Istanbulda Uyghur ta'amliri musabiqisi ötküzüldi

Istanbuldiki sherqiy türkistan wexpisining uyushturushi bilen 9-ayning 1-küni wexpe merkizide Uyghur ta'amliri musabiqisi ötküzüldi. Istanbuldiki Uyghur ayalliri özliri etken polu, leghmen, manta qatarliq her xil en'eniwi Uyghur ta'amliri bilen bu musabiqige qatnashti. Musabiqe axirida 1-, 2-, we 3-bolghanlar élan qilinip mukapatlandi.

Bu musabiqide Uyghur ta'amlirini bahalash hey'iti qurulghan bolup, hey'et ezaliri istanbuldiki istiniye uniwérsitéti ta'am sen'etliri bölümi osmanli saray ta'amliri sahesining oqutquchisi, usta ashpez haldun tüzel ependi, türkiyede tonulghan dangliq ashpez ustilardin sefa sabirli, zuljennah kontér qatarliq üch kishidin terkib tapqan. Ular bu qétimliq musabiqe üchün Uyghur ayalliri teyyarlighan türlük ta'amlarning temi, terkibi we süpitige qarap chiqip, inchike bahalash élip barghan hemde derijisini békitip chiqqan.

Biz bu heqte toluq melumatqa érishish üchün hapiz qaraqash hajim bilen söhbet élip barduq.

Bu heqte mexsus ziyaritimizni qobul qilghan sherqiy türkistan wexpisi idare hey'itining ezasi hapiz qaraqash hajimning bildürüshiche, musabiqige jem'iy 25 neper Uyghur ayal qatnashqan. Ular musabiqe jeryanida leghmen, polu, pétir manta qatarliq her xil Uyghur ta'amlirini öz alahidiliki boyiche neq meydanda étip özlirining maharetlirini körsetken. Bahalash hey'itining inchikilik bilen bahalishi netijiside, sajide mijit xanim etken Uyghur tamiqi 1-derijige ériship, 18000 türk lirasi qimmitidiki bir tal jumhuriyet altuni bilen mukapatlan'ghan؛ jewherxan Uyghur isimlik xanimning etken tamiqi 2-derijilik mukapatqa ériship, 9000 türk lirasi qimmitidiki yérim altun bilen mukapatlan'ghan؛ xediche memet isimlik Uyghur ayalning tamiqi 3-derijilik mukapatqa ériship, 2720 türk lirasi qimmitidiki bir giram altun bilen mukapatlan'ghan. Bulardin bashqa bu musabiqige qatnashqan qalghan 22 ayalning her birige bir taldin 500 lira qachilan'ghan BIM karti bilen righbetlendürüsh mukapati bérilgen.

RFA/Arslan

Bu musabiqe toghrisida sherqiy türkistan wexpining re'isi ilhan turanli ependi mundaq dédi: “Xitayning sherqiy türkistanda élip bériwatqan her türlük bésim we qirghinchiliqliri dawamida Uyghur medeniyiti, jümlidin Uyghur ta'amlirimu buzghunchiliqqa uchridi. Biz xitayning bu buzghunchiliqni köz aldimizgha qoyup, Uyghurlarning medeniyiti, en'eniwi ta'amliri we ijtima'iy hayatini janlandurush؛ ularni ewladtin ewladqa miras qaldurushni meqset qilip bu pirogrammini orunlashturduq. Bu pirogramma nahayiti yaxshi ötti, men bu pirogrammida bizge yardemleshken ashpez ustilargha, nurghun ejir singdürüp güzel ta'amlarni pishurghan sherqiy türkistanliq xanimlargha teshekkür éytimen”.

Ilhan turanli ependi yene Uyghur medeniyitini qoghdash we dunyagha yenimu keng da'iride tonushturush kérekliki toghrisida pikir bayan qilip, mundaq dédi: “Dunyaning her qaysi jaylirida sherqiy türkistandiki Uyghur medeniyitini yenimu bix sürdürgen halda xitaylargha shuni körsitimizki, xitay sherqiy türkistan zéminida qanchilik éghir qirghinchiliqlar we buzghunchiliqlarni élip bérishidin qet'iy nezer, u yerdiki türk-Uyghur medeniyiti hem islam rohini héch qachan yoq qilalmaydu. Biz dunyaning her qaysi jaylirida sherqiy türkistanning medeniyitini tonushturup hem awazini anglitip, musteqilliq kürishimizni qet'iy dawamlashturushimiz! bu qétimqi pirogramma ene shu pa'aliyetlirimizning bir qismi hésablinidu” .

RFA/Arslan

Biz bu musabiqe toghrisida pikir-qarashlirini élish üchün Uyghur ta'amlirini bahalashqa qatnashqan usta ashpez haldun tüzel ependini ziyaret qilduq. U, mundaq dédi: “Biz bügün sherqiy türkistan wexpide nahayiti güzel bir künni ötküzduq. Sherqiy türkistanning lezzetlik tamaqlirining temini tétiduq, uningdin alghan lezzetlerni zéhnimizge singdürüshke tirishtuq. Bügün Uyghur xanimlar qaltis lezzetlik we ajayip güzel ta'amlarni bizge teqdim qildi, ularning hemmisi bir-biridin güzel tamaqlar idi. Biz 100 xildin artuq tamaqning temini tétiduq, tamaqlar bir-biridin lezzetlik we güzel bolghanliqidin bahalashta xéli qiynalduq. Türkiyede yashawatqan hemme kishining bu alahide we güzel ta'amlarning lezzetlik temini tétish pursitige érishishini ümid qilimen. Pütün xelq ammisini istanbuldiki sherqiy türkistan wexpining merkizini ziyaret qilip, bu lezzetlerning temini tétishqa teklip qilimen! ”

Igilinishiche yéqinda sherqiy türkistan wexpisining merkizide bir Uyghur réstorani échilghan bolup bu réstoranda her xil Uyghur tamaqliri tépilidiken.