Parlamént ezasi fahrettin yoqush: “Irqiy qirghinchiliq yüz bériwatqan xitayda olimpik ötküzülüshini qattiq eyibleymiz”

Ixtiyariy muxbirimiz erkin tarim
2022-01-20
Share
Parlamént ezasi fahrettin yoqush: “Irqiy qirghinchiliq yüz bériwatqan xitayda olimpik ötküzülüshini qattiq eyibleymiz” Péshqedem pa'aliyetchi xeyrullah efendigil ependi türkiye parlaméntidiki “Iyi” partiyesining parlamént ezasi fahrettin yoqush ependi bilen körüshti. 2022-Yili 13-yanwar, türkiye.
RFA/Erkin Tarim

13-Yanwar küni dunya Uyghur qurultiyi chaqiriq élan qilip, béyjing qishliq olimpik musabiqisi bashlinidighan 4-féwral küni pütün dunya miqyasida olimpikke qarshi axiriqi namayishini ötküzüsh teshebbusini otturigha qoyghan idi. Shundin kéyin d u q ning türkiyediki wekili, péshqedem pa'aliyetchi xeyrullah efendigil ependi türkiye parlaméntidiki “Iyi” partiyesining parlamént ezasi fahrettin yoqush ependi bilen körüshüp, 4-féwral küni olimpikke qarshi naraziliq bildürüshke chaqiriq qildi. Uchrishishta xeyrullah ependi parlamént ezasigha Uyghurlarning hazirqi éghir weziyiti toghrisidimu melumat bergen. Uchrishish axirlashqandin kéyin, ziyaritimizni qobul qilghan parlamént ezasi fahrettin yoqush ependi irqiy qirghinchiliq yüz bériwatqan xitayda olimpik ötküzülüshini qattiq eyibleydighanliqini tekitlidi.

Fahrettin yoqush ependi 2-ayning 4-künigiche olimpik tenterbiye musabiqisining xitayda ötküzülüshige naraziliq bildürüshni dawam qilidighanliqini bayan qilip mundaq dédi: “4-Féwral küni béyjingda ötküzülidighan olimpik tenterbiye musabiqisigha naraziliq bildürüsh üchün nurghun dölette namayish ötküzülgen bolsimu, xelq'ara olimpik komitéti buninggha qarita téxiche ijabiy jawab qayturmidi. Gerche xitayning sherqiy türkistanda élip bériwatqan irqiy qirghinchiliq siyasitige bezi döletler qattiq inkas qayturup, buni toxtitish üchün qarar maqullighan bolsimu, emma olimpik komitétiti qishliq olimpik musabiqisini béyjingda échish qararini özgertmidi. Biz xelq'ara olimpik komitétining irqiy qirghinchiliq qiliwatqan xitayda olimpik échishqa ruxset qilishini eyibleymiz, shundaqla 4-féwral künigiche naraziliq bildürüshni dawamlashturimiz.”

U, olimpik musabiqisi bashlinidighan 4-féwral küni türkiye parlaméntida axbarat élan qilish yighini chaqiridighanliqini bayan qilip, mundaq dédi: “Biz parlaméntta 2-ayning 4-küni bu heqte bayanat élan qilmaqchimiz. Emma biz bir qanche siyasiy partiyening naraziliq bildürüshi bilen bu ishta muweppiqiyet qazinalmaydighandek turimiz. Shunga men barliq türk xelqini, türkiyediki ammiwiy teshkilatlarni insaniyetke qarshi jinayet sadir qiliwatqan xitaygha qarshi naraziliq namayishi élip bérishqa, shundaqla türkiye hökümitini derhal diplomatiyelik bayqut élan qilishqa chaqirimen.”

Dunya Uyghur qurultiyining türkiyening qeyseri shehiridiki wekili xeyrullah efendigil ependi, bügün türkiye parlaméntida burundin tartip izchil halda Uyghurlarni qollap kéliwatqan “Iyi” partiyesining parlamént ezasi fahrettin yoqush ependi bilen körüshüp, béyjing qishliq olimpik musabiqisige qarshi naraziliq bildürüshini telep qilish bilen birge, Uyghurlarning hazirqi éghir weziyiti toghrisida melumat bergenlikini bildürdi.

Melum bolghinidek, amérika, kanada, en'gliye we awstraliye qatarliq döletler 2022-yilliq qishliq olimpik tenterbiye musabiqisining béyjingda ötküzülüshini bayqut qilishni qarar qildi. Her da'im qeyerde bir ézilgen musulman bolsa ulargha yardem qolini uzitidighanliqini tekitlewatqan türkiye hökümiti, téxiche béyjing qishliq olimpik tenterbiye musabiqisi toghrisida pozitsiye bildürmidi. Xeyrullah efendigil ependi türkiye hökümitini we türkiyediki barliq siyasiy partiyelerni béyjing qishliq olimpik musabiqisini bayqut qilishqa chaqiridighanliqini bayan qildi.

Dunya Uyghur qurultiyining 1-ayning 13-küni élan qilghan chaqiriqida munular bayan qilin'ghan: “Dunya Uyghur qurultiyi herqaysi ellerde pa'aliyet élip bériwatqan pütün teshkilatlirimizni, pa'aliyetchilirimizni we awam xelqimizni béyjing irqiy qirghinchiliq olimpiki bashlinidighan 4-féwral küni özliri turushluq döletlerde hem béyjing qishliq olimpik musabiqisini bayqut qilish hem ‛ghulja qirghinchiliqi‚ ning 25-yilliqini xatirilesh munasiwiti bilen bir tutash halda keng-kölemlik naraziliq pa'aliyetlirini uyushturushqa chaqiridu.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet