Yaponiyede malayshiya we taylandtiki Uyghur musapirliri üchün i'ane toplash pa'aliyiti élip bérildi

Bu qétim élip bérilghan Uyghur musapirliri üchün i'ane toplash pa'aliyitini yaponiyediki ammiwi teshkilatlardin qurulush tarixi bir qeder uzun bolghan shundaqla asiyaning kélechiki, tereqqiyati, tinchliqi üchün izchil köngül bölüp kéliwatqan büyük asiya chüshi teshkilati teshkilligen bolup, pa'aliyette köpligen kishiler qatnashti.

I'ane toplash pa'aliyiti shu küni mezkur medeniyet sariyida ötküzülüwatqan “Asiyagha erkinlik we musteqilliq” ilmiy muhakime yighin mezgilide élip bérildi.

I'ane toplighuchilar ünlük awazda “Köpchilik, Uyghur musapirliri üchün pul i'ane qilinglar,rehmet sizlerge!” dégendek sözlerni towliship, yighin qatnashquchilirining diqqitini tartti.

I'ane toplashqa qatnashqan, emma özining nam sheripini ashkarilashni xalimighan bir xanim ziyaritimizni qobul qilip, bügünki pa'aliyet heqqide toxtilip:“Uyghur musapirlirining mesilisige hemme birdek köngül bölüshni we ulargha yardemde bolushni közlep bu pa'aliyitini élip barduq” dédi.

Yighin mezgilide alahide sözge teklip qilin'ghan taylandliq kishilik hoquq pa'aliyetchisi chalid xanimning taylandiki musapirlar lagérida turuwatqan her qaysi döletlerdin kelgen musapirlarning köpligen qiyinchiliqlargha duch kéliwatqanliqini, tayland hökümiti we shundaqla xelq'ara musapirlar merkizining xizmet tertipidiki bezi mesililer tüpeylidin, musapirlarning üchinchi bir döletke aman-ésen kétishigiche bolghan ariliqta, ularning türlük yardemlerge mohtaj boluwatqanliqini bildürgendin kéyin, köpchilik uning sözliridin nahayiti tesirlinip yighin ariliqidiki qisqa dem élishta köplep i'ane berdi.

Yighinda yene tayland, birmilarda pa'aliyet élip bériwatqan yaponiyelik kishilik hoquq pa'aliyetchi imoto ependining özi körgen we anglighan her qaysi dölet musapirlirining échinishliq ehwali toghrisidiki doklatimu yighin qatnashquchilirini tolimu tesirlendürdi.

Ziyaritimizni qobul qilghan i'ane toplash pa'aliyitidiki aktip ezalardin biri, özining néme sewebtin bügünki bu pa'aliyetke qatnashqanliqini bayan qilip mundaq dédi:
-Men kishilik hoquq pa'aliyetchisi imoto ependidin Uyghur musapirlirining échinishliq ehwali toghrisidiki doklatni anglighandin kéyin Uyghur musapirlirigha kichikkine bolsimu yardemde bolush niyitide bu pa'aliyetke qatnashtim.

I'ane toplash pa'aliyitige alahide i'ane bérish üchün kelgen fuku'oka shehiridiki bir qisim Uyghurlarmu özlirining yürek sözlirini ipadilep, gerche özliri yaponiyede élip bériliwatqan Uyghur dawasigha türlük sewebler tüpeylidin aktip ishtirak qilalmaywatqan bolsimu, emma özlirining her waqit weten dawasi, Uyghur musapirliri üchün iqtisadiy jehettin yardemde bolushqa teyyar ikenlikini bildürüshti.

I'ane toplash pa'aliyitide mezkur pa'aliyetni teshkilligen büyük asiya chüshi teshkilatining mes'uli ishi ependi köpchilikke özlirining qolidin kélishiche Uyghur musapirlirigha iqtisadiy jehette yardemde bolidighanliqini we shundaqla Uyghur musapirlirigha yardem bérishning özi, özini asiyaliq dep hésablighan her bir yaponiyelikning mejburiyiti ikenlikini bildürdi.

Uyghur musapirliri üchün i'ane toplash pa'aliyiti chüshtin kéyin sa'et birdin beshke qeder dawamlashti. Pa'aliyettin kéyin i'ane toplash pa'aliyitining mes'ulliri yighilghan pullarni munasiwetlik kishilerge tapshurup, özlirining dawamliq türde Uyghur musapirliri üchün i'ane toplash pa'aliyetlirini élip baridighanliqini bildürüshti.

Pa'aliyettin kéyinki kechlik tamaqta, Uyghur musapirlar mesilisige yéqindin köngül boluwatqan imoto ependi bizge, yéqinda taylandtiki bir qétimliq uchrishishta xitay elchixanisining wang famililik bir diplomati uninggha tehdit sélip: “Wuy, yaponiyelik imoto! sen Uyghur musapirlirining ishigha tola arilashma! yaponiye kichikkine bir dölet, senler biz bilen urush qilalmaysen” dégenlikini bildürdi.

Biz axirida, bügünki pa'aliyet heqqide bezi bir uchurlargha ige bolush üchün mikrofonimizni dunya Uyghur qurultiyining mu'awin re'isi ilham mahmutqa uzattuq. U, bu qétimqi i'ane toplash pa'aliyiti heqqide toxtilip ötti.

Yuqiriqi awaz ulinishidin tepsilatini anglang.