Ghuljada kan astida qapsilip qalghan Uyghurlardin az dégende ikki nepirining ösmür ikenliki ashkarilandi

Aldinqi künidiki éniqlashlirimizda ghuljada 24‏-dikabir küni yüz bergen kan örülüsh weqeside yer astida qalghan we izdiliwatqan 18 kishining köpinchisi Uyghur ikenliki ashkarilan'ghan idi. Muxbirimizning bügünki éniqlashliri dawamida, mezkur 18 kishidin 3 kishining kimlikliri aydinglashti. Ulardin ikki nepirining buningdin ikki yil igiri 16 yash we 17 yash waqitlirida, yeni téxi qoramigha yetmigen waqtida ishchiliqqa qobul qilin'ghanlar balilar ikenliki melum boldi.

“Beydu” uchur ambirida tonushturulishiche, gherbiy diyar ili altun kan cheklik mes'uliyet shirkiti 1993‏-yili qurulghan bolup, shirketning omumi ishchi-xizmetchisi 672 neper؛ buning 333 nepiri, yeni 49.56 Pirsenti xitay bolmighan yerlik milletlerdin iken.

Biz kan astida qapsilip qalghan 18 kishining kimliklirini aydinglashturush üchün, bügün yene Uyghur aptonum rayonluq jiddiy ishlarni bashqurush nazariti (新疆维吾尔自治区应急管理厅) gha téléfon qilduq. Alaqidar xadim weqe yüz bergen kandiki qutquzush herkitining bügün 6‏-künige qedem qoyghanliqini we qapsilip qalghanlarni izdeshning dawam qiliwatqanliqini melum qildi. Biz mezkur xadimdin qapsilip qalghan 18 kishining milliy tewelikini sorighinimizda, u buninggha derhal jawap bérelmidi. U ishxanisdiki bashqa xadimlar bilen meslihetleshkendin kéyin, bu heqte Uyghur aptonum rayonluq partkom teshwiqat bölümi teyyarlighan mexsus matériyaldin paydillinishimizni tewsiye qildi.

“Beydu” toridiki alaqidar uchurlarda mezkur shirketning ghulja nahiyisining qarayaghach yézisi we uning etrapidin 2038 mo zéminni igiligenliki qeyt qilin'ghan. Biz mezkur xadimdin kanning örülgen qismining kölimi, yeni qanche mo yaki qanche kuwadrirat métir jayining gümürülüp chüshkenlikini soriduq. U bu heqtiki so'alimizghimu jawap bérelmidi. Mezkur nazarettiki yene bir xadim, qapsilip qalghanlarning kimlikliri heqqidiki so'alimizgha jawaben, bu heqtiki uchurlarni aptonum rayonluq partkom teshwiqat bölümidin sorishimizni tewsiye qildi.

Téléfonimizni qobul qilghan Uyghur aptonum rayonluq partkom teshwiqat bölümining bir xadimi, deslepte özlirining bu weqedin xewiri yoqluqini éytti, arqidin özlirining bu ishqa mes'ul emeslikini, téléfonimizning özlirige xata urulghanliqini bayan qilip, so'allirimizni jawapsiz qaldurdi.

Xitayning altun kan sahesige a'it bir torbette xewer qilinishiche, mezkur shirket 2020‏-yili xoten wilayitining kériye nahiyesi bilen qizilsu oblastining aqtu nahiyeliridin “Namaratlargha yardem bérish” namida 25 neper ishchini yötkep ekelgen iken.

Mezkur shirket yene ghulja nahiyesining onyar baziri bölükey kentige qaritamu atalmish “Namratlarni yölesh” pa'aliyiti élip barghan.

Biz mezkur altun kan jaylashqan ghulja nahiyesining qarayaghach yézisidiki yerlik wezipidarlargha téléfon qilip, kan örülüsh weqesidi'in özlirige kelgen ziyan-zexmet heqqide melumat soriduq. Mezkur yézining 1‏-kent amanliq mudiri, özining neq meyadan'gha, yeni weqe yüz bergen kan'gha barmighanliqi, emma bir qisim uchurlardin xewerdar ikenlikini éytti. Uning déyishiche, iz-dériki élinmaywatqan 18 kishi ichide, u mes'ul kenttin 4 kishi bar iken. Bularning kenttiki namrat a'ile ezaliri ikenlikini eskertken bu xadim, mezkur 4 kishidin ikki nepirining bu yil 18 we 19 yash ikenliki, yene birining bolsa 51 yash ikenlikini ashkarilidi. U yene mezkur ikki yashning bu kan'gha ishqa chüshken 2020‏-yili 16 we 17 yashlardiki yash qoramigha toshmighan ösmür ikenlikini eskertti.

Ilgiriki éniqlashlrimizda, ghulja nahiyesining qarayaghach yézisigha makanlashqan xitayning chingxu'a éléktir we kömürkan shirketlirining teweliktiki yerlik ahalilerge yardem bérish uyaqta tursun, eksinche ularni térilghu yerliridin mehrum qaldurghanliqi, yerlik ahalilerni 3 qétim köchüshke mejburlighanliqi we ularning ata-bowiliridin qalghan bagh-waranlirini weyran qilghanliqini pash bolghan idi.