Istanbul shehiridiki Uyghurlar roza héyt namizini birlikte oqudi

Hemmimizge melum bolghinidek bu yil 2 – may küni dunyaning her qaysi jayliridiki musulmanlarning roza héyt bayrimi yétip keldi, roza héyt yilda bir qétim tebriklinidighan musulmanlarning bayrimi, bu bayramda eng az 3 kün héytlishish pa'aliyetliri élip bérilidu. Bu héyt bayrimida musulmanlar öz – ara bir – birlirini öylirini ziyaret qilip didarlishidu,  hal – ehwal sorishidu, bu arqiliq qérindashliq we dostluq rishtini kücheytidu. Jümlidin gerche Uyghur diyaridiki musulmanlar cheklimige uchrap roza héytni xalighanche ötküzelmigen bolsimu chet'ellerdiki Uyghurlar özlirining örüp adetliri boyiche dini ibadetlirini waqtida ada qilip, héyt - bayramlirini tebriklep özlirining milliy we dini örüp adetlirini saqlap kelmekte.

Jümlidin 2 – may düshenbe küni türkiyediki musulmanlar üchün roza héyt küni boldi. Istanbulning zeytinburnuda olturaqlashqan Uyghurlar zeytinburnudiki emine inanch meschitide,  sefaköyde olturaqlashqan Uyghurlar Uyghur mesichitide jem bolup roza héyt namizini birlikte oqudi.

Sefaköydiki Uyghur mesjitide oqulghan roza héyt namizigha 300 din artuq Uyghur qatnashti, bu jeryanda sherqiy türkistan ölimalar birlikining mes'ulliridin atawulla xelpet hajim, mexmutjan damolla söz qilip, Uyghurlarning roza héytini tebriklidi we Uyghurlar toghrisida muhim söz qildi.

Mexmutjan damollam sözide, Uyghur xelqining 74 yildin buyan kommunizmning bésimi astida atézim dersi oqup turupmu musulmanliqni saqlap qalghanliqning chong ghelibe ikenlikini bildürdi we bésimlargha chidap özini yoqitip qoymighanliqningmu chong ghelibe ikenlikini tekitlidi.

Arqidin jama'et erbabi abduqadir yapchan söz qilip, Uyghurlarning milliy azadliq rohni küchlendürüsh we weten xelqning azadliqi üchün kéreklik qedemlerni birlikte bésish kéreklikini tekitlidi.

Bügün yene istanbuldiki sherqiy türkistan ölimalar birliki we sherqiy türkistan ma'arip we hemkarliq jem'iyitining mes'ulliridin terkib tapqan bir guruppa kishiler buningdin 5 yil burun istanbulda wapat bolghan dini alim abdulhekim mexsumhajimning qebrisini ziyaret qilip merhumning rohigha atap du'a oqudi.

Türkiyening dini alimliridin nuriddin yildiz ependi, Uyghurlarning roza héytini tebriklesh bilen birge, dunyaning her qaysi jayliridiki Uyghurlarni weten hesriti bilen yashawatqanliqini we könglining yérim ikenlikini hés qiliwatqanliqini ipadilidi we Uyghurlargha teselli bérip héyt künlerde bolsimu köngüllirini yérim qilmasliqqa,  téximu chidamliq bolushqa we dini étiqadi, milliy rohiy we azadliq iradiside ching turushqa chaqiriq qildi.

Bügün yeni 2 – may küni, türkiyening tonulghan dini alimi, dewetchi nuriddin yildiz ependi, dunyaning her qaysi jayliridiki Uyghurlarning roza héyt bayrimini tebriklep mundaq dédi:  “Ejdadlirining zémini bolghan öz wetinide, dunyaning oxshimighan jaylirida we türkiyede yashawatqan pütkül sherqiy türkistanliq Uyghur qérindashlirim silerge salam yollaymen!, men silerning köngli yérim halda bir héytni kütiwalghininglarni bilimen we hés qiliwatimen. Néme bolushtin qet'iynezer bir ramzan éyini ötküzduq we roza héyt bayrimini kütüwalduq, roza héytinglargha mubarek bolsun, asman we zéminning igisi bolghan allahtin shuni tileymenki, kéler qétimliq héytinglar téximu yaxshi we erkinlikinglargha érishken bir héyt bayrimi bolsun, allah ibadetliringizni qobul qilsun, héytinglarni mubarek qilsun, öyinglerge we könglünglerge xatirjemlik ata qilsun, qayghu – azabliringlargha xatime bérilsun, silerge zulum qiliwatqan, silerni dininglardin, yurtunglardin mehrum qilghuchilar qilmishlirining tégishlik jazasini allahtin köridu”.

Xelq'ara sherqiy türkistan teshkilatlar birliki re'isi hidayetulla oghuzxan pütkül dunyadiki Uyghurlarning roza héytini tebriklidi we mundaq dédi: “Xelqimiz hazir islam dunyasida ötküzülüwatqan roza héyt tentenisi, shatliqigha chömelmey, külpet, hesret, azab oqubet ichide yashawatidu, milyonlap xelqimiz türmiler we lagérlargha qamilip, insan ewladi körmigen zulumni körüp yashawatidu, sirtta yashawatqan bizler chet'elde azad we hör dunyada chirayliq héytliship petiliship qilidighan bir shara'itqa muyesser bolghanliqimizdin bir tereptin söyünsek yene bir tereptin wetendiki ata – animiz we xelqimizning ehwalini közde tutup könglimiz nahayiti yérim bolup qayghurmaqta, emma kelgüsige nisbeten ümidimiz parlaq! insha'alla!”.