Türkiyede Uyghurlar özi yétishtürgen qoghun bazargha sélindi

Uyghur élidin yéngi chiqqan Uyghurlar türkiyede “Uyghur qaraxanli qoghuni” markisida qoghun yétishtürüp bazargha saldi.

Bu qoghunlarni abbas kérim'oghlu we abdulla qatarliq Uyghurlar türkiyening manisa wilayiti qiriq'aghachlar nahiyisidin ijarige alghan yerge, turpandin élip kelgen qoghun uruqini térish arqiliq yétishtürgen iken.

Abbas kerim'oghluning éytishiche, qoghunning markisi “Uyghur qaraxanli qoghuni” dep qoyulghan bolup, bu Uyghurlarni türkiyede tonutush üchün nahayiti muhim rol oynaydiken.

Bu heqte köz qarishini ipadiligen sherqiy türkistan pa'aliyetchisi we tetqiqatchi hamut köktürk ependi, Uyghurlar uzun yillardin béri türkiyede tijaret qiliwatqan bolsimu, tonulghan bir marka tikliyelmigenlikini, “Uyghur qaraxanli qoghuni” markisi bilen Uyghur qoghunining bazargha sélinishi bilen kélechekte buning Uyghur markisi bolup tonulidighanliqini chünki bu qoghunning türkiyede reqibi yoqluqini bayan qilip ötti.

U, sözide yene Uyghurlarning tijaret qilishi üchün türkiyede köp ewzelliklerning mewjutluqini tekitlep ötti.