Gu'angxüy guruhi qurghan kömür we ximiye zawutliri nom yézisidiki tebi'iy toghraqliqqa xiris élip kelgen

Muxbirimiz qutlan
2015.10.13
Share on WhatsApp
Share on WhatsApp
gwangxuy-shirkiti-araturk-nahiyesi-1.jpg Gwangxuy shirkiti qurghan zawutlar nom yézisi tewesidiki qedimiy toghraqliqni bulghimaqta. 2015-Yili öktebir.
Social Media

Yéqinda ijtima'iy taratqular arqiliq ashkara bolghan aratürk nahiyesidiki éghir muhit bulghinish weten ichi we sirtidiki jama'etchilikning diqqitini qozghimaqta.

Melum bolushiche, gu'angxüy guruhi buningdin birqanche yillar ilgiri aratürk nahiyesining nom yézisi teweside kömür we étilén pishshiqlap ishlesh zawuti qurghan.

Zawuttin tinimsiz halda sirtqa chiqirilghan kislataliq paskina su bilen hawagha qoyup bérilgen zeherlik is-tütek ezeldin hawasi sap bu taghliq nahiyeni éghir derijide bulghashqa bashlighan. Bolupmu nom yézisi tewesidiki biypayan qedimiy toghraqliq hawa we muhittiki bulghinish tüpeyli jiddiy xirisqa duch kelgen.

Biz ijtima'iy taratqular arqiliq ashkara bolghan uchurlargha asasen gu'angxüy guruhining aratürk nahiyesidiki kömür kan ishxanisigha téléfon qilduq. Halbuki, téléfonimizni qobul qilghan xitay xadim so'allirimizgha jawab bérishni ret qildi.

Andin biz mezkur nahiyediki yerlik xelqtin ehwal igileshke tirishtuq. Ziyaritimizni qobul qilghan bir yerlik Uyghur déhqan xitaylar qurghan zawut, kan-karxanilarning öz yurtigha körsitiwatqan éghir xirisliri heqqide shikayet qildi.

Aratürk nahiyesi qumul wilayitining shimaliy qismigha jaylashqan bir kichik nahiye. U tengritagh tizmiliri arqiliq jenubta qumul tüzlenglikidin ayrilip turidu. Shimaliy qismi mongghuliye xelq jumhuriyiti bilen chégralinidu. Aratürk nahiyesi Uyghurlarni asas qilghan qedimiy yurt bolup, 1931-yilidin 1951-yilighiche bolghan jeryanda köp qétim xitayning milliy zulumigha qarshi qoralliq qozghilanglar yüz bergen jaylarning biridur.

Aratürk nahiyesi tuxolo yézisining bashliqimu ziyaritimizni qobul qilip, gu'angxüy guruhi qurghan zawutlarning aratürk nahiyesige, bolupmu nom yézisining muhitigha körsetken tesirlirini bayan qildi.

Melumki, aratürk nahiyesi yérim déhqanchiliq bilen yérim charwichiliqni asas qilghan taghliq chégra nahiye bolup, bu yerde yashighuchi yerlik Uyghurlar tarixtin buyan dawamlashturup kelgen ishlepchiqirish shekli bilen turmush usulini yéqinqi mezgillergiche saqlap kelgen. Halbuki, da'irilerning nahiyeni mejburiy halda sana'etleshtürüsh pilani xuddi toxulo yézisining bashliqi tekitliginidek “Déhqanlarni ketmendin, charwichilarni qamchidin ayrighan.”

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.