Istanbulda suyiqestke uchrighan yüsüpjanning ehwali éghirliship jiddiy qutquzush bölümige élindi

Ixtiyari muxbirimiz arslan
2020-11-06
Share
yusupjan-emet-mejburlanghan-jasus.jpg Xitayning dölet xewpsizlikige tehdit yetküzüsh jinayiti bilen eyiblinip, 2 yérim yilliq qamaq jazasigha höküm qilin'ghan, saqchilar teripidin "Jasus" luqqa mejburlan'ghan yüsüpjan emet. 2019-Yili yanwar, türkiye.
Yüsüpjan Emet teminligen

2- Noyabir kéchide istanbulning awjilar dégen rayonida namelum kishi yaki kishiler teripidin oq étilip éghir yarilan'ghan yüsüpjan emet doxturxanida dawaliniwatqan bolup, 11- ayning 5 - küni teng kéchide tuyuqsiz ehwali éghirliship jiddiy qutquzush bölümige élin'ghan. Igilinishiche yüsüpjan emetning nepes élishi qiyinlashqan bolup doxturlar jiddiy qutquzmaqtiken.

Bu heqte ziyaritimizni qobul qilghan istanbuldiki sherqiy türkistan kishilik hoquq közitish jem'iyitining bash katipi nuriddin izbasar ependi, yüsüpjan emetning  hazir jiddiy qutquzüsh bölümide jiddiy dawaliniwatqanliqini  tekitlidi.

Nuriddin izbasar ependining bildürüshiche, seyshenbe küni yüsüpjanning ehwali ilgirikidin yaxshilinip jiddiy qutquzush bölümidin yötkelgeniken. Charshenbe küni kechte yüsüpjan tuyuqsiz özgirip qélip nepes alalmay qiynalghan we doxturlar uni qaytidin tekshürüp jiddiy qutquzush bölümige yötkigen. Oq yüsüpjanning boyun qismigha tegkenliki üchün u  boyun qismining sézimchanliqini hés qilalmighan.

Yüsüpjan charshenbe küni kéchide, hazir dawaliniwatqan doxturxanidin bashqa doxturxanigha yötkilishni telep qilghan. Nuriddin izbasar ependi yüsüpjanning telipige bina'en istanbul waqti kéche sa'et 3:00 te köp sanda doxturxanigha téléfon qilghan bolsimu doxturxanilar koruna wirusi bilen yuqumlan'ghan késeller bilen toshup ketkenlikini bildürgen. Shundaqtimu bir doxturxana bilen uqushup, yötkeshni déyishken, biraq hazir dawaliniwatqan doxturxana mutexessisliri jiddiy qutquzushtiki késelni yötkeshning  bimarning hayatigha xewp élip kélish éhtimali barliqini bildürüp yötkeshke qoshulmighan shuning bilen u hazirmu baqirköy dölet doxturxanisidiki jiddiy qutquzush bölümide iken.

Nuriddin izbasar ependi bügün ettigen baqirköy dölet doxturxanisining mudir wirachi déngiz xanim bilen uchriship yüsüpjanning ehwalini sorighan. Mudir wirach déngiz xanim, yüsüpjanning ehwali toghrisida melumat bergen we yüsüpjanni bashqa doxturxanigha yötkeshning kériki yoqluqini, baqirköy dölet doxturxanisi ménge opératsiye bölümining istanbuldiki eng yaxshi besh doxturxanining biri ikenlikini, shunga uni bashqa doxturxanigha apirishning hajiti yoqluqi we  özlirining  uni  doxturxanida eng yaxshi dawalaydighanliqini bildürgen.

Nuriddin izbasarning bildürüshiche, istanbul waliyliqimu yüsüpjan'gha köngül bölgen we doxturxana bilen alaqe qilip yüsüpjanni eng yaxshi usulda dawalashni tekitligen.

Nuriddin izbasar ependi, pütkül Uyghurlarning yüsüpjanning pat - pursette saqiyip kétishi üchün du'a qilishni telep qildi.

Nuriddin izbasar ependi özlirining  sherqiy türkistan kishilik hoquq közitish jem'iyiti bolush süpiti bilen yüsüpjanni yalghuz qoymaydighanliqini,  halidin xewer éliwatqanliqini we döletning saqchi hem  edliye organliri bilenmu alaqe qilip suyiqetchining tutulushi we jazalinishi üchün kücheydighanliqini bildürdi.

Biz yene bu heqte toluq melumat élish üchün yüsüpjanni doxturxanida béqiwatqan yüsüpjan küseni bilen söhbet élip barduq.

Yüsüpjan küseni, süyqestke uchrighan yüsüpjanning halidin xewer éliwatqan bolup, uning bildürüshiche, yüsüpjanning charshenbe küni ettigendin kechkiche ehwalining yaxshi bolghanliqi, parangliship olturghanliqini bildürdi. Biraq charshenbe küni kéchide tuyuqsiz özgirip qélip, nepes élishta qiynalghanliqi sewebidin jiddiy qutquzüsh bölümige élin'ghanliqini tekitlidi.

Yüsüpjan küsenining bildürüshiche, suyiqestke uchrighan yüsüpjan'gha ige chiqish, halidin xewer élish üchün istanbuldiki sherqiy türkistan yéngi ewlad herikitidin bir guruppa yashlar teshkillinip yüsüpjanning yénigha kelgen we üch guruppigha  bölünüp nöwet bilen doxturxanida kéche - kündüz yüsüpjanning yénida turup halidin xewer alghan.

Igilinishiche,  yüsüpjan éghir yarilinip dawaliniwatqandin buyan türkiye saqchiliridin ikki saqchi xadimi her küni doxturxanida nöwet bilen  yüsüpjanni qoghdimaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet