Түркийәдә "уйғур қараханли" маркилиқ қоғун базарға селинди

Ихтиярий мухбиримиз арслан
2015-08-27
Share
Uyghur-qaraxanli-qoghun-turkiye-1.jpg Абдуллаһ исимлик бир уйғур башчилиқидики бир гуруппа уйғурлар йетиштүргән "уйғур қараханли" маркилиқ қоғун базарға тошулмақта. 2015-Йили авғуст, түркийә.
RFA/Arslan

26-Авғуст түркийәдә "уйғур қараханли" маркилиқ қоғун базарға селинди. Абдуллаһ исимлик бир уйғур башчилиқида бир қанчә кишидин тәркиб тапқан бир гуруппа уйғурлар түркийәниң маниса шәһиригә қарашлиқ бир районда 120 мо йәргә қоғун териған болуп, бу қоғунлар һазир пишип базарға селинди.

Қоғун териған абдуллаһ әпәндидин алған мәлуматларға қариғанда бу қоғунниң уруқи уйғур районидин кәлтүрүлгән болуп, қоғунға "уйғур қараханли" қоғуни дәп нам берилгән вә шу нам һөкүмәткә әнгә алдурулуп патент һоқуқи тәстиқлитилған.

Абдуллаһ әпәнди өткән йилиму бу хил қоғун териған болуп, қоғунлар сетилиштин бурун зедә болуп кетип яхши пайда алалмиған икән. Лекин бу йил қоғунлар өткән йилидикигә селиштурғанда яхши һосул бәргән. У, өткән йили алған тәҗрибигә асасән қоғунларни қайта териғанлиқини вә яхши һосул елишқа үмид бағлиғанлиқини билдүрди.

Абдуллаһ әпәнди бу йилқи қоғунлардин 150 тоннидин көпрәк һосул елишни тәхмин қилғанлиқини илгири сүрди.

Абдуллаһ әпәнди түркийәдә "уйғур қараханли" дегән маркини сақлап қелишқа вә бу маркилиқ қоғунни түркийәдә тонутушқа тиришчанлиқ көрсәткәнликини шуниң үчүн бу маркини түркийәдә қанунлуқ тәстиқлитип патент һоқуқини алғанлиқини вә қоғунларни түркийәниң әнқәрә, маниса вә истанбул шәһәрлиридики топ сетиш базарларда сетиливатқанлиқини билдүрди.

Биз йәнә бу һәқтә өткән йили бу қоғунни теришта ортақ болған аббас қарим билән сөһбәт елип бардуқ. Аббас қарим өткән йили териған қоғун базарға селинғандин кейин тәми яхши болғачқа түркләрниң яқтуруп сетивалғанлиқини, бу йилму қоғунни сораватқанларниң көплүкини, йәни "уйғур қараханли" маркилиқ қоғунниң кәлгүсидә түркийәдә чоң базар тапидиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт