Д у қ җиддий йиғин чақирип 5 айлиқ паалийәт пилани түзүп чиқти

Ихтиярий мухбиримиз әркин тарим
2020-07-27
Елхәт
Пикир
Share
Принт
Д у қ рәиси долқун әйса әпәнди(солда) ослодики уйғур җамаити билән бир сорунға җәм болуп, қурултай хизмәтлиридин доклат бәрмәктә. Финландийәдин «әркинлик карвини» ни һәйдәп норвегийә пайтәхти ослоға йетип кәлгән халмурат әпәндиму йиғиға иштирак қилди. 2018-Йили 23-сентәбир, осло.
Д у қ рәиси долқун әйса әпәнди(солда) ослодики уйғур җамаити билән бир сорунға җәм болуп, қурултай хизмәтлиридин доклат бәрмәктә. Финландийәдин «әркинлик карвини» ни һәйдәп норвегийә пайтәхти ослоға йетип кәлгән халмурат әпәндиму йиғиға иштирак қилди. 2018-Йили 23-сентәбир, осло.
RFA/Ekrem

25-Июл күни дуня уйғур қурултийи дуняда актип паалийәт елип бериватқан 70 тин артуқ тәшкилатниң қоллиши билән тәшкилләнгән «шәрқий түркистан тәшкилатлар һәмкарлиқ мунбири» йиғини чақирип, хәлқарадики марка вә чоң ширкәтләрниң уйғур елидики мәҗбурий әмгәктин пайдилинип ишләп чиқарған маллири сетилидиған дуканларниң алдида лозункиларни көтүрүп наразилиқ намайиши өткүзүш, 9-айда бирләшкән дөләтләр тәшкилатида өткүзүлидиған кишилик һоқуқ кеңиши йиғини мәзгилидә җәнвәдә җаза лагерлири мәсилиси, мәҗбури әмгәк мәсилиси тоғрисида рәсим көргәзмиси ечиш, хитай әлчиханилириниң алдида намайиш өткүзүш қатарлиқларни қарарлаштурди.

Син-көрүнүш арқилиқ өткүзүлгән мәзкур йиғинда, һәр қайси дөләтләрдики 170 тәшкилатниң чақириқи билән башланған хитайниң уйғурларни қул қилип ишлитиш сияситини тохтитиш, буниң билән бирликтә хәлқарадики марка вә чоң ширкәтләрниң уйғур елидики мәҗбури әмгәктин пайдилинишни тохтитиш, һәмдә бу марка вә ширкәтләрниң хитайниң уйғурларға елип бериватқан қирғинчилиқ сияситидә хитай билән һәмкарлишишиға хатимә бериш вә бу сиясәт билән четишлиқи бар ширкәтләрни өсүм төләшкә мәҗбурлашқа охшаш алдимиздики 5 ай ичидә қилидиған паалийәтләр тоғрисида музакирә елип берилди. Дуня уйғур қурултийиниң тәшкилий ишларға мәсул муавин рәиси пәрһат юруңқаш әпәндиниң риясәтчиликидә чақирилған син-көрүнүш арқилиқ өткүзүлгән йиғинға дуня уйғур қурултийиниң рәиси долқун әйса әпәнди, иҗраийә һәйити рәиси өмәр қанат әпәнди қатарлиқ һәр қайси әлләрдики бир қисим тәшкилат рәһбәрлири қатнишип сөз қилди. Йиғинда нуқтилиқ һалда дунядики 170 тәшкилатниң чақириқи билән башланған хитайниң мәҗбури әмгәк сияситигә қарши туруш вә бу сиясәт билән четишлиқи бар ширкәтләрни өсүм төләшкә мәҗбурлаш тоғрисида музакирә елип берилип, бундин кейин немиләрни қилиш тоғрисида пилан түзүп чиқилди.

Булардин сирт мәзкур йиғинда 20-21-июл күни канада парламентида өткүзүлгән гуваһлиқ бериш йиғини тоғрисидиму мәлумат берип өтүлди. Д у қ ниң мусапирлар комитети мәсули мәмәт тохти әпәнди бу һәқтә мәлумат берип, канада парламентидики йиғинда нуқтилиқ һалда, хитайниң уйғурларға қарита елип бериватқан сияситини етник қирғинчилиқ дәп қобул қилиш, иккинчиси уйғурларға қандақ ярдәм қилиш?, үчинчиси болса уйғурларға зулум селиватқан хитайни қандақ җазалаш? мәсилиси тоғрисида музакирә елип берилғанлиқини оттуриға қойди.

Мәмәт тохти әпәнди уйғур мәсилисиниң бундин кейин канадада юқири көтүрүлидиғанлиқини, канада һөкүмитиниң уйғурларға тутқан сияситидә йеңи бир бурулуш йүз беридиғанлиқини билдүрди.

Д у қ рәиси долқун әйса әпәнди йиғинда қилған сөзидә корона вируси пәйда болуштин бурун уйғур мәсилисиниң юқири сәвийәдә күнтәртипкә кәлгәнликини, вухәндә вирус оттуриға чиқип қисқа вақит ичидә 180 дөләткә ямрап кәткәндин кейин һәммә дөләтниң өз хәлқиниң дәрди билән болуп уйғур мәсилисиниң дуня күнтәртипидин чүшүп қалғанлиқини, әмдиликтә қайтидин дуняниң күнтәртипигә келишкә башланғанлиқини баян қилди.

Долқун әйса әпәнди йиғин ахирида бу һәқтики зияритимизни қобул қилип, йиғинда нуқтилиқ һалда алдимиздики күнләрдә «шәрқий түркистан тәшкилатлар һәмкарлиқ мунбири» гә әза тәшкилатлириниң дуняниң һәрқайси җайлирида елип бармақчи болған паалийәтлирини бәлгиләп чиққанлиқини тәкитләп мундақ деди: «биз бүгүнки йиғинда төвәндики паалийәтләрни елип беришни қарар қилдуқ. 1. Хәлқарадики марка вә чоң ширкәтләрниң уйғур елидики мәҗбурий әмгәктин пайдилинип ишләп чиқарған маллири сетилидиған дуканларниң алдида лозункиларни көтүрүп наразилиқ намайиши өткүзмәкчи. Иккинчиси болса 9-айниң 21-күнидин 27-күнигичә бирләшкән дөләтләр тәшкилатида өткүзүлидиған кишилик һоқуқ кеңиши йиғини мәзгилидә җәнвәдә җаза лагерлири мәсилиси, мәҗбурий әмгәк мәсилиси тоғрисида рәсим көргәзмиси ечип дуня җамаәтчиликиниң диққәт-етибарини йәнә бир қетим бу мәсилиләргә тартмақчи. Үчинчи муһим паалийәт 10-айниң 1-күни хитайниң дөләт байримида тибәт, хоңкоң вә тәйвән аммиви тәшкилатлири билән бирликтә 100 әтрапида дөләттики хитай әлчиханисиниң алдида намайиш өткүзмәкчи».

Түркийәдә паалийәт елип бериватқан шәрқий түркистан тәшкилатлар бирлики рәиси һидайәтулла оғузхан әпәнди бу йиғинда елинған қарарни түркийәдики шәрқий түркистан аммиви тәшкилатлирила әмәс түрк тәшкилатлири билән бирликтә орунлашқа тиришидиғанлиқини оттуриға қойди.

Дуня уйғур қурултийиниң чақириқи билән 26-март күни америка, канада, австралийә, японийә, түркийә, норвегийә, шиветсийә, финландийә, белгийә, фирансийә, шиветсийә, австралийә, германийә, әнглийә, голландийә, қазақистан, қирғизистан қатарлиқ дөләтләрдә актип паалийәт елип бериватқан уйғур тәшкилатлириниң қоллиши вә қатнишиши билән «шәрқий түркистан тәшкилатлар һәмкарлиқ мунбири» қурулғаниди.

Пикирләр (0)
Share
Толуқ бәт