Istanbulda Uyghur mehellisi qurulushining échilish murasimi ötküzüldi

Ixtiyariy muxbirimiz arslan
2023.03.08
Istanbul-Selimpasha-rayonida-uyghur-mehellisi-1.jpg Istanbulning selimpasha rayonida Uyghur mehellisi qurulushi üchün sétiwélin'ghan zéminda ötküzgen échilish murasimida lénta kesmekte. 2023-Yili 7-mart, türkiye.
RFA/Arslan

7-Mart küni merkizi istanbuldiki Uyghur ilim meripet wexpisi ismini ashkarilashni xalimaydighan bir jem'iyet bilen hemkarliship istanbulning selimpasha rayonida Uyghur mehellisi qurulushi üchün sétiwélin'ghan zéminda échilish murasimi ötküzdi.

Igilinishiche, istanbulning selimpasha rayonigha deslepki qedemde 64 öyni öz ichige alghan a'ile qorusi sélinidighan bolup, kéyinki pilanda téximu kéngeytilip köpligen Uyghurlarning olturaqlishishi üchün shert-shara'it yaritilidighanliqi ilgiri sürüldi.

Échilishi murasimigha istanbuldiki her qaysi sherqiy türkistan ijtima'iy teshkilatlirining rehberliri we istanbulda yashawatqan Uyghurlardin er-ayal bolup köp sanda kishi qatnashti.

Istanbulning selimpasha rayonida Uyghur mehellisi qurulushi üchün sétiwélin'ghan zéminda ötküzgen échilish murasimida xatire süret. 2023-Yili 7-mart, türkiye.
Istanbulning selimpasha rayonida Uyghur mehellisi qurulushi üchün sétiwélin'ghan zéminda ötküzgen échilish murasimida xatire süret. 2023-Yili 7-mart, türkiye.
RFA/Arslan

Échilish murasimi qur'an kerim tilawiti we istiqlal marshi oqush bilen bashlandi. Murasimda Uyghur ilim meripet wexpisining re'isi abdughéni qutbi söz qilip, 2015-yili istanbulda Uyghur mehellisi qurush meqsitide izdinip selimpasha rayonining istanbul shehirige yéqin we munasip rayon ikenlikini belgilep, bu jayda mehelle qurushqa kirishkenlikini, buningdin kéyinki pilanda bu mehellining téximu kéngeytilip köpligen Uyghurlarning olturaqlishishi üchün shert-shara'it yaritilidighanliqini bildürdi.

Échilish murasimida xelq'ara sherqiy türkistan teshkilatliri birliki re'isi hidayetullah oghuzxan söz qilip, sherqiy türkistan xelqining dini, tili, milliy örp-adetlirining muhajirettiki hayatta saqlinip qélishi we dewaning dawamlishishi üchün bir yerge topliship olturaqlishishining muhim ikenlikini, shuning üchün selimpashada Uyghur mehellisi qurulushini qollaydighanliqini tekitlidi.

Istanbulning selimpasha rayonida Uyghur mehellisi qurulushi üchün sétiwélin'ghan zéminda ötküzgen échilish murasimidin körünüsh. 2023-Yili 7-mart, türkiye.
Istanbulning selimpasha rayonida Uyghur mehellisi qurulushi üchün sétiwélin'ghan zéminda ötküzgen échilish murasimidin körünüsh. 2023-Yili 7-mart, türkiye.
RFA/Arslan

Échilish murasimida yene dunya Uyghur qurultiyi wexpisi re'isi abduréshit abdulhemit ependi söz qilip, selimpashada Uyghur mehellisi qurulushining Uyghur xelqi üchün xeyrlik bolushigha tilekdash ikenlikini bildürdi we muhajirettiki Uyghurlarning özliri yashawatqan döletlerde kelgüside assimlyatsiye bolup ketmey özining milliy mewjutluqini saqlap qélishi üchün topliship olturaqlishishining muhim ikenlikini tekitlidi.

Murasimda yene Uyghur ösmürler sehnige chiqip shé'ir déklamatsiye qildi we Uyghurlarning béshigha kéliwatqan paji'eler we azadliqqa érishishi ipadilen'gen naxshini oqup yighin ehlining qizghin alqishigha érishti.

Ziyaritimizni qobul qilghan Uyghur ilim meripet wexpisining mu'awin re'isi shundaqla selimpashadiki Uyghur oqu mektipining mudiri hebibulla küseni bu mektepni échish we Uyghur mehellisi qurushning ehmiyiti toghrisida toxtaldi.

Istanbulning selimpasha rayonida Uyghur mehellisi qurulushi üchün sétiwélin'ghan zéminda ötküzgen échilish murasimidin körünüsh. 2023-Yili 7-mart, türkiye.

Hebibulla küseni ependi Uyghur ilim-meripet wexpisining selimpasha rayonida 2015-yili besh ming kwadrat métirliq bir zémin sétiwélip bir mektep we 40 yürüsh öy sélishqa bashlighanliqini, mektep we öyning 2017-yili pütüp ishqa kirishkenlikini, mektepning hem sinip hem yataq bolup 800 oqughuchi yétip oquyalaydighan sighimchanliqi barliqi, hazir mektepte 200 Uyghur oqughuchi yataqta yétip oquwatqanliqini bildürdi.

Hebibulla küseni ependining bildürüshiche, Uyghur a'ile qorusini kéngeytip ikki bina sélin'ghan bolup selimpashadiki Uyghur mehelliside hazir jem'iy 100 Uyghur a'ile olturaqlashqaniken.

Hebibulla küseni ependi, bu qétim rayonni téximu kéngeytip melum bir jem'iyet bilen hemkarliship 6000 kwadrat métirliq zémin sétiwalghanliqini we bu zémin'gha deslepki qedemde 94 öyni öz ichige alghan a'ile qorusi sélishni pilanlighanliqini we ul sélish échilish murasimi ötküzgenlikini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.