Xitay kadir: “Taziliq ishchilirining hemmisi Uyghurlar!” (1)

Közetküchilerning qarishiche, Uyghurlar diyaridiki siyasiy we iqtisadiy bésimlarning barghanche éghirlap méngishi arqisida ish teqsimati we bay-kembeghellik perqi mesililiri Uyghurlar bilen xitaylar otturisidiki ziddiyetlerning bir muhim sewebliri süpitide otturigha chiqmaqta.

Uyghurlar diyaridiki bu mesililerni nuqtilar boyiche tekshürüsh jeryanida Uyghurlar rayonidiki herqaysi jaylarda hökümet, partiye we karxana organliri hem zawutlardiki xizmet orunlirida xitay xadimlarning mutleq kop sanliqni igiligenliki, emma töwen derijilik xizmetlerning biri bolghan kocha tazilash xizmitini asasiy jehettin Uyghurlarning artquzuwatqanliqi melum boldi.

Alaqidar uchurlardin melum bolushiche, Uyghurlar diyaridiki herqaysi sheherlerde “Zamaniwiliq” sho'arining otturigha chiqishigha egiship, muhit taziliqi mesilisi tedrijiy halda sheherlerning “Zamaniwiliq” ölchemlirining biri bolushqa bashlidi. Buning bilen eslidiki san jehette anche köp bolmighan taziliq ishchiliri qoshuni bara- bara zoriyip, bir muntizim kespi sahe bolup shekillendi. Emma taziliq xizmitining musheqqetliki we buning bilen shughullan'ghuchilargha bérilidighan ma'ashning töwen bolushi hemde bu xizmet bilen shughullan'ghuchilargha qarita jem'iyette omumyüzlük, emma körünmes shekilde mewjut boluwatqan kemsitish pozitsiyisi mezkur xizmetni ishleshni xalaydighan kishilerning sanini zor derijide azaytiwetkenliki melum. Igilen'gen uchurlardin iqtisadiy jehettiki namratliq tüpeylidin demalliqqa birer xizmet bilen shughullinishqa ilaj qilalmighan kishilerning mushu xildiki xizmetni tallashqa mejbur boluwatqanliqi, shu arqiliq eng addiy turmush ghemlirini qamdap kétiwatqanliqi ayding bolmaqta.

Biz Uyghurlar diyaridiki taziliq ishchilirining hazirqi ehwalini éniqlap körüsh meqsitide aldi bilen aqsu we korla sheherliridiki ahaliler komitéti bilen alaqileshtuq. Biz awwal téléfonimizni alghan aqsu sheherlik lengger ahaliler komitétidiki xitay kadirgha shu tewediki taziliqchi ishchilarni ziyaret qilmaqchi ikenlikimizni éyttuq, andin uningdin mumkin bolsa ikki xitay we ikki Uyghur taziliqchi ishchisining alaqilishish téléfon nomurini soriduq. U so'alimizgha qarita bu teweliktiki taziliq ishchilirining hemmisining Uyghur ikenlikini éytti.

Uningdin kéyin biz ürümchi shehiri tengritagh rayonluq ahaliler komitétigha qarashliq melum rayonda sekkiz yildin buyan taziliq ishchisi bolup ishlewatqan raziye xanimni ziyaret qilduq. U söhbet jeryanida öz xizmitining jismaniy jehettiki japasidin köre, xitay puqralirining kemsitish xaraktéridiki mu'amilisining éghir rohiy bésim boluwatqanliqini, ma'ash mesiliside ishxanida olturup taziliq ishchilirini bashquridighan xitay kadirlarning ma'ashi ösüp méngiwatqan bolsimu, özlirining ma'ashida bundaq ösüshning bolmighanliqini tekitlidi.

Igilishimizche, Uyghurlar diyaridiki taziliq ishchilirining bu xildiki maddiy we meniwi jehettiki iztirapliq haliti hazirmu dawam qiliwatqan bolup, bashqa shexsler bilen bolghan söhbetler jeryanida alaqidar mesililerning kishilerge anche bilinip ketmigen bashqa tereplirimu melum bolushqa bashlidi.