Японийәдә малайшия вә тайландтики уйғур мусапирлири үчүн ианә топлаш паалийити елип берилди

Ихтиярий мухбиримиз һаҗи қутлуқ қадири
2014.10.22

Бу қетим елип берилған уйғур мусапирлири үчүн ианә топлаш паалийитини японийәдики аммиви тәшкилатлардин қурулуш тарихи бир қәдәр узун болған шундақла асияниң келәчики, тәрәққияти, тинчлиқи үчүн изчил көңүл бөлүп келиватқан бүйүк асия чүши тәшкилати тәшкиллигән болуп, паалийәттә көплигән кишиләр қатнашти.

Ианә топлаш паалийити шу күни мәзкур мәдәнийәт сарийида өткүзүлүватқан “асияға әркинлик вә мустәқиллиқ” илмий муһакимә йиғин мәзгилидә елип берилди.

Ианә топлиғучилар үнлүк авазда “көпчилик, уйғур мусапирлири үчүн пул ианә қилиңлар,рәһмәт сизләргә!” дегәндәк сөзләрни товлишип, йиғин қатнашқучилириниң диққитини тартти.

Ианә топлашқа қатнашқан, әмма өзиниң нам шәрипини ашкарилашни халимиған бир ханим зияритимизни қобул қилип, бүгүнки паалийәт һәққидә тохтилип:“уйғур мусапирлириниң мәсилисигә һәммә бирдәк көңүл бөлүшни вә уларға ярдәмдә болушни көзләп бу паалийитини елип бардуқ” деди.

Йиғин мәзгилидә алаһидә сөзгә тәклип қилинған тайландлиқ кишилик һоқуқ паалийәтчиси чалид ханимниң тайландики мусапирлар лагерида туруватқан һәр қайси дөләтләрдин кәлгән мусапирларниң көплигән қийинчилиқларға дуч келиватқанлиқини, тайланд һөкүмити вә шундақла хәлқара мусапирлар мәркизиниң хизмәт тәртипидики бәзи мәсилиләр түпәйлидин, мусапирларниң үчинчи бир дөләткә аман-есән кетишигичә болған арилиқта, уларниң түрлүк ярдәмләргә моһтаҗ болуватқанлиқини билдүргәндин кейин, көпчилик униң сөзлиридин наһайити тәсирлинип йиғин арилиқидики қисқа дәм елишта көпләп ианә бәрди.

Йиғинда йәнә тайланд, бирмиларда паалийәт елип бериватқан японийәлик кишилик һоқуқ паалийәтчи имото әпәндиниң өзи көргән вә аңлиған һәр қайси дөләт мусапирлириниң ечинишлиқ әһвали тоғрисидики доклатиму йиғин қатнашқучилирини толиму тәсирләндүрди.

Зияритимизни қобул қилған ианә топлаш паалийитидики актип әзалардин бири, өзиниң немә сәвәбтин бүгүнки бу паалийәткә қатнашқанлиқини баян қилип мундақ деди:
-Мән кишилик һоқуқ паалийәтчиси имото әпәндидин уйғур мусапирлириниң ечинишлиқ әһвали тоғрисидики доклатни аңлиғандин кейин уйғур мусапирлириға кичиккинә болсиму ярдәмдә болуш нийитидә бу паалийәткә қатнаштим.

Ианә топлаш паалийитигә алаһидә ианә бериш үчүн кәлгән фукуока шәһиридики бир қисим уйғурларму өзлириниң йүрәк сөзлирини ипадиләп, гәрчә өзлири японийәдә елип бериливатқан уйғур давасиға түрлүк сәвәбләр түпәйлидин актип иштирак қилалмайватқан болсиму, әмма өзлириниң һәр вақит вәтән даваси, уйғур мусапирлири үчүн иқтисадий җәһәттин ярдәмдә болушқа тәйяр икәнликини билдүрүшти.

Ианә топлаш паалийитидә мәзкур паалийәтни тәшкиллигән бүйүк асия чүши тәшкилатиниң мәсули иши әпәнди көпчиликкә өзлириниң қолидин келишичә уйғур мусапирлириға иқтисадий җәһәттә ярдәмдә болидиғанлиқини вә шундақла уйғур мусапирлириға ярдәм беришниң өзи, өзини асиялиқ дәп һесаблиған һәр бир японийәликниң мәҗбурийити икәнликини билдүрди.

Уйғур мусапирлири үчүн ианә топлаш паалийити чүштин кейин саәт бирдин бәшкә қәдәр давамлашти. Паалийәттин кейин ианә топлаш паалийитиниң мәсуллири йиғилған пулларни мунасивәтлик кишиләргә тапшуруп, өзлириниң давамлиқ түрдә уйғур мусапирлири үчүн ианә топлаш паалийәтлирини елип баридиғанлиқини билдүрүшти.

Паалийәттин кейинки кәчлик тамақта, уйғур мусапирлар мәсилисигә йеқиндин көңүл болуватқан имото әпәнди бизгә, йеқинда тайландтики бир қетимлиқ учришишта хитай әлчиханисиниң ваң фамилилик бир дипломати униңға тәһдит селип: “вуй, японийәлик имото! сән уйғур мусапирлириниң ишиға тола арилашма! японийә кичиккинә бир дөләт, сәнләр биз билән уруш қилалмайсән” дегәнликини билдүрди.

Биз ахирида, бүгүнки паалийәт һәққидә бәзи бир учурларға игә болуш үчүн микрофонимизни дуня уйғур қурултийиниң муавин рәиси илһам маһмутқа узаттуқ. У, бу қетимқи ианә топлаш паалийити һәққидә тохтилип өтти.

Юқириқи аваз улинишидин тәпсилатини аңлаң.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.