Qeyseride musteqil soda-sana'etchiler jem'iyiti Uyghurlar mesilisi toghrisida doklat bérish yighini ötküzdi

29-Mart seyshenbe küni türkiyediki eng chong karxanichilar uyushmiliridin biri bolghan musteqil soda-sana'etchiler uyushmisi qeyseri shöbiside Uyghur mesilisi toghrisida doklat bérish yighini ötküzüldi.

Yighinda dunya Uyghur qurultiyi mu'awin re'isi séyit tümtürk ependi alahide teklip boyiche Uyghurlarning nöwettiki weziyiti, shundaqla türkiyediki bolupmu qeyseridiki Uyghur musapirlarning hazirqi ehwali toghrisida tepsiliy melumat berdi. Yighin'gha musteqil soda-sana'etchiler jem'iyitining qeyseri shöbisining mes'uli nedim orgunxarputlu riyasetchilik qilghan bolup, yighinda mezkur jem'iyetning bashqurush hey'iti ezaliri bilen Uyghur musapirlirining qeyseride kesip ehli bolup xizmet tépishi üchün némilerni qilish toghrisida muzakire élip bérilip, konkrét pilanlar tüzülgen.

Bu heqte ziyaritimizni qobul qilghan musi'at qeyseri shöbisi bashliqi nedim orgunxarputlu ependi mundaq dédi: “Biz musi'at yeni musteqil soda-sana'etchiler jem'iyiti bolush süpitimiz bilen, sherqiy türkistanliq qérindashlirimizgha qandaq yardem qilalaymiz dep, bu heqte bir doklat bérishni telep qilduq. Séyit tümtürk ependi Uyghurlarning qeyserige qandaq, qachan kelgenlikini anglatti. Biz qeyserige kéyin kelgen Uyghurlargha qandaq yardem qilalaymiz, ularni muzakire qilduq. Tunji qedemni tashliduq, bundin kéyin bu heqte xizmet qilishqa dawam qilimiz.”

U, “Musapir Uyghurlargha qandaq yardem qilish toghrisida pilaninglar barmu?” dégen so'alimizgha mundaq jawab berdi: “Musi'at ezaliri milletchi dindar kishiler. U yerdin kelgen Uyghurlarni öz qérindishidek körüp, künlük yardem emes, uzun muddetlik yardem we hemkarliq élip bérishni oylawatimiz. Belki ulargha hüner we kesip ögitimiz. Hazir musapir Uyghurlar bilen birlikte yéza igilik yaki charwichiliq meydani qurushni oylawatimiz. Qeyserige kelgen musapir Uyghurlarning öz turmushini qamdiyalaydighan halgha kélishi üchün qolimizdin kelgenni qilimiz.”

D u q mu'awin re'isi séyit tümtürk ependi musteqil soda-sana'etchiler jem'iyitide Uyghurlar mesilisi toghrisida doklat bergendin sirt, tayland we malayshiya arqiliq türkiyege kelgen Uyghurlargha qandaq yardem qilish toghrisida muzakire élip barghanliqini bayan qildi.

Séyit tümtürk ependi musteqil soda-sana'etchiler uyushmisi toghrisida qisqiche melumat bergendin kéyin, bu birinchi qétimliq uchrishishta konkrét mesililer toghrisidimu muzakire élip barghanliqini, Uyghurlargha ishlesh ruxsiti bérilse, xizmet tépishigha bu qurulushlarning yardem qilidighanliqini bayan qildi.

Musteqil soda-sana'etchiler uyushmisi 1991-yili qurulghan bolup, pütün türkiyede 17 ming etrapida sodiger, karxanichi eza iken. Bularning ichide zawutida 10 ming etrapida ishchi ishlitiwatqan karxanichilarmu mewjut iken.