Ghuljadiki kan örülüsh weqeside yer astida qalghan 18 kishining köpinchisining Uyghur ikenliki melum bolmaqta

Xitay axbarati ghulja nahiyesining qarayaghach yézisigha jaylashqan xitayning “Gherbiy diyar altun kan ili cheklik mes'uliyet shirkiti” ning yer asti kanida 24 ‏-dikabir küni kan örülüsh weqesi yüz bergenliki, weqede 18 neper ishchining kan astida qapsilip qalghanliqi xewer qilin'ghan idi. Muxbirimizning ghuljadiki alaqidar organlargha qarita élip barghan téléfon ziyaretliri dawamida, mezkur 18 neper kishining köpinchisining Uyghur ikenliki melum boldi. Éniqlishimizche, qutquzush herkiti nöwette 5‏-künige qedem qoyghan bolsimu, emma kan astigha qapsilip qalghan ishchilardin birersiningmu téxi qu'utuldurulalmighanliqi ashkarilandi.

Xitayning hökümet xewerliride, ghulja nahiyeside kan örülüsh weqesi yüz bergende, kan astida jem'y 40 kishi barliqi, bulardin 22 nepirining shu küni qutquzulghanliqi, emma qalghan 18 nepirning kan astida qapsilip qalghanliqi xewer qilin'ghan idi. Weqe yüz bergen kanning sahibi bolghan “Gherbi diyar altun kan cheklik mes'uliyet shirkiti” ning bir xadimi, mezkur qutquzush herkiti bügün 5‏-künige qedem qoyghan bolsimu, emma qutquzushning yenila dawamlishiwatqanliqini ashkarilidi.

Uning bayanliridin melum bolushiche, nöwette mezkur shirkettiki barliq xadimlar, aldinqi sepke, yeni örülgen kan astida qapsilip qalghan kishilerni qutquzush herkitige qatnashqan. Emma ta hazirghiche kan astigha qapsilip qalghan ishchilardin birerining qutuldurulghanliqi heqqide özlirige héchqandaq jawap kelmigen.

stc-new.8531.cn

Téléfonimizni qobul qilghan ghulja nahiyilik xelq doxturxanisining bir xadimimu, mezkur doxturxanidiki jiddiy qutquzush bölümi xadimlirining neq meydan'gha ketkenliki, özlirining bolsa élip kélini'ish éhtimaghli bolghan yaridarlarni kütüp turuwatqanliqi, emma hazirghiche birmu yaridraning bu doxturxanigha ekilinmigenlikini bayan qildi.

Yoquriqi bu melumatlardin qutquzush herkitining hélihem dawam qiliwatqanliqi, emma héchbir netije bolmaywatqanliqi melum bolmaqta. Biz alaqidar xadimlardin örülgen kanning kölimi, sewebi, kan astida ishlewatqan ishchilarning kimlikliri, bolupmu millet teweliki heqqide melumat soriduq. Xadimlardin beziliri bu melumatlardin xewersizlikini éytsa, yene beziliri bu uchurlarni ashkarilashqa bolmaydighanliqini bayan qildi. Mezkur kan jaylashqan ghulja nahiye qarayaghach yézisining yéza bashliqi, bu so'allargha peqet hükümetning testiqini alghandin kéyinla jawap béreleydighanliqini bildürdi.

Ilgiriki éniqlashlirimizda, qariyaghach yézisdiki kömür we altun kanlirida éghir jismaniy ishlarni töwen ish heqqi bilen yerlik ahaliler, yeni Uyghurlar qilidi'aghanliqi melum bolghan idi. Shunga biz bu qétimliq éniqlashlirimiz dawamida, mezkur 18 kishining millet teweliki heqqide yerlik da'irilerdin nuqtiliq melumat soriduq.

Mezkur altun kan shirkitining xadimi bu heqtiki so'alimizgha jawaben, 18 kishi ichide Uyghur we xenzudin ibaret her ikki millet kishilirining barliqini tilgha aldi. Biz uninggha qarayaghach yézisining Uyghurlar olturaqlashqan yéza ikenlikni eskertip, “Bu 18 kishining köpinchisi Uyghurmu?” dep sorighinimizda, u: “Shundaq” dep jawab berdi. Biz bu xadimdin ularning isimlirini sorighinimizda, u bu heqte yerliktin, yeni ghulja nahiyelik partkom teshwiqat bölümidin melumat élshimizni tewsiye qildi.

Ili oblastliq jiddiy qutquzush mulazimet shirkitining bir xadimimu, qutquzushning téxiche dawam qiliwatqanliqini bayan qilish bilen birlikte, kan astida qalghan 18 kishining mutleq köpinchisining Uyghur ishchilar ikenlikini ashkarilidi.

Yuqurida, ghulja nahiyesidiki kan örülüsh weqeside yer astida qalghan we izdiliwatqan 18 kishining köpichisining Uyghur ikenliki heqqide melumat berduq.