D u q jiddiy yighin chaqirip 5 ayliq pa'aliyet pilani tüzüp chiqti

Ixtiyariy muxbirimiz erkin tarim
2020-07-27
Élxet
Pikir
Share
Print
D u q re'isi dolqun eysa ependi(solda) oslodiki Uyghur jama'iti bilen bir sorun'gha jem bolup, qurultay xizmetliridin doklat bermekte. Finlandiyedin "Erkinlik karwini" ni heydep norwégiye paytexti oslogha yétip kelgen xalmurat ependimu yighigha ishtirak qildi. 2018-Yili 23-séntebir, oslo.
D u q re'isi dolqun eysa ependi(solda) oslodiki Uyghur jama'iti bilen bir sorun'gha jem bolup, qurultay xizmetliridin doklat bermekte. Finlandiyedin "Erkinlik karwini" ni heydep norwégiye paytexti oslogha yétip kelgen xalmurat ependimu yighigha ishtirak qildi. 2018-Yili 23-séntebir, oslo.
RFA/Ekrem

25-Iyul küni dunya Uyghur qurultiyi dunyada aktip pa'aliyet élip bériwatqan 70 tin artuq teshkilatning qollishi bilen teshkillen'gen "Sherqiy türkistan teshkilatlar hemkarliq munbiri" yighini chaqirip, xelq'aradiki marka we chong shirketlerning Uyghur élidiki mejburiy emgektin paydilinip ishlep chiqarghan malliri sétilidighan dukanlarning aldida lozunkilarni kötürüp naraziliq namayishi ötküzüsh, 9-ayda birleshken döletler teshkilatida ötküzülidighan kishilik hoquq kéngishi yighini mezgilide jenwede jaza lagérliri mesilisi, mejburi emgek mesilisi toghrisida resim körgezmisi échish, xitay elchixanilirining aldida namayish ötküzüsh qatarliqlarni qararlashturdi.

Sin-körünüsh arqiliq ötküzülgen mezkur yighinda, her qaysi döletlerdiki 170 teshkilatning chaqiriqi bilen bashlan'ghan xitayning Uyghurlarni qul qilip ishlitish siyasitini toxtitish, buning bilen birlikte xelq'aradiki marka we chong shirketlerning Uyghur élidiki mejburi emgektin paydilinishni toxtitish, hemde bu marka we shirketlerning xitayning Uyghurlargha élip bériwatqan qirghinchiliq siyasitide xitay bilen hemkarlishishigha xatime bérish we bu siyaset bilen chétishliqi bar shirketlerni ösüm töleshke mejburlashqa oxshash aldimizdiki 5 ay ichide qilidighan pa'aliyetler toghrisida muzakire élip bérildi. Dunya Uyghur qurultiyining teshkiliy ishlargha mes'ul mu'awin re'isi perhat yurungqash ependining riyasetchilikide chaqirilghan sin-körünüsh arqiliq ötküzülgen yighin'gha dunya Uyghur qurultiyining re'isi dolqun eysa ependi, ijra'iye hey'iti re'isi ömer qanat ependi qatarliq her qaysi ellerdiki bir qisim teshkilat rehberliri qatniship söz qildi. Yighinda nuqtiliq halda dunyadiki 170 teshkilatning chaqiriqi bilen bashlan'ghan xitayning mejburi emgek siyasitige qarshi turush we bu siyaset bilen chétishliqi bar shirketlerni ösüm töleshke mejburlash toghrisida muzakire élip bérilip, bundin kéyin némilerni qilish toghrisida pilan tüzüp chiqildi.

Bulardin sirt mezkur yighinda 20-21-iyul küni kanada parlaméntida ötküzülgen guwahliq bérish yighini toghrisidimu melumat bérip ötüldi. D u q ning musapirlar komitéti mes'uli memet toxti ependi bu heqte melumat bérip, kanada parlaméntidiki yighinda nuqtiliq halda, xitayning Uyghurlargha qarita élip bériwatqan siyasitini étnik qirghinchiliq dep qobul qilish, ikkinchisi Uyghurlargha qandaq yardem qilish?, üchinchisi bolsa Uyghurlargha zulum séliwatqan xitayni qandaq jazalash? mesilisi toghrisida muzakire élip bérilghanliqini otturigha qoydi.

Memet toxti ependi Uyghur mesilisining bundin kéyin kanadada yuqiri kötürülidighanliqini, kanada hökümitining Uyghurlargha tutqan siyasitide yéngi bir burulush yüz béridighanliqini bildürdi.

D u q re'isi dolqun eysa ependi yighinda qilghan sözide korona wirusi peyda bolushtin burun Uyghur mesilisining yuqiri sewiyede küntertipke kelgenlikini, wuxende wirus otturigha chiqip qisqa waqit ichide 180 döletke yamrap ketkendin kéyin hemme döletning öz xelqining derdi bilen bolup Uyghur mesilisining dunya küntertipidin chüshüp qalghanliqini, emdilikte qaytidin dunyaning küntertipige kélishke bashlan'ghanliqini bayan qildi.

Dolqun eysa ependi yighin axirida bu heqtiki ziyaritimizni qobul qilip, yighinda nuqtiliq halda aldimizdiki künlerde "Sherqiy türkistan teshkilatlar hemkarliq munbiri" ge eza teshkilatlirining dunyaning herqaysi jaylirida élip barmaqchi bolghan pa'aliyetlirini belgilep chiqqanliqini tekitlep mundaq dédi: "Biz bügünki yighinda töwendiki pa'aliyetlerni élip bérishni qarar qilduq. 1. Xelq'aradiki marka we chong shirketlerning Uyghur élidiki mejburiy emgektin paydilinip ishlep chiqarghan malliri sétilidighan dukanlarning aldida lozunkilarni kötürüp naraziliq namayishi ötküzmekchi. Ikkinchisi bolsa 9-ayning 21-künidin 27-künigiche birleshken döletler teshkilatida ötküzülidighan kishilik hoquq kéngishi yighini mezgilide jenwede jaza lagérliri mesilisi, mejburiy emgek mesilisi toghrisida resim körgezmisi échip dunya jama'etchilikining diqqet-étibarini yene bir qétim bu mesililerge tartmaqchi. Üchinchi muhim pa'aliyet 10-ayning 1-küni xitayning dölet bayrimida tibet, xongkong we teywen ammiwi teshkilatliri bilen birlikte 100 etrapida dölettiki xitay elchixanisining aldida namayish ötküzmekchi".

Türkiyede pa'aliyet élip bériwatqan sherqiy türkistan teshkilatlar birliki re'isi hidayetulla oghuzxan ependi bu yighinda élin'ghan qararni türkiyediki sherqiy türkistan ammiwi teshkilatlirila emes türk teshkilatliri bilen birlikte orunlashqa tirishidighanliqini otturigha qoydi.

Dunya Uyghur qurultiyining chaqiriqi bilen 26-mart küni amérika, kanada, awstraliye, yaponiye, türkiye, norwégiye, shiwétsiye, finlandiye, bélgiye, firansiye, shiwétsiye, awstraliye, gérmaniye, en'gliye, gollandiye, qazaqistan, qirghizistan qatarliq döletlerde aktip pa'aliyet élip bériwatqan Uyghur teshkilatlirining qollishi we qatnishishi bilen "Sherqiy türkistan teshkilatlar hemkarliq munbiri" qurulghanidi.

Toluq bet