méhman süpitide qatnashturushimiz mumkin.”

Toqumichiliq karxaniliri jem'iyiti bashliqi ilker qaratashning éytishiche, türkiye 2012-yili, jem'iy 16.1 Milyard dollarliq teyyar kiyim éksport qilghan bolup, buning 750 milyon dollarliq qismi toy kiyimi iken. Türkiyining toqumichiliq sana'iti, bolupmu, teyyar kiyim sana'iti köp tereqqiy qilghan bolup, 45 milyard dollarliq soda sommisigha ige bolghan bu sahening téxiche etrapliq bir yermenkisi bolup baqqini yoq.

2011-Yili 5-ayda istanbuldiki CNR da ötküzülgen her xil perde, dastixan, yotqan-körpe tashliri qatarliq her xil yapquchlar yermenkisige qatnashqan xitay shirketlirining xojayinliri ulargha ayrilghan bölümlerni yaqturmighanliqi üchün naraziliq bildürgen idi.

Xitayning bu xil yermenkilerge qatnashturulmasliqidiki seweb néme? xitay türkiye üchün pursetmu yaki reqibmu? türk karxanichilarning xitaylargha tutqan bu xil pozitsiyisi ikki dölet arisidiki munasiwetke qandaq tesir körsiter?  dégendek so'allargha jawab tépish üchün türkiye xitay munasiwetliri mutexessislirining pikrini alduq.