Qamal mezgilide ghayib bolghan saghlamliq yétekchisi bextiyar sadirning tutqunda ikenliki ashkarilandi

Uyghur élida 10 nechche yildin buyan saghlamliq saheside xizmet qilip kéliwatqan we belgilik netije qazan'ghan saghlamliq yétekchisi bextiyar sadir, bu yil qamal mezgilide yeni 10-ayning otturiliri iz-déreksiz ghayib bolghan. Ehwalni bayqighan uning shiwétsiyediki inisi we hedisi munasiwetlik qanalliri arqiliq köp urunup baqqan bolsimu, uningdin héchqandaq uchur alalmighan. Muxbirimizning ürümchige qarita élip barghan téléfon ziyaretliri dawamida, uning dölet mexpiyetlikini ashkarilash gumani bilen tutqunda ikenliki ashkarilandi.

“Men döletlik birinchi derijilik saghlamliq yétekchisi, aptonom rayonluq ozuqshunaslar jem'iyitining ezasi bextiyar mu'ellim bolimen. . . .” dégen, Uyghur élida 10 yildin béri yangrap kéliwatqan bu awazning sahibi bextiyar sadir, bu yil 10-ayning otturiliridin bashlap iz-déreksiz ghayib bolghan. Bu ghayibliq aldi bilen uning shiwétsiyediki ikki qérindishi seydijan sadir bilen minewer sadir teripidin bayqalghan. Ular bexitiyarning ushtumtut ündidargha kirishtin toxtighanliqi we shirket tor bétidiki uchurlarning yéngilanmasliqigha qarap, uning bixeterlikidin endishige chüshken we iz-dérikini qilishqa bashlighan؛ ular ürümchidiki tonush-bilishliri arqiliq ikki ayche sürüshte qilip baqqan bolsimu héchqandaq uchurgha érishelmigen.

Biz bextiyar sadirning ehwalini éniqlash üchün, ürümchi shehiridiki baj, bazar bashqurush we edliye tarmaqlirighimu téléfon qilduq. Melum bolushiche, saghlamliq saheside xitayning döletlik we aptonom rayonluq kespiy organlirining étirap qilishigha érishken we layaqet guwahnamiliri bolghan bextiyar sadir, torda léksiye sözlesh, kurs échip yétekchi terbiyelesh jeryanida jem'iyette “Bextiyar mu'ellim” dep tonulghan we yéqinqi yillarda öz namidiki marka bilen bazargha mehsulatlar salghan. U tijariti ilgirilewatqan 2014‏-2015‏- we 2016-yilliri awwal yawropa döletlirige we axirida amérikigha sayahetke kelgen. Yéqinqi 6 yildiki tutqun heriketliride chet'elge chiqqan bolush-muhim tutulush sewebliridin biri bolghachqa, seydijan sadir we hedisi bextiyardin her waqit endishe qilip kelgen. Inisi seydijanning bildürüshiche, ular ensirigendek, u 2017- we 2018-yilliri, uda ikki yil nazaret astida yashighan, mangghan-turghinidin saqchilargha doklat qilip turghan. Bu qétim, uning bir ayche iz-dériki bolmasliqi, uning üstige, bu ghayibliqning qamal mezgilide yüz bérishi seydijan sadir we hedisige bir palaketchiliktin yeni uning tutqun qilin'ghanliqidin éniq shepe bergen.

Téléfonimizni qobul qilghan, ürümchidiki xoten yoli saqchixanisi xadimi, bextiyar sadirning qaysi qamaqxanida ikenliki heqqidiki so'alimizgha jawaben, bu melumatni qarlighach saqchixanisi béreleydighanliqini éytti. Mezkur saqchixana xadimi, bextiyar sadirning tutulghan küni öziningmu neq meydan'gha chaqirtilghanliqi, emma, bextiyarning néme üchün tutulghanliqi heqqide resmiy uchurgha érishelmigenlikini éytti. U peqet saqchi dostliridin, bextiyarning ündidaridin mesile chiqqanliqi we dölet mexpiyetlikini ashkarilash gumani bilen tutup tekshürülüwatqanliqini anglighanliqini bildürdi.

Déyilishiche, bir qoli ajiz bolghan bextiyarning méyiplik kinishkisi bar bolup, u özini ayash we tijaritini dexlige uchratmasliq üchün özining bixeterliki mesiliside alahide éhtiyatchan bolup kelgen. Mushu sewebtin uning shiwétsiyediki ikki qérindishi ürümchidiki dadisining ölüm xewirini bextiyardin emes, jem'iyettiki dostliridin uqqan. Emma, shunche éhtiyatchanliqmu, uni 2017-yildin buyan köp sanda Uyghurning béshigha kelgen tutulush qismitidin saqlap qalalmighan.

Mezkur saqchi xadimi bextiyar sadirning ündidaridin chataq chiqqanliqini yoshurmighan bolsimu, emma konkrét qaysi qilmishining dölet mexpiyetlikini ashkarilash gumani qozghighanliqini dep bérelmidi.

Bu yil 46 yashqa kirgen we 3 balining atisi bolghan bextiyar sadirning tutqunda ikenliki delillen'gen bolsimu qaysi qamaqxanida ikenliki we délosining qaysi basquchta ikenliki melum emes.