Истанбулда йәнә бир уйғур ресторани ечилди

Ихтиярий мухбиримиз арслан
2013.11.20
Share on WhatsApp
Share on WhatsApp
Ihlas-uyghur-restoran-laleli-rayoni.jpg Истанбулниң ақсарай-лаләли районға ечилған “уйғур ихлас ресторани” сиртқи көрүнүши. 2013-Йили ноябир.
RFA/Arslan

Йеқиндин буян көп санда уйғурларниң һиҗрәт қилип түркийәдә олтурақлишиши билән уйғурлар өзлириниң кәспи саһәлири бойичә ширкәт қурушқа вә дукан ечишқа башлиди.

Истанбулда һазир уйғурлар тәрипидин ечилған компютер учур техника ширкити, қол телефон учур алақә дукини, һәр хил өй җаһазлири, тоқумичилиқ буюмлири дуканлири, ашхана, навайхана, қассап дукини қатарлиқ дуканларда күндилик турмушқа еһтияҗлиқ болған нәрсә-керәкләрни учратқили болиду.

Истанбулда һазир 8 дин артуқ уйғур ресторани бар болуп, йеқинда йәнә истанбулниң ақсарай-лаләли дегән районға “уйғур ихлас ресторани” дегән намда бир ресторан ечилди. Бу ресторан ечилған лаләли райони оттура асиядики түрк җумһурийәтләрдин кәлгән өзбек, қазақ, қирғиз, түркмән қатарлиқ сода-тиҗарәтчиләрниң мәркизи болуп, бу районда “өзбек йүк тошуш ширкити”, “рус тәбиий гази”, “өзбек тоқумичилиқ қол-һүнәрвәнчилик әшялири” дегәнгә охшаш көп санда оттура асияға алақидар сода-санаәт ширкәтлири тепилиду. Игилинишичә “уйғур ихлас ресторани” ниң бу районда ечилиши оттура асиядин келип-кетиватқан уйғур, қазақ, қирғиз вә өзбек тиҗарәтчиләрниң тәлипи бойичә ечилған.

Оттура асиядики өзбек, қазақ, қирғиз қатарлиқ хәлқләр уйғур таамлирини яқтуруп йәйдиған болуп, истанбулға кәлгән һәр қандақ бир оттура асиялиқ алди билән өзлириниң тамақлирини яки уйғур тамақлирини йейишни яхши көридикән.

Биз бу “уйғур ихлас ресторани” тоғрисида ресторанни ачқан убәйдулла әпәнди вә бу ресторанда тамақ йәватқан бир қисим уйғур, түрк вә өзбекләр билән сөһбәт елип бардуқ.

Убәйдулла әпәнди өзиниң истанбулниң икки орунда уйғур ресторани барлиқини, ақсарайдики ресторанға тамақ йейиш үчүн кәлгән оттура асиялиқ тиҗарәтчиләрниң тәлипигә асасән оттура асиялиқларниң тиҗарәт мәркизи болған лаләли районида бир ресторан ечишниң керәк болғанлиқини, оттура асиядин келип тиҗарәт қиливатқан түркий системидики хәлқләрни көздә тутуп, бу 3-ресторанни ачқанлиқини, уларға яхши мулазимәт қилип, уйғур тамақ мәдәнийитини тонуштуруш билән биргә игилик тикләш үчүн бу ресторанни ечишни мувапиқ көргәнликини билдүрди.

Өзини абдуллаһ дәп тонуштурған ташкәнтлик бир өзбек, икки йилдин буян истанбул-ташкәнт оттурисида қатнап йүрүп тиҗарәт қиливатқанлиқи, истанбулға кәлгән һаман уйғур ресторанидин тамақ йәйдиғанлиқи, уйғурлар билән өзбекләрниң тамақлириниң охшап кетидиғанлиқи, уйғурлар билән өзбекләрниң мусулман, қан-қериндаш хәлқ икәнлики, тарихта нурғун өзбекләрниң шәрқий түркистанға көчүп кетип йәрлишип қалғанлиқи, кейинки дәврдә нурғун уйғурларниң өзбекистанға көчүп келип йәрлишип кәткәнликини билдүрди.

У йәнә, өзбек вә уйғурларниң тарихта охшаш бир қериндаш хәлқ икәнликини, әмма өзбекистан мустәқил болған болсиму уйғурларниң хитайниң ишғали астида бесим билән яшаватқанлиқи, истанбулға келип яшаватқан уйғурларниң өзлириниң мәдәнийәт өрүп-адәтлирини тонуштуруш, өзлириниң дәрд-әһвалини аңлитишта бу хил уйғур ресторанларниң ечилишиниң муһим рол ойнайдиғанлиқини ипадилиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.