D u q ijra'iye komitéti 9-dékabir “Uyghur irqiy qirghinchiliq küni” ni dunya miqyasida ötküzüshni qarar qildi

Ixtiyariy muxbirimiz erkin tarim
2022.11.21
Share on WhatsApp
Share on WhatsApp
beryussel-ikki-jumhuriyetni-xatirilesh-1 D u q re'isi dolqun eysa béryussélda ötküzülgen ikki jumhuriyetni xatirilesh murasimida nutuq sözlimekte, 2022-yili 12-noyabir, béryussél.
RFA/Ekrem

20-Noyabir küni dunya Uyghur qurultiyi ijra'iye komitéti kéngeytilgen yighin ötküzüp, 9-dékabir “Uyghur irqiy qirghinchiliq küni” ni pütün dunya miqyasida ötküzüsh qarar qilindi.

Ékran arqiliq chaqirilghan bu yighin'gha amérika, kanada, yaponiye, awstraliye, türkiye, qazaqistan, qirghizistan, en'gliye, shwétsiye, shwétsariye, norwégiye, gollandiye, gérmaniye qatarliq 10 din artuq dölettin 70 neper ijra'iye hey'et ezasi we bezi teshkilatlarning mes'ulli'iri qatnashti.

20-Noyabirda bérlin waqti chüshtin kéyin 1:00 de bashlan'ghan yighin'gha d u q ning mu'awin re'isi perhat muhemmidi riyasetchilik qildi. U, aldi bilen bu yighinni échishtiki meqsetler heqqide toxtilip mundaq dédi: “Köpchilikke melum bolghinidek, 2021-yili 12-ayning 9-küni londondiki ‛Uyghur sot kollégiyesi‚ xitayning sherqiy türkistanda Uyghurlarni asas qilghan yerlik milletlerge qarita yürgüzüwatqan qilmishini ‛irqiy qirghinchiliq‚, ‛insaniyetke qarshi jinayet‚ dep békitken idi. Dunya Uyghur qurultiyi mezkur sotning qarari élan qilin'ghan 9-dékabir künini d u q re'isi dolqun eysaning bayanati arqiliq pütün dunyagha ‛Uyghur irqiy qirghinchiliq küni‚ dep jakarlighan idi. Mana bu yilqi 9-dékabir küni yéqinlap qaldi, shunga bu künni pütün dunya miqyasida keng da'iride xatirlesh meqsitide bügün dunya Uyghur qurultiyi ijra'iye komitétining kéngeytilgen yighinini chaqirduq.”

Perhat muhemmidi, 9-dékabir küni élip bérilidighan pa'aliyetler toghrisida qarar maqullan'ghanliqini bildürdi. U mundaq dédi: “Bu yighinda 9-dékabir küni pütün dunyada élip barmaqchi bolghan pa'aliyetlirimiz toghrisida pilan we programmalirimizni tüzüp chiqtuq, shundaqla bu heqte jiddiy seperwerlik élan qilduq. Biz hazirdin bashlap jiddiy teyyarliq élip bérish arqiliq, 9-dékabirdiki bu küni pütün dunyada nahayiti zor keng da'iride ötküzüshni qarar qilduq.”

Dunya Uyghur qurultiyining re'isi dolqun eysa ependi yighin axirlashqandin kéyin ziyaritimizni qobul qilip, 2021-yili 12-ayning 9-küni londondiki “Uyghur sot kollégiyesi” teripidin chiqirilghan hökümning tarixiy bir qarar ikenlikini, bu sotta guwahliq bergenlerdin 100 kishining guwahliqini tallap kitablashturulghanliqini bildürdi. U yene bu kitabni hazirghiche 5 tilda neshir qildurup tarqitiwatqanliqini, buning Uyghur irqiy qirghinchiliqini dunyagha bildürüshte zor ehmiyiti barliqini, shunga 9-dékabirdiki pa'aliyetni pütün dunyada daghdughiliq ötküzüsh kérekliki tekilidi.

D u q ning mu'awin re'isi doktor erkin ekrem ependi “Uyghur sot kollégiyesi” chiqarghan qararning sherqiy türkistan dewasini insaniyetning dewasigha aylandurushta muhim rol oynaydighanliqini, shunga her bir Uyghurning buninggha ehmiyet bérishi kéreklikini tekitlidi.

20-Noyabir küni ötküzülgen d u q ijra'iye komitétining kéngeytilgen yighinida maqullan'ghan qarar boyiche, “Uyghur irqiy qirghinchiliq küni” munasiwiti bilen 8-dékabir küni dunya Uyghur qurultiyi bilen Uyghur kishilik hoqoq qurulushi birlikte amérika xelq'ara axbarat kulubida, 9-dékabir küni türkiye paytexti enqerede muxbirlarni kütüwélish yighini ötküzdiken. Shuning bilen bir waqitta, Uyghur akadimiyesi bilen dunya Uyghur qurultiyi “Uyghur irqiy qirghinchiliq küni” munasiwiti bilen 7-dékabirdin 9-dékabirghiche amérika paytexti washi'in'gtonda ilmiy muhakime yighini ötküzidiken. 9-Dékabir küni yene “Uyghur irqiy qirghinchiliq küni” munasiwiti bilen dunya Uyghur qurultiyi bilen hemkarlishiwatqan Uyghur teshkilatliri birleshme bayanat élan qilidiken we her qaysi döletlerde namaysh ötküzüdiken.

D u q ijra'iye komitétining kéngeytilgen yighinida 25-noyabirgiche pütün dunyadiki teshkilatlarning teyyarliq xizmetlirini tamamlap, pa'aliyet pilanini d u qning merkizige bildürüshi qarar qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.