Istanbulda yene bir Uyghur réstorani échildi

Ixtiyariy muxbirimiz arslan
2013.11.20
Ihlas-uyghur-restoran-laleli-rayoni.jpg Istanbulning aqsaray-laleli rayon'gha échilghan “Uyghur ixlas réstorani” sirtqi körünüshi. 2013-Yili noyabir.
RFA/Arslan

Yéqindin buyan köp sanda Uyghurlarning hijret qilip türkiyede olturaqlishishi bilen Uyghurlar özlirining kespi saheliri boyiche shirket qurushqa we dukan échishqa bashlidi.

Istanbulda hazir Uyghurlar teripidin échilghan kompyutér uchur téxnika shirkiti, qol téléfon uchur alaqe dukini, her xil öy jahazliri, toqumichiliq buyumliri dukanliri, ashxana, nawayxana, qassap dukini qatarliq dukanlarda kündilik turmushqa éhtiyajliq bolghan nerse-kéreklerni uchratqili bolidu.

Istanbulda hazir 8 din artuq Uyghur réstorani bar bolup, yéqinda yene istanbulning aqsaray-laleli dégen rayon'gha “Uyghur ixlas réstorani” dégen namda bir réstoran échildi. Bu réstoran échilghan laleli rayoni ottura asiyadiki türk jumhuriyetlerdin kelgen özbék, qazaq, qirghiz, türkmen qatarliq soda-tijaretchilerning merkizi bolup, bu rayonda “Özbék yük toshush shirkiti”, “Rus tebi'iy gazi”, “Özbék toqumichiliq qol-hünerwenchilik eshyaliri” dégen'ge oxshash köp sanda ottura asiyagha alaqidar soda-sana'et shirketliri tépilidu. Igilinishiche “Uyghur ixlas réstorani” ning bu rayonda échilishi ottura asiyadin kélip-kétiwatqan Uyghur, qazaq, qirghiz we özbék tijaretchilerning telipi boyiche échilghan.

Ottura asiyadiki özbék, qazaq, qirghiz qatarliq xelqler Uyghur ta'amlirini yaqturup yeydighan bolup, istanbulgha kelgen her qandaq bir ottura asiyaliq aldi bilen özlirining tamaqlirini yaki Uyghur tamaqlirini yéyishni yaxshi köridiken.

Biz bu “Uyghur ixlas réstorani” toghrisida réstoranni achqan ubeydulla ependi we bu réstoranda tamaq yewatqan bir qisim Uyghur, türk we özbékler bilen söhbet élip barduq.

Ubeydulla ependi özining istanbulning ikki orunda Uyghur réstorani barliqini, aqsaraydiki réstoran'gha tamaq yéyish üchün kelgen ottura asiyaliq tijaretchilerning telipige asasen ottura asiyaliqlarning tijaret merkizi bolghan laleli rayonida bir réstoran échishning kérek bolghanliqini, ottura asiyadin kélip tijaret qiliwatqan türkiy sistémidiki xelqlerni közde tutup, bu 3-réstoranni achqanliqini, ulargha yaxshi mulazimet qilip, Uyghur tamaq medeniyitini tonushturush bilen birge igilik tiklesh üchün bu réstoranni échishni muwapiq körgenlikini bildürdi.

Özini abdullah dep tonushturghan tashkentlik bir özbék, ikki yildin buyan istanbul-tashkent otturisida qatnap yürüp tijaret qiliwatqanliqi, istanbulgha kelgen haman Uyghur réstoranidin tamaq yeydighanliqi, Uyghurlar bilen özbéklerning tamaqlirining oxshap kétidighanliqi, Uyghurlar bilen özbéklerning musulman, qan-qérindash xelq ikenliki, tarixta nurghun özbéklerning sherqiy türkistan'gha köchüp kétip yerliship qalghanliqi, kéyinki dewrde nurghun Uyghurlarning özbékistan'gha köchüp kélip yerliship ketkenlikini bildürdi.

U yene, özbék we Uyghurlarning tarixta oxshash bir qérindash xelq ikenlikini, emma özbékistan musteqil bolghan bolsimu Uyghurlarning xitayning ishghali astida bésim bilen yashawatqanliqi, istanbulgha kélip yashawatqan Uyghurlarning özlirining medeniyet örüp-adetlirini tonushturush, özlirining derd-ehwalini anglitishta bu xil Uyghur réstoranlarning échilishining muhim rol oynaydighanliqini ipadilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.