Baydén hökümitini Uyghur qirghinchiliqini étirap qilishtin waz kechmeslikke chaqirildi

Muxbirimiz memetjan jüme
2021-02-21
Share
Baydén hökümitini Uyghur qirghinchiliqini étirap qilishtin waz kechmeslikke chaqirildi Amérika prézidénti jow baydén.
Social Media

Amérikidiki nopuzluq ammiwi siyaset tetqiqat aqillar ambiri - amérika éntérprayz ammiwi siyaset tetqiqat instituti mutexessisliri obzor élan qilip, baydén hökümitini Uyghur qirghinchiliqini étirap qilishtin waz kechmeslikke chaqiridi.

"Xewer heptiliki" namliq zhurnalda élan qilin'ghan obzorda baydén hökümiti xitayning milyonlighan Uyghurgha qarshi yürgüzgen herikitini "Irqiy qirghinchiliq" dep tonush, yaki uni inkar qilish mesiliside ganggirap qalghanliqi körsitilgen.

Obzorda, eger jow baydén xitaygha "Qattiq mu'amile qilish" we kishilik hoquqni "Amérikining diplomatiye siyasitining yadrosi" qilish qatarliq ilgiriki wedilirini bir chetke qayrip qoyup, tramp hökümiti xitayning Uyghurlargha qaratqan dehshetlik siyasetliri üstidin chiqarghan "Irqiy qirghinchiliq qarari" ni inkar qilsa, buning zor istratégiyelik xataliq bolidighanliqi otturigha qoyuldi.

Eyni waqittiki tashqi ishlar ministiri mayk pompéyo 19-yanwar bayanat élan qilip, xitayning Uyghurlargha qarshi "Irqiy qirghinchiliq" we "Insaniyetke qarshi jinayet" sadir qiliwatqanliqini jakarlighan idi.

Obzorida körsitishiche, tashqi ishlar ministirliqining bu qararigha teshkilatlar, parlamént ezaliri, mutexessisler hetta kéngesh palatasi ezaliridin pikir élin'ghan.

Obzorda mundaq déyildi: "Xitayning irqiy qirghinchiliqini eyiblesh toghra ish bolupla qalmastin, belki u yene istratégiyelik ewzellikke ige. Béyjing ammiwi obrazining xunüklishishige étibar béridu, hetta qatmu-qat cheklime astidiki xitay ammisidimu shinjang weziyitidin bi'aram bolush alametlirini körülmekte."

Obzorda yene, eger xitayning irqiy qirghinchiliqi téximu keng étirap qilinidighan bolsa, buning gérmaniyedek döletlerning xitay bilen soda qilishini tesleshtüridighanliqi, béyjingning b d t kishilik hoquq kéngishi qatarliq köp tereplik organlarda hoquq igilesh urunushining meghlup bolidighanliqi otturigha qoyuldi.

Obzor axirida mundaq déyildi: "Baydén xitaygha taqabil turush we kishilik hoquqni qoghdashta her xil tallashlargha ige. Emma Uyghur qirghinchiliqidin waz kéchish ularning biri emes."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet