Мәрһум абдулһәким муһәммәд қурбан дамоллам үчүн истанбулда ғайибанә җиназа намизи оқулди

Ихтиярий мухбиримиз арслан
2019-07-02
Елхәт
Пикир
Share
Принт

6-Айниң 30-күни истанбулда хитай түрмисидә вапат болғанлиқи илгири сүрүлгән абдулһәким муһәммәд қурбан дамоллам үчүн ғайибанә җиназа намизи оқулди. Шәрқий түркистан өлималар бирлики җәмийити тәрипидин уюштурулған бу ғайибанә җиназа намизиға истанбулда яшаватқан уйғурлардин көп санда киши қатнашти.

Ғайибанә җиназа намизи оқулғандин кейин шәрқий түркистан өлималар бирликиниң рәиси доктор атавуллаһ шәһяр сөз қилип, мәрһум абдулһәким муһәммәд қурбан дамолламниң һаят иш-излири тоғрисида тохталди.

Кейин йәнә җамаәт әрбаби абдулқадир япчан сөз қилип, хотәндә өткән бүйүк диний алим муһәммәд қурбан дамолламни вә униң оғли абдулһәким дамолламни хитай даирилириниң шеһит қилғанлиқини билдүрди һәмдә хитай даирилириниң уйғурлар үстидин йүргүзүватқан бастуруш сиясәтлирини тәнқид қилди.

У мундақ деди: «бүгүн абдулһәким муһәммәд қурбан дамоллам қатарлиқ икки нәпәр шеһитимизниң ғайибанә җиназа намизини оқудуқ. Бундақ һадисиләр хитай шәрқий түркистанни ишғал қилғандин башлап давам қилип кәлмәктә. Уйғурлар хитайниң зулумиға қарши күрәш җәрянида аз болмиған риязәт вә күлпәтләргә, шундақла қурбан беришләргә учрап кәлди. Күрәшниң тәбиити мана мушундақ болиду. Бүгүн икки шеһитимизниң ғайибанә җиназа намизини қилдуқ. Буниңдин илгири муһәммәд салиһ дамоллам, абдуләһәд мәхсум һаҗим, керәм қарим қатарлиқ алимлиримизниң ғайибанә җиназа намизини оқуған идуқ. Булар вәтән, хәлқниң мәвҗутлуқини қоғдаш йолида чоң хизмәт көрсәткән алимлар иди. Бир милләтниң алими демәк бир милләтниң вәтини дегәнликтур, бир милләтниң сиясий ирадиси демәктур».

Ахирида доктор атавуллаһ шәһярниң қол көтүрүши билән мәрһум абдулһәким муһәммәд қурбан дамоллам қатарлиқ пүткүл шеһитларниң роһиға атап дуа қилинди.

Мәрһум абдулһәким муһәммәд қурбан дамоллам тоғрисида шәрқий түркистан өлималар бирлики тәрипидин рәсмий торбетидә бир тәзийә вә баянат елан қилинди.

Баянатта билдүрүлүшичә, мәрһум абдулһәким муһәммәд қурбан дамоллам хотәнниң мәшһур ислаһатчи алимлиридин бири болған муһәммәд қурбан дамолла һаҗимниң оғли болуп, 1970-йили туғулған. Дадиси муһәммәд қурбан дамолла һаҗимму 5 йиллиқ һаятини хитай зинданлирида өткүзгәндин кейин юрти хотәнгә қайтип берипла диний хизмәткә киришип кәткән һәмдә мәшһур нурлуқ мәсчитини бина қилишқа зор күч чиқарған. У шу мәсчитниң өзидә имам-хатиплиқ қилиш вә талипларға дәрс өтүш билән һаятини өткүзгән бүйүк алим иди. Абдулһәким дамоллам дадисида оқуп диний алим болған һәмдә дадисиниң вапатидин кейин нурлуқ мәсчитигә дадисиниң орниға избасар болуп хатиплиққа тәйинләнгән. Бу җәрянда мәсчитниң җамаити бәк көпийип кәткәнликтин хитай һакимийити униң хутбилириға диққәт қилишқа башлиған. Кейин у «дөләтни парчилашқа қутратқулуқ қилди» дегән төһмәт билән 1999-йили 11-айниң 15-күни 29 йешида тутуп кетилгән. Тутулуп узун өтмәй 15 йиллиқ қамаққа һөкүм қилинип, уйғур аптоном районлуқ 4-түрмигә қамалған. 2014-11-Айниң 15-күни, 15 йилни толуқ тошқузуп, 44 йешида зиндандин чиққан болсиму, йәнила һазирқи барлиқ уйғур хәлқигә охшашла әркинликтин мәһрум һалда өйигә нәзәрбәнд қилинип, 2017-йилиғичә җәмийәттин айрилип яшашқа мәҗбур қилинған. 2017-Йили 7-айда милйонларчә бигунаһ инсанлар лагерларға қамалған вақитта абдулһәким дамолламму қайта тутуп кетилгән һәмдә лагерға әвәтилмәстин, биваситә 10 йиллиқ қамаққа һөкүм қилинған.

Мәрһумини йеқиндин тонуйдиған шәрқий түркистан өлималар бирликиниң мәсуллиридин абдуләһәд оҗатли әпәнди абдулһәким муһәммәд қурбан дамолламниң һаяти вә иш-излирини тонуштуруп өтти.

У мәрһум абдулһәким муһәммәд қурбан дамолламниң вапат болғанлиқиниң хәвириниң растлиқини тәстиқлап мундақ деди: «бу йил рамизан ейиниң ахирлири дамолламниң түрмидә шеһит қилинғанлиқ хәвири тарқалған болсиму, ишәнчлик мәнбә яки аилисидин бу шум хәвәрниң раст-ялғанлиқи һәққидә мәлумат болмиған иди. 2019-Йили 28-июн абдулһәким дамолламниң түркийәдә турушлуқ оғли вә башқа туғқанлири арқилиқ бу шум хәвәрниң растлиқи, дамолламниң 49 йешида хитай зинданлирида һаятидин айрилғанлиқи ениқланди. Аллаһ мәрһумға шеһитлик мақамини бәрсун! гунаһлирини мәғпирәт қилсун! җәннәтулфирдәвстин орун бәрсун!»

Пикирләр (0)
Share
Толуқ бәт