Italiye paytexti rumda shi jinpinggha qarshi namayish ötküzüldi

Ixtiyariy muxbirimiz ekrem
2019-03-22
Élxet
Pikir
Share
Print
Italiye paytexti rumda ötküzülgen Uyghur we tibetlerning shi jinpinggha qarshi namayishidin bir körünüsh. 2019-Yili 22-mart. Rum, italiye.
Italiye paytexti rumda ötküzülgen Uyghur we tibetlerning shi jinpinggha qarshi namayishidin bir körünüsh. 2019-Yili 22-mart. Rum, italiye.
RFA/Ekrem

Xitay re'isi shi jinping 4 künlük ziyaret üchün 21-mart kechte italiyege yétip kelgen bolup, u 22-mart italiye prézidénti segiyo mattarélla bilen iqtisadiy hemkarliqlar toghrisida söhbet ötküzgen.

Metbu'atlardiki bayanlargha asaslan'ghanda, xitay re'isi shi jinpingning bu qétimqi italiye ziyaritining meqsiti "Bir belwagh, bir yol" istratégiyilik qurulushida italiye bilen hemkarliq ornitishtin ibaret iken. Hazirgha qeder yawropa ittipaqigha eza 28 dölet ichide polsha we girétsiye bu qurulushqa imza qoyghan bolup, bashqa döletler xitayning bu istratégiyilik pilanigha shübhe bilen qarap kelgen hemde bu qurulush yawropa ittipaqini zor iqtisadiy krizisqa bashlishi mumkin, dégen gumanlarni saqlap qalghan. 

Xitay re'isi shi jinping bu qétim italiye bilen hemkarliq ornitip, "Bir belwagh, bir yol" pilanini qobul qilmaywatqan g-7, yeni tereqqiy qilghan 7 döletning ishikini achmaqchi bolghan. 

Emma uning italiye ziyariti Uyghurlar, tibetler we yerlik kishilik hoquq teshkilatlirining qarshiliqigha duch kelgen. Gérmaniyening myunxén shehiridin 21-mart kéchilep yolgha chiqqan bir bölük Uyghurlar 22-mart rumgha yétip kélip, u yerdiki tibetler we yerlik xelqler bilen birge shi jinpinggha qarshi namayish ötküzgen. 

Dunya Uyghur qurultiyi diniy ishlar komitétining mudiri, "Sherqiy türkistan ölimalar birliki" ning mu'awin re'isi turghunjan alawudun rumdin ziyaritimizni qobul qilip, namayish heqqide melumat berdi. 

Bu qétimqi namayishqa biryussélda pa'aliyet élip bériwatqan d u q xadimi shehrizatmu kélip qatnashqan bolup, u namayish meydanida jaza lagérliri toghriliq nutuq sözlep, yerlik ahalining diqqitini tartqan. Bu namayishqa ishtirak qilghan myunxéndiki jama'et erbabi ablimit tursun ependi bu qétimqi namayishning italiye xelqige xitay zulumini pash qilish, xitayning epti-beshirisini échish üchün purset yaritip bergenlikini tilgha aldi. 

Bu namayish jeryanida tibetler we Uyghurlar shi jinpinggha, xitay zulumigha we jaza lagérlirigha qarshi sho'arlar towlashqan. D u q xadimi shehrizat bolsa italiye hökümitini iqtisadiy menpe'etnila qoghlashmay, kishilik hoquqqa hörmet qilishqa, xitaygha bésim ishlitishke chaqirip, nutuqlar sözligen.

Melum bolushiche, xitay re'isi shi jinping italiye ziyaritidin kéyin firansiye prézidénti makron we gérmaniye bash ministiri anjila mérkil bilen uchrishidiken. Bu uchrishish 4-ayning 9-küni yawropa ittipaqi bilen xitay terep aliy derijilikler uchrishishining teyyarliq qedem basquchliri hésablinidiken. Biraq shi jinpingning watikandikiler bilen körüshidighan yaki körüshmeydighanliqi téxi namelum iken. Xitaydiki xristi'an muritliri uchrawatqan zulumlar seweblik watikan bilen xitay otturisida peyda bolghan soghuqchiliq hazirgha qeder dawamliship kelgen.

Toluq bet