Roshen abbas: “Antoni'o gutérrés irqiy qirghinchiliq qiliwatqan mustebit hakimiyetni qollaydu”

Ixtiyariy muxbirimiz ekrem
2022.09.27
Share on WhatsApp
Share on WhatsApp
Roshen abbas: “Antoni'o gutérrés irqiy qirghinchiliq qiliwatqan mustebit hakimiyetni qollaydu” Washin'gtondiki “Uyghur herikiti” teshkilatining re'isi roshen abbas xanim portugaliyening metbu'atlirining ziyaritini qobul qilmaqta. 2022-Yili 27-séntebir.
Photo: RFA

Washin'gtondiki “Uyghur herikiti” teshkilatining re'isi roshen abbas b d t bash katipi antoni'o gutérrésni uning yurtida Uyghurlar mesilisige sel qarighanliqi üchün eyiblep belgilik tesir qozghighan.

Portugaliyening paytexti lissabonda neshrdin chiqidighan 150 yilliq tarixqa ige “Kündilik xewerler” géziti 26-séntebir küni “Uyghur pa'aliyetchisi lissabonda” namliq xewerni élan qilip, Uyghur irqiy qirghinchiliqi mesilisige sehipe ajratqanidi. 27-Séntebir küni yene “Roshen abbas: gutérrés irqiy qirghinchiliqni qollaydu” namliq xewerni élan qilip, tégi portugaliyedin bolghan, portugaliyelikler alahide hörmetleydighan b d t ning hazirqi bash katipi antoni'o gutérrésni Uyghur irqiy qirghinchiliqigha sel qarash we xitayning wehshiylikige süküt qilish, xitayni qollash bilen eyibligenlikini bayan qilghan.

Maqalida roshen abbasning bayanlirigha orun bérilip mundaq déyilgen: “Mishél bachélét 4 yildin kéyinki eng axirqi deqiqide Uyghurlar toghrisidiki doklatni élan qildi. Biraq antoni'o gutérrés b d t ning bash katipi salahiyiti bilen 4 yildin buyan Uyghurlar mesilisini bir qétimmu tilgha élip baqmidi. Bachélétni shu orun'gha tallighan ademmu antoni'o gutérrés idi. Men uning toghra qarar chiqirip, sunuwatqan obrazini qoghdap qélish üchün özini tarixning toghra teripige qoyushini ümid qilimen. Emeliyette, antoni'o gutérrés irqiy qirghichiliq élip bériwatqan mustebit hakimiyetni qollaydu. Bu biz üchün intayin éghir ümidsizlik. B d t din ibaret bu qurulma néme üchün mewjut bolidu? del mushundaq zorawanliqni tügitish üchün. Antoni'o gutérrés ependi toghra yönilishte konkrét tedbirler bilen heriket qilmisa, aqiwette uning obrazimu bachélétningkige oxshash bulghunidu”.

Washin'gtondiki “Uyghur herikiti” teshkilatining re'isi roshen abbas xanim portugaliyede Uyghur weziyitini tonushturmaqta. 2022-Yili 27-séntebir.
Washin'gtondiki “Uyghur herikiti” teshkilatining re'isi roshen abbas xanim portugaliyede Uyghur weziyitini tonushturmaqta. 2022-Yili 27-séntebir.
dn.pt

Bu sözlerni roshen abbas xanim 25- we 26-séntebir künliri portugaliye metbu'atlirining ziyaretlirini qobul qilghanda, otturigha qoyulghan so'allargha jawab bergende tilgha alghan. Uyghur herikiti teshkilatining re'isi roshen abbas we Uyghur tetqiqat merkizining diréktori abdulhékim idrislar 23-séntebir londondiki pa'aliyetlirini axirlashturghandin kéyin, amérika tashqi ishlar ministirliqining orunlashturushi bilen 24-séntebirdin bashlap portugaliye paytexti lissabonda pa'aliyetlirini bashlighanidi.

Lissabondin ziyaritimizni qobul qilghan abdulhékim idris ependi bu heqte toxtalghanda, aldi bilen lissabondiki axbarat sahesining ziyaretliri toghrisida qisqiche melumat berdi. U sözide, 26-séntebir küni lissabondiki amérika elchixanisida amérikining portugaliyediki bash elchisi, amérikining italiyediki bash elchisi we washin'gtondin kelgen birqisim diplomatlar bilen yumilaq üstel söhbiti élip barghanliqini, bu söhbette Uyghur irqiy qirghinchiliqini toxtitish üchün élip bérilidighan konkrét heriketler heqqide muzakirilerde bolghanliqini eskertti.

Roshen abbas xanim bolsa bu heqte mundaq dédi: “Uyghurlarning portugaliyede anche köp pa'aliyetliri bolmighanliqi üchünmikin, bizning portugaliyege yétip kelgenlikimizni anglighan kündin bashlap terep tereptin muxbirlar yighip kétip, Uyghur irqiy qirghinchiliqi toghrisida nurghunlighan so'allarni sorashti. Portugaliyelikler öz dölitidin chiqqan b d t bash katipi antoni'o gutérrésni chong bilidiken we alahide hörmetleydiken. Buning üchünmu, antoni'o gutérrésning yurtida turup, uning Uyghurlar mesilisige hazirgha qeder süküt qilish bilenla cheklenmestin, belki izchil halda xitayni qollap kéliwatqanliqini, uning Uyghur qirghinchiliqigha shérik boluwatqan bir shexs ikenlikini sözlep, uni bachélétqa oxshash aqiwetke qélishtin agahlandurdum. Uyghur irqiy qirghinchiliqigha ige chiqishning hemmidin awwal antoni'o gutérrésning wezipisi ikenlikini tilgha élip, uning öz wezipisini héch ada qilalmighanliqini tekitlidim. Metbu'atlar méning antoni'o gutérrésge qarita tenqidlirimge alahide qiziqti”.

Roshen abbas we abdulhékim idrislarning lissabondiki pa'aliyetliri 28-séntebirge qeder dawam qilidiken. Bu jeryanda ular köpligen témilardiki yighinlargha qatniship, Uyghur irqiy qirghinchiliqidin melumatlar béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.