Хотәндики от апитигә учриған уйғурлар еғир иқтисадий зиянға учриди

Ихтиярий мухбиримиз руқийә
2013.04.17
Share on WhatsApp
Share on WhatsApp
xoten-ot-aile-saymanliri-bazirigha-3.JPG Хотән шәһири шималий бекәт йенидики бир аилә сайманлири базири вә әтраптики алтә қәвәтлик бир аилиликләр бинасиниң от өчкәндин кейинки көрүнүши. 2013-Йили 13-апрел.
RFA/Ruqiye

Мәлум болушичә, хотән шәһиридики от апитигә учриған 42 өйниң оттин мудапиәлиниш суғуртиси йоқ болуп, өйлири көйүп кәткән уйғурларниң иқтисадий зийини һечқандақ капаләткә игә болалмаслиқи мумкин икән.

Уйғур олтурақ районидики өйләр 4 йил илгири хотән шәһәрлик чаңлуң өй ширкити тәрипидин селинған болуп, уйғур тиҗарәтчиләргә сетип берилгән. Гәрчә өй игилири толуқ төләм билән көчүп киргән болсиму, әмма техичә йәр хети алалмиған. Чаңлуң ширкити һәр хил баһаниләр билән йәр хети беришни кәйнигә созуп кәлгән, нәтиҗидә йәр хәтсиз қалған уйғурлар өйлирини оттин мудапиәлиниш суғуртисиға қатнаштуралмиған.

Чаңлуң өй ширкити уйғур тиҗарәтчиләргә бина өйләрни селип бериштин бурун, нурғун чирайлиқ вәдиләрни бәргән, әмма өй сетивалғучилар пулни төләп өйгә көчүп киргәндә, бинадики бихәтәрлик әслиһәлириниңму интайин кәмчил икәнликини, каридорларға һечқандақ от өчүрүш әслиһәлири орунлаштурулмиғанлиқини байқиған. Өй игилири чаңлуң ширкитигә әһвални инкас қилған болсиму, чаңлуң ширкити җиддий қаримиған. Өй игилири уйғурлар хитай һөкүмитигә әрз қилипму ақтуралмайдиғанлиқиға көзи йәткәчкә әрз қилишни тохтатқан.

Чаңлуң ширкитиниң директори ваң өйләрниң ширкәт тәрипидин суғурта қилинмиғанлиқини билдүрди, әмма у йәр хәт берилмигәнлики һәққидики мәсилидин өзини қачуруп бу тоғрида чаңлуң ширкитидә ишләйдиған бир уйғур мулазимәтчисини зиярәт қилишимизни ейтти. Зияритимизни қобул қилған чаңлуң ширкитиниң уйғур хизмәтчиси болса, иш беҗириш җәһәттики қийинчилиқлар түпәйлидин өзлириниң амалсиз икәнликини билдүрди.

От апитидә еғир иқтисадий зиянға учриған уйғурлар турар йери йоқ сәргәрданларға айланған болуп, хитай һөкүмәт даирилири уларға техичә һечқандақ инсаний ярдәм қолини сунмиди.

Нөвәттә от кетишниң сәвәблири вә қанчилик иқтисадий зиян болғанлиқи һәққидә хитай даирилири техичә ениқлаш басқучида икәнликини билдүргән болсиму, әмма хотән шәһәрлик сақчи даирилиридики бәзи пәрәзләр омумий зиянниң 100 милйон сом болуши мумкинлики еһтималлиқини оттуриға қоймақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.