Ürümchi sheherlik saqchi idarisi: “Janargül jümetayni saybagh rayonluq dölet amanliq etriti tutti”

 Ütken ayning béshida ürümchide turup xelq'a'ara axbaratning ziyaritini qobul qilghan we xelq'ara jama'ettin yardem sorighan jasaretlik qazaq sen'etkar janargül jümetayning ötken jüme küni tutqun qilin'ghanliqi melum bolghan idi. Muxbirimizning ürümchidiki alaqidar saqchi organlirigha qarita élip barghan téléfon ziyaretliri dawamida, janargülning ürümchi saybagh rayonluq j x tarmaq idarisining dölet amanliq etriti teripidin tutqun qilin'ghanliqi delillendi.

Jasaretlik qazaq sen'etkar janargül jümetay, ötken ayning béshida xelq'ara axbaratning ziyaritini qobul qilip, özining we qazaq xelqining béshigha kelgen külpetlerni dunyagha anglatqan idi. Ilgiri 2 yil lagérda yétip chiqqan we shuningdin kéyin yene 3 yil nezerbenttin qutulalmighan janargül xelq'ara axbaratqa qilghan sözide, özining shexsiy telepliridin biri süpitide tartiwélin'ghan pasportini qoligha élip qazaqistan'gha chiqish we u yerde chala qalghan tijariy ishlirini dawamlashturush ikenlikini bayan qilghan idi. Bu telep we shikayetliri üchün béshigha kélidighan herqandaq awarichiliqqa razi kenlikini bildürgen janargül, xelq'ara axbaratchilarning özi bilen izchil alaqe qilishini telep qilghan idi.

Janargül bilen izchil alaqe qilip kéliwatqan chéx jumhuritidiki daniyelik tetqiqatchi runi sténbérg (Rune Stenberg , Uyghurche ismi yüsüpjan) ependining radiyomizgha inkas qilishiche, janargül 10‏-Féwral küni ürümchi nahiyesidiki anisining öyidin tutup kétilgen. Yüsüpjan yollighan awaz xatirisin melum bolushiche, janargül tutup kétilgendin kéyin, uruq-tuqqanliri uning nege ekitilgenliki heqqide hichqandaq uchur alalmighan.

Biz janargülning nöwettiki ehwali, jümlidin nede tutup turuliwatqanliqi heqqide aldi bilen ürümchi sheherlik saqchi idarisigha téléfon qilduq.

Yüsüpjan teminligen söhbet xatirisidin melum bolushiche, yillardin béri uni izchil nazaret qilip kéliwatqan, bolupmu bir aydin béri orunsiz téléfon we söhbetler bilen parakende qilip kéliwatqan saqchi xadimliri, u hedisining öyige kélishi bilenla uni yene aware qilishqa bashlighan. Mezkur tewliktiki bir saqchi xadimi uninggha téléfon qilip, öyide bar-yoqluqini sorighan. Janargül mezkur saqchining orunsiz so'allirgha jawap bérishni ret qilghan.

10‏-Féwral küni chüsh mezgilide ikki neper saqchi xadimi, uninggha yetküzidighan muhim bir uchur barliqini bildürüp, yeni uni öyidin aldap saqchixanigha élip barghan we si'o'al - soraqtin kéyin uni öyige ekilip qoyghan. Kechqurun sa'et 6 mezgilide saqchilar janargül turghan öyge bésip kirip, uni  bélikdin tutup sörigen péti élip chiqip ketken. Uning öy ichidiki kiyimini yenggüshliwélishighimu purset bermigen. Saqchilar uni élip mangghinida uruq-tughqanlirining qoligha héchqandaq qanuniy resmiyet qeghizimu bermigen.

Biz janargülning ürümchi saqchi idarisining qaysi orgini teripidin néme üchün tutulghanliqini aydinglashturush üchün, yene ürümchi sheherlik saqchi idarisigha téléfon qilduq.

Téléfonimizni qobul qilghan xadim, janargülning ürümchi saybagh rayonluq saqchi tarmaq idarisining dölet amanliq saqchiliri teripidin tutulghanliqini delillidi. Emma ajanargülning néme üchün tutulghanliqi heqqide melumat bermidi.

Biz mezkur saqchi xadimidin janargülning nede tutup turuliwatqanliqini soriduq. Gerche mezkur xadim bu heqte éniq jawap bermigen bolsimu, yamaliq saqchixanisigha téléfon qilip béqishimizni tewsiye qilish arqiliq, janargülning yamaliq saqchixanisining qamaqxanisida tutup turuliwatqanliq éhtimaliqini ashkarilidi.