Җаза лагерлири мәсилиси «явропада ирқчилиққа қарши туруш» йиғинида оттуриға қоюлди

Ихтиярий мухбиримиз әкрәм
2019-04-18
Елхәт
Пикир
Share
Принт
Парижда чақирилған «явропада ирқчилиққа қарши туруш» йиғиниға д у қ ниң рәиси долқун әйса әпәнди уйғур райониниң вәзийитини чүшәндүрмәктә. 2019-Йили 17-апрел.
Парижда чақирилған «явропада ирқчилиққа қарши туруш» йиғиниға д у қ ниң рәиси долқун әйса әпәнди уйғур райониниң вәзийитини чүшәндүрмәктә. 2019-Йили 17-апрел.
RFA/Ekrem

Фирансийә пайтәхти парижда чақирилған «явропада ирқчилиққа қарши туруш» йиғиниға дуня уйғур қурултийиниң рәһбәрлириму қатнашқан.

17-Апрел башланған, 19-апрел ахирлишидиған «явропада ирқчилиққа қарши туруш» йиғини фирансийәниң париж шәһиридики истираһәт (холидәй ин) меһманханисида өткүзүлмәктә. Мәзкур йиғинни «явропада ирқчилиққа қарши туруш һәрикити тәшкилати» тәшкиллигән. Йиғинға дуняниң һәрқайси әллиридә ирқчилиққа қарши актип паалийәт елип бериватқан 20 дин артуқ хәлқаралиқ тәшкилатлар қатарида д у қ му тәклип қилинған.

Бу йиғинниң асасий темиси---явропада баш көтүрүватқан милләтчилик вә ирқчилиққа ортақ қарши туруш, дуняниң һәрқайси җайлиридики ирқчилиқ вә милләтчиликни чәкләш йолида тиришчанлиқ көрситиш, көчмәнләрниң бихәтәрликигә капаләтлик қилиш вә уларға ярдәмдә болушниң йоллирини издәштин ибарәт болған.

Бу қетимқи йиғинға алаһидә тәклип билән қатнашқан д у қ рәиси долқун әйса әпәнди йиғинда уйғур диярида давамлишиватқан җаза лагерлири мәсилисини тәпсилий аңлатқан. Долқун әйса йәнә хитай һакимийитиниң ирқчилиқ вә милләтчилик сиясәтлири нәтиҗисидә нөвәттә елип бериливатқан ирқий қирғинчилиқлирини паш қилған.

Долқун әйса әпәндиниң доклатидин кейин йиғин әһли шәрқий түркистан мәсилиси, җүмлидин хитайниң җаза лагерлири сиясити үстидә музакириләр елип барған.

Д у қ рәисиниң билдүрүшичә «явропада ирқчилиққа қарши туруш һәрикити тәшкилати» ниң рәиси бенҗамин әпәнди бу йил 2-айда дуняниң һәрқайси әллиридин болған 380 нәпәр парламент әзалириниң имзасини елиш арқилиқ уйғур дияридики җаза лагерлириға қарши хәлқаралиқ сәпәрвәрлик һәрикити қозғиған икән.

Д у қ рәиси бу қетим йиғин җәрянида һәрқайси әлләрдин кәлгән тәшкилат мәсуллири билән тонушуш, уларға уйғурларниң мәсилисини ичкириләп чүшәндүрүш пурситигә еришкән.

Долқун әйса әпәндиниң баян қилишичә, фирансийә һөкүмити шәрқий түркистандики җаза лагерлири мәсилисигә изчил һалда сүкүт қилиш позитсийәсини тутуп келиватқан бир дөләт болуп, фирансийәдики һәр саһә тәшкилатларниң күчидин пайдилинип фирансийә һөкүмитигә бесим ишлитиш д у қ ниң нөвәттики муһим хизмәтлиридин бири болуп һесаблинидикән.

Пикирләр (0)
Share
Толуқ бәт