Түркийәниң әң чоң саяһәт шәһиридә уйғур ашханиси ечилди

Түркийәниң җәнубидики ақ деңиз райониға җайлашқан әң чоң саяһәт шәһәрлиридин бири болған анталия шәһиридә уйғур ашханиси ечилди. Кейинки йилларда уйғур тамақлири дүня тамақлириниң арисида лайиқ болған орнини елишқа башлиди.

Түркийәниң истанбул, әнқәрә қатарлиқ чоң шәһәрлиридин кейин әң чоң саяһәт шәһәрлиридин бири болған анталия шәһириниң зәрдарилик мәһәллисидә уйғур түрк мутфақи йәни уйғур түрк ашханиси намида ашхана ечилди.

Бу ашханини қирғизистанда туғулуп чоң болған гүлбостан исимлиқ аял ачқан. Ашханида ләзиз уйғур тамақлири сунулмақта. Биз ашханиға берип, ашханиниң хоҗайини билән сөһбәт елип бардуқ. У, херидарларға қолидин келишчә уйғурларниң бай тамақ мәдәнийәтини тонутушқа тиришиватқанлиқини ейтти. Ашханиниң телефон нумири: 0242 313 08 01

Анталия һәр йили дүняниң һәрқайси җайлиридин болупму герман, рус вә әнгилиз қатарлиқ милләтләрдин 30 милйон әтрапида саяһәтчини өзигә җәлип қиливатқан шәһәрләрдин бири болуп, пакиз деңизи вә һәшәмәтлик меһманханилири билән мәшһур.