Италийә парламентида уйғурлар вә хоңкоң һәққидә гуваһлиқ бериш, ахбарат елан қилиш йиғини өткүзүлди

Ихтиярий мухбиримиз әкрәм
2020.07.02
italiyede-uyghur-mesilisi-dolqun-eysa.jpg Италийә парламентида өткүзүлгән уйғурлар вә хоңкоң һәққидә гуваһлиқ бериш, ахбарат елан қилиш йиғинидин көрүнүш. 2020-Йили 1-июл.
RFA/Ekrem

Уйғурларниң нөвәттики вәзийити италийә парламентида өткүзүлгән гуваһлиқ бериш йиғинида оттуриға қоюлди.

1-Июл италийә парламентида уйғурлар вә хоңкоң һәққидә гуваһлиқ бериш, ахбарат елан қилиш йиғини өткүзүлгән. Йиғинни италийә парламентлар иттипақиниң “дуняни қанун билән идарә қилиш комитети” -марко панилла тәшкиллигән болуп, йиғин италийә пайтәхт римдики парламент сарийида өткүзүлгән.

Мәзкур йиғин германийәлик тәтқиқатчи адриан зенз елан қилған уйғур диярида йолға қоюлуватқан туғут чәкләш сияситигә даир һөҗҗәт дуня миқясида күчлүк тәсир қозғиған бир чағда чақирилған.

Йиғинда италийәдики чоң партийәләрдин “дөләт һалқиған радикал партийә” ниң б д т дики вәкили вә “дуняни қанун билән идарә қилиш комитети” -марчко панилланиң әзаси лаура харт, кеңәш палата әзаси лусия малан, демократлар партийәсиниң италийә парламентидики әзаси роберто рампи, д у қ рәиси долқун әйса, “дуняни қанун билән идарә қилиш комитети” ниң рәиси гиюло мария, италийәдики һәрқайси партийәләргә тәвә болған парламент әзалиридин валериа федели, паоло форментини, александро гиглио вигна, адолфо урсо, фәдәрико молликоне, елисабетта зампарутти қатарлиқ кишиләр нутуқ сөзлигән.

Мәзкур йиғинда уйғурларниң омумий вәзийитидин мәлумат беришкә тәклип қилинған д у қ рәиси долқун әйса әпәнди йиғинға син көрүнүши арқилиқ қатнашқан. У йиғинда қилған сөзидә хитайниң пиланлиқ туғут сиясити вә җаза лагерлири сияситиниң түп маһийитиниң уйғурларни милләт сүпитидә йоқитиш икәнликини баян қилған.

“дөләт һалқиған радикал партийә” ниң б д т дики вәкили вә “дуняни қанун билән идарә қилиш комитети” -марко панилланиң әзаси лаура харт ханим бу һәқтә зияритимизни қобул қилғанда йиғинға италийә парламентиниң муһим әрбаблириниң иштирак қилғанлиқини әскәртти. У мундақ деди: “көплигән даңлиқ парламент әзалири қатнашқан бу йиғинда д у қ рәиси долқун әйса әпәнди уйғур дияридики кишилик һоқуқ дәпсәндичиликлирини, болупму уйғур аяллири учраватқан зораванлиқларни баян қилип кишиләрни тәсирләндүрди. Мустәбит сақчи дөлитидики уйғур аяллири учраватқан зулумлар тоғрисида доктор адриан зенз елан қилған һөҗҗәтлик доклатни көргән парламент әзалири бир уйғур гуваһчиниң еғзидин техиму ечинишлиқ қисмәтләрни аңлиди. Бизниң бу йиғинни италийә парламентида чақиришимиздики мәқсәт хитайға бағрини кәң ачқан италийә сиясәтчилиригә хитайниң зади ким болғанлиқини тонутуш үчүн иди. Мәқсидимизгә йәттуқ дәп ойлаймән.”

Долқун әйса әпәнди хитайдин тарилип дуняға зор апәт елип кәлгән корона вирусиниң еғир зәрбисигә учриған италиянларниң йеқиндин буян хитайға қарита көз қаришида өзгириш һасил қилғанлиқини, бу қетим италийә парламентида өткүзүлгән мәзкур йиғинниң италийәниң хитай сияситидә өзгириш һасил болушиға бәлгилик тәсир көрситиши мүмкинликини тилға алди.

Лаура харт ханим сөзиниң хатимисидә болупму уйғур ханим-қизлири үстидин йүргүзүлүватқан зораванлиққа таянған туғут чәкләш сияситиниң италийә хәлқиниң күчлүк нәпритигә учрайдиғанлиқини тәкитлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.