Қарамайдики мәсчитләргә қаритилған тәқибләш күчәйгәнлики мәлум

Ихтиярий мухбиримиз еһсан
2015-12-22
Share
qaramay-shimaliy-qurulush-meschit-iane-sanduqi-305.jpg Қарамай шимали қурулуш мәсчити ианә сандуқи.
RFA/Éhsan

Игилигән учурлиримизға қариғанда, даириләр нөвәттә қарамайдики мәсчитләргә қаритилған тәқибләшни күчәйткән болуп, бу хилдики тәқибләшләр мәсчитләрниң иқтисадий мәнбәсини контрол қилиш биләнла чәклинип қалмиған.

Қарамайдики диний затларниң ейтишичә, мәсчитләрдики тәблиғләрму хитай қануни бойичә елип берилидиғандин сирт, йеқинқи йиллардин буян мәсчитләрдиму сиясий өгиниш йолға қоюлған. Улар мунасивәтлик даириләрниң орунлаштуруши бойичә, һәр һәптидә бир нәччә саәт, қанун вә аптоном районниң һөҗҗәтлири қатарлиқларни өгинидикән.

Биз қарамай шәһиридин әһвал игиләш җәрянида, йәрлик даириләрниң қарамай шәһиригә қарашлиқ 9 мәсчитниң иҗарә дуканлириниң пулини, сәдиқә-закат, икки һейт намизида чүшкән иқтисадини, қарамай шәһәрлик ислам дини җәмийитиниң қармиқидики "малийә ишханиси" бир туташ башқуруватқанлиқи, уларниң ишханиси қарамай шәһәрлик шималий қурулуш мәсчитиниң иҗарә өйидә тәсис қилинғанлиқи, қарамай шәһиридики мәсчитләр киргән киримлирини вақтида малийә ишханисиға тапшуридиғанлиқи, чиқим қилмақчи болса, қарамай районлуқ диний ишлар идарисигә илтимас йезип тәстиқлиғандин кейин, андин пулини малийә ишханисидин алалайдиғанлиқи қатарлиқлардин хәвәр таптуқ.

Қарамай шәһәрлик алға йоли мәһәллиси мәсчити "1-завут мәсчити" идарә һәйәтләр гуруппа башлиқидин әһвал игиләш җәрянида, у, даириләрниң орунлаштуруватқан өгинишлири вә мәсчитниң иқтисади әһвали һәққидә сориған соаллиримизға қарита җаваб берип мундақ деди: " қарамай районлуқ диний ишлар идарисиниң орунлаштурушида айда нәччә қетим сиясий өгиниш елип бериватимиз. Мәркәзниң диний сиясәтлирини оқуп бериватиду, уни музакирә қиливатимиз."

Биз мәсчит иқтисадини қайси орун вә кимләрниң башқуруватқанлиқи һәққидә тәпсилий мәлумат елиш үчүн, қарамай шәһәрлик шималий қурулуш мәсчити имами һаҗи әкбәрдин бу әһвалларни сориғинимизда, у, мәсчитләрниң иқтисадини қарамай шәһәрлик ислам дини җәмийитиниң қармиқидики "малийә ишханиси" бир туташ башқуруватқанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт