Истанбулда суйиқәсткә учриған йүсүпҗанниң әһвали еғирлишип җиддий қутқузуш бөлүмигә елинди

Ихтияри мухбиримиз арслан
2020-11-06
Share
yusupjan-emet-mejburlanghan-jasus.jpg Хитайниң дөләт хәвпсизликигә тәһдит йәткүзүш җинайити билән әйиблинип, 2 йерим йиллиқ қамақ җазасиға һөкүм қилинған, сақчилар тәрипидин "җасус" луққа мәҗбурланған йүсүпҗан әмәт. 2019-Йили январ, түркийә.
Yüsüpjan Emet teminligen

2- Ноябир кечидә истанбулниң авҗилар дегән районида намәлум киши яки кишиләр тәрипидин оқ етилип еғир яриланған йүсүпҗан әмәт дохтурханида давалиниватқан болуп, 11- айниң 5 - күни тәң кечидә туюқсиз әһвали еғирлишип җиддий қутқузуш бөлүмигә елинған. Игилинишичә йүсүпҗан әмәтниң нәпәс елиши қийинлашқан болуп дохтурлар җиддий қутқузмақтикән.

Бу һәқтә зияритимизни қобул қилған истанбулдики шәрқий түркистан кишилик һоқуқ көзитиш җәмийитиниң баш катипи нуриддин избасар әпәнди, йүсүпҗан әмәтниң  һазир җиддий қутқузүш бөлүмидә җиддий давалиниватқанлиқини  тәкитлиди.

Нуриддин избасар әпәндиниң билдүрүшичә, сәйшәнбә күни йүсүпҗанниң әһвали илгирикидин яхшилинип җиддий қутқузуш бөлүмидин йөткәлгәникән. Чаршәнбә күни кәчтә йүсүпҗан туюқсиз өзгирип қелип нәпәс алалмай қийналған вә дохтурлар уни қайтидин тәкшүрүп җиддий қутқузуш бөлүмигә йөткигән. Оқ йүсүпҗанниң боюн қисмиға тәгкәнлики үчүн у  боюн қисминиң сезимчанлиқини һес қилалмиған.

Йүсүпҗан чаршәнбә күни кечидә, һазир давалиниватқан дохтурханидин башқа дохтурханиға йөткилишни тәләп қилған. Нуриддин избасар әпәнди йүсүпҗанниң тәлипигә бинаән истанбул вақти кечә саәт 3:00 тә көп санда дохтурханиға телефон қилған болсиму дохтурханилар коруна вируси билән юқумланған кесәлләр билән тошуп кәткәнликини билдүргән. Шундақтиму бир дохтурхана билән уқушуп, йөткәшни дейишкән, бирақ һазир давалиниватқан дохтурхана мутәхәссислири җиддий қутқузуштики кесәлни йөткәшниң  бимарниң һаятиға хәвп елип келиш еһтимали барлиқини билдүрүп йөткәшкә қошулмиған шуниң билән у һазирму бақиркөй дөләт дохтурханисидики җиддий қутқузуш бөлүмидә икән.

Нуриддин избасар әпәнди бүгүн әттигән бақиркөй дөләт дохтурханисиниң мудир вирачи деңиз ханим билән учришип йүсүпҗанниң әһвалини сориған. Мудир вирач деңиз ханим, йүсүпҗанниң әһвали тоғрисида мәлумат бәргән вә йүсүпҗанни башқа дохтурханиға йөткәшниң керики йоқлуқини, бақиркөй дөләт дохтурханиси меңә оператсийә бөлүминиң истанбулдики әң яхши бәш дохтурханиниң бири икәнликини, шуңа уни башқа дохтурханиға апиришниң һаҗити йоқлуқи вә  өзлириниң  уни  дохтурханида әң яхши давалайдиғанлиқини билдүргән.

Нуриддин избасарниң билдүрүшичә, истанбул валийлиқиму йүсүпҗанға көңүл бөлгән вә дохтурхана билән алақә қилип йүсүпҗанни әң яхши усулда давалашни тәкитлигән.

Нуриддин избасар әпәнди, пүткүл уйғурларниң йүсүпҗанниң пат - пурсәттә сақийип кетиши үчүн дуа қилишни тәләп қилди.

Нуриддин избасар әпәнди өзлириниң  шәрқий түркистан кишилик һоқуқ көзитиш җәмийити болуш сүпити билән йүсүпҗанни ялғуз қоймайдиғанлиқини,  һалидин хәвәр еливатқанлиқини вә дөләтниң сақчи һәм  әдлийә органлири биләнму алақә қилип суйиқәтчиниң тутулуши вә җазалиниши үчүн күчәйдиғанлиқини билдүрди.

Биз йәнә бу һәқтә толуқ мәлумат елиш үчүн йүсүпҗанни дохтурханида беқиватқан йүсүпҗан күсәни билән сөһбәт елип бардуқ.

Йүсүпҗан күсәни, сүйқәсткә учриған йүсүпҗанниң һалидин хәвәр еливатқан болуп, униң билдүрүшичә, йүсүпҗанниң чаршәнбә күни әттигәндин кәчкичә әһвалиниң яхши болғанлиқи, параңлишип олтурғанлиқини билдүрди. Бирақ чаршәнбә күни кечидә туюқсиз өзгирип қелип, нәпәс елишта қийналғанлиқи сәвәбидин җиддий қутқузүш бөлүмигә елинғанлиқини тәкитлиди.

Йүсүпҗан күсәниниң билдүрүшичә, суйиқәсткә учриған йүсүпҗанға игә чиқиш, һалидин хәвәр елиш үчүн истанбулдики шәрқий түркистан йеңи әвлад һәрикитидин бир гуруппа яшлар тәшкиллинип йүсүпҗанниң йениға кәлгән вә үч гуруппиға  бөлүнүп нөвәт билән дохтурханида кечә - күндүз йүсүпҗанниң йенида туруп һалидин хәвәр алған.

Игилинишичә,  йүсүпҗан еғир ярилинип давалиниватқандин буян түркийә сақчилиридин икки сақчи хадими һәр күни дохтурханида нөвәт билән  йүсүпҗанни қоғдимақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт