Jenwediki b d t bash shtabi aldida xitaygha qarshi zor namayish ötküzüldi

Ixtiyariy muxbirimiz erkin tarim
2019-09-20
Share
Jenwe-Bdt-Namayish-20190920-01.jpeg Jenwediki b d t bash shtabi aldida ötküzülgen xitaygha qarshi zor namayishtin bir körünüsh. 2019-Yili 20-séntebir. Jenwe, shwétsariye .
RFA/Erkin Tarim

Birleshken döletler teshkilati kishilik hoquq aliy kéngishining 42-nöwetlik omumiy yighini chaqiriliwatqan mezgilde bügün, yeni 9-ayning 20-küni dunya Uyghur qurultiyi, tibet teshkilatliri we shwétsariye sherqiy türkistan jem'iyitining birlikte uyushturushi bilen jenwediki birleshken döletler teshkilati binasi aldidiki meydanda kommunist xitay hakimiyitige qarshi keng kölemlik birleshme namayish ötküzüldi.

Shwétsariye waqti sa'et 11:00 de jenwe shehiridiki b d t bash shtabi aldida ötküzülgen namayishqa yawropa döletliridin kelgen ming etrapida Uyghur qatnashti. Mezkur namayishqa Uyghurlardin sirt tibetlikler, xongkongluqlar, mongghullar we jenwediki köpligen xelq'araliq kishilik hoquq teshkilatlirining wekillirimu qatnashti. 

Jenwediki b d t bash shtabi aldini ay-yultuzluq kök bayraqlar qaplidi. Xitaygha qarshi jarangliq sho'ar sadaliri etrapni lerzige saldi.

Yawropa döletlirining hey qaysi jayliridin kelgen Uyghurlar meydanda jem bolup, qollirida ay-yultuzluq kök bayraq, tibet bayriqi we her xil lozunkilarni kötürgen halda “Sherqiy türkistan istiqlal marshi” ni orundash bilen namayishni bashlidi. 

Namayishchilar meydanda xitaygha qarshi türlük sho'arlarni towlap meydanni zilzilige saldi. Ular birdek “Uyghurlar qoghdap qélinsun!”, “Xitay, lagérlarni taqisun!”, “Uyghurlarning milliy ma'aripi qoghdap qélinsun!” dégen'ge oxshash sho'arlarni towlashti. 

Kéyin dunya Uyghur qurultiyining re'isi dolqun eysa b d t bash shtabi aldida bu qétimqi namayishning meqsiti hem ehmiyiti toghrisida nutuq sözlidi. U Uyghurlarni ümidsizlenmeslikke, dewagha aktip qatnishishqa chaqirdi. 

Biz neq meydan'gha téléfon qilip, namayishqa qatnashqan Uyghurlarning tesiratlirini igilesh pursitige érishtuq. D u q diniy ishlar komitétining mudiri turghunjan alawuddin ziyaritimizni qobul qilip, özlirining namayish meydanidiki tesiratlirini bayan qilishti. 

Dunyaning herqaysi döletliridin kelgen Uyghurlar 2018-yili 11-ayning 6-künimu jenwediki b d t bash shtabi aldida xitaygha qarshi zor namayish ötküzüp, xitayni eyibligen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet