Истанбулда өткүзүлгән оқуш пүттүрүш мурасимида уйғур мәдәнийәт кимликини қоғдап қелиш тәкитләнди

Ихтиярий мухбиримиз арслан
2022.08.11
Share on WhatsApp
Share on WhatsApp
Istanbul-Oqush-Puttursh-Murasimi-1 Мәркизи истанбулға җайлашқан сутуқ буғрахан илим вә мәдәнийәт вәхписиниң тармиқидики тәлим –тәрбийә мәркәзлиридә оқуватқан оттура вә башланғуч мәктәп оқуғучилириниң 2021-2022- йиллиқ оқуш пүттүрүш мурасими. Түркийә, истанбул, 2022-йили авғуст
RFA/Arslan

Хәлқара шәрқий түркистан тәшкилатлар бирлики рәиси  һидайәтуллаһ оғузхан, “һөр дуняда муһаҗирәттә яшаватқан уйғурларниң алимлири, зиялийлири вә тәшкилатларниң ортақ күч чиқириши билән уйғур кимлики, миллий мәдәнийити, өрп - адәтлири вә исламий етиқадини қоғдап қелиш үчүн тәлим – тәрбийәгә әһмийәт бериши керәк”, деди.

У бу сөзләрни 8 – авғуст күни мәркизи истанбулға җайлашқан сутуқ буғрахан илим вә мәдәнийәт вәхписиниң тармиқидики тәлим –тәрбийә мәркәзлиридә оқуватқан оттура вә башланғуч мәктәп оқуғучилириниң 2021-2022- йиллиқ оқуш пүттүрүш мурасимида оттуриға қойди.  

Мурасимға шәрқий түркистан тәшкилатлириниң рәһбәрлири, әзалири вә истанбулда яшаватқан уйғур ата – анилар вә оқуғучилар болуп 500 дин артуқ киши қатнашти.

Мурасимға шәрқий түркистан тәшкилатлириниң рәһбәрлири, әзалири вә истанбулда яшаватқан уйғур ата – анилар вә оқуғучилар болуп 500 дин артуқ киши қатнашти.
Мурасимға шәрқий түркистан тәшкилатлириниң рәһбәрлири, әзалири вә истанбулда яшаватқан уйғур ата – анилар вә оқуғучилар болуп 500 дин артуқ киши қатнашти.
RFA/Arslan

2012- Йили қурулғандин башлап уйғур оқуғучиларниң маарип, тәлим – тәрбийә хизмәтлири билән шуғуллинип келиватқан сутуқ буғрахан илим вә мәдәнийәт вәхписи  қармиқидики сутуқ буғрахан тәлим-тәрбийә мәркизиниң мудири сәйпулла әзизи, бу бир йерим йил җәрянида елип барған оқу – оқутуш программиси тоғрисида тохтилип мундақ деди: “бу бир йерим йил ичидә 5 оқутқучи вә 50 оқуғучидин тәркиб тапқан сутуқ буғрахан тәлим – тәрбийә мәркизи һазир 25 оқутқучи билән 350 оқуғучиға илим бериватқан, күчлүк оқутқучилар қошуни вә системилиқ оқу-оқутуш программисиға игә болған бир тәлим-тәрбийә мәркизигә айланди. Башланғуч 1- 2- 3- 4- йиллиқ оқуғучилиримиз нәтиҗиси әң яхши оқуғучилар қатаридин орун алди. Мәркизимиз улни әң дәсләптики басқучтин башлашни мәқсәт қилип, 4- йиллиқ оқуғучилирини нуқтилиқ толуқсиз оттура мәктәпләргә тәйярлиқ қилдуруш үчун синип тәсис қилдуқ, буниңда улар алаһидә нәтиҗиләрни вә мувәппәқийәтләрни қолға кәлтүрди. Бир йил тәйярлиқ қилған вә имтиһанға қатнашқан 25 оқуғучидин 20 оқуғучи дөләтлик нуқтилиқ  оттура мәктәпләргә өтти. 5-, 6-, 7-йиллиқ синип оқуғучилиридин мәркизимиздә оқуған 50 оқуғучидин 38   нәпири оқуватқан синипини әлачи бәлгиси билән пүттүрди”.

Сәйпулла әзизи сөзидә йәнә чәтәлләрдики уйғур пәрзәнтлириниң маарип ишлириға көңүл бөлүш керәкликини тәкитләп мундақ деди: “маарип- бир милләтниң мәвҗут болуп туруши, тәрәққий қилиши вә йүксилишидики әң муһим амилларниң биридур. Ғайигә йитиш үчүн керәклик  болған алий мәлуматлиқ оқутқучилар,   сиясий әрбаблар, һәрбий қоманданлар, дини алимлар, һәр саһә мутәхәссислири, илим-пән сәрхиллири, доктор- инженерлар җүмлидин диний вә миллий кимликини тонуйдиған ярамлиқ из-басарлар пәқәт маарип саһәсидә тәрбийәлинип йетишип чиқиду. Буниң үчүн яшаватқан дөлитимизниң маарип системиси билән тәң қәдәмдә маңалайдиған вә һәтта униңдинму ешип чүшидиған техиму мукәммәл, техиму системилашқан бир маарип системиси, оқу-оқутуш программиси түзүп чиқилиши вә муһаҗирәттә илип бериливатқан мәвҗут оқутуш программилири миллитимизниң еһтияҗи һәм заманимизниң тәрәққиятиға мас һалда йеңилинип туруши керәк”.

Мурасимда йәнә сутуқ буғрахан илим вә мәдәнийәт вәхписи пәхрий рәиси профессор җәлал әрбай, шәрқий түркистан өлималар бирлики рәис вәкили мәһмудҗан дамоллам, җамаәт әрбаби абдуқадир япчан қатарлиқлар сәһнигә чиқип сөз қилди вә уйғур оқуғучиларни тәбрикләш билән биргә, уйғур пәрзәнтләрни миллий мәдәнийәт билән йетиштүрүш вә уйғур кимликини, мәдәнийитини қоғдаш керәкликини тәкитлиди.

Мурасимда һәрқайси синиплардики уйғур оқуғучилар гуруппа һаләттә сәһнигә чиқип һәрхил темиларда шеир оқуп, номур көрситип паалийәтни техиму җанландурди.

Мурасим ахирида әлачи оқуған уйғур оқуғучиларға сомка қатарлиқ һәр хил маддий боюм  тәқдим қилинди.

Мурасим ахирида әлачи оқуған уйғур оқуғучиларға сомка қатарлиқ һәр хил маддий боюм  тәқдим қилинди.
Мурасим ахирида әлачи оқуған уйғур оқуғучиларға сомка қатарлиқ һәр хил маддий боюм тәқдим қилинди.
RFA/Arslan

Зияритимизни қобул қилған сапакөй тәлим-тәрбийә мәркизи йетәкчиси алимҗан сабири, уйғур оқуғучиларниң оқуш әһвали вә оқутуш дәрсликлири тоғрисида тохталди.

Униң билдүрүшичә, башланғуч вә оттура мәктәп уйғур оқуғучилири дөләтлик мәктәптики дәрсни түгитип  қайтип кәлгәндин кейин уларға күчәйтиш вә толуқлима дәрси өгитип келинмәктә.  Һәптидә үч күн, һәр күни үч саәт  математика, пән билимлири вә түрк тили дәрслири өтилидиған болуп,  йәнә үч күн  дин – әхлақ , қуран кәрим , ана тил вә  мәдәнийәт дәрслири өтүлидикән.

Алимҗан сабриниң билдүрүшичә, сутуқ буғрахан тәлим – тәрбийә мәркизидә оғул – қиз болуп 160 уйғур бала дәрс оқуватқан болуп, язлиқ тәтилдики дәрсликкә қатнашқан балиларниң сани 350 дин ешип кәткән . Уларниң 200 нәпири башланғуч мәктәп оқуғучиси, 150 нәпири оттура мәктәп оқуғучиси икән.

Алимҗан сабири,  өзлириниң уйғур оқуғучиларниң пәнний җәһәттин һәм уйғурларниң өрп – адәт вә мәдәнийити җәһәттиму йетишип чиқиши үчүн тәң нисбәттә дәрслик программиси түзүп өгитип келиватқанлиқини,  оқуғучиларниң утуқ қазиниш үчүн тиришчанлиқ көрстиватқанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.