1-Öktebir norwégiye we kanadada xitaygha qarshi birleshme namayish ötküzüldi

Muxbirimiz méhriban
2019-10-01
Élxet
Pikir
Share
Print
Kanadada ötküzülgen birleshme naraziliq namayishidin bir körünüsh. 2019-Yili 1-öktebir.
Kanadada ötküzülgen birleshme naraziliq namayishidin bir körünüsh. 2019-Yili 1-öktebir.
Tuyghunjan ependi teminligen

Shimaliy yawropagha jaylashqan norwégiyede 1-öktebir xitay kommunist hökümitining 70 yilliq dölet bayrimi künidiki xitaygha qarshi birleshme naraziliq namayishi ötküzüldi.

Norwégiye Uyghur komitétidin semet abla ependi namayish meydanidin melumat bérip, norwégiyediki xitaygha qarshi birleshme namayishning norwégiye paytexti oslodiki xitay elchixanisi aldida élip bérilghanliqini we namayishning ünümi nahayiti yaxshi bolghanliqini bildürdi.

Semet abla ependi 1-öktebirdiki naraziliq namayishining norwégiyede 2008-yildin buyan hemkarliship pa'aliyet élip bériwatqan Uyghur, tibet teshkilatliridin bashqa, yéngidin qorulghan xongkong teshkilati we wiyétnam teshkilatining öz-ara hemkarliqida birlikte ötküzülgen pa'aliyetlerning biri ikenlikini tekitlep, buningdin kéyin bu teshkilatlarning bu xil hemkarliq pa'aliyetlirining yenimu köpiyidighanliqini bildürdi.

Namayishqa qatnashqan xongkong komitéti lidéri jésika chu xanimmu ziyaritimizni qobul qildi.

U 1-öktebirdiki birleshme namayishning meqsitini tekitlidi.

U mundaq dédi: "Men xongkong komitéti lidéri jésika chu bolimen. Bügün xitayning 1-öktebir dölet bayrimi künide biz norwégiye paytexti oslodiki xitay elchixanisi aldida, norwégiye Uyghur komitétining teshkillishide, tibet, xongkong, wiyétnam teshkilatliri birlikte xitaygha qarshi birleshme naraziliq namayishi ötküzüwatimiz. Biz bu yerde yeni norwégiyediki birqanche teshkilatlar birlikte xitaygha qarshi naraziliqimizni ipadilewatimiz. Biz öz tupraqlirimizdiki xelqler üchün démokratiye we erkinlik telep qiliwatimiz." dédi.

Norwégiyediki birleshme naraziliq namayishqa qatnishiwatqan tibet pa'aliyetchisi tsomo swénningsén xanimmu ziyaritimizni qobul qildi.

Tsomo swénningsén xanim bayanida 1-öktebir küni norwégiyediki Uyghur, tibet, xongkong we wiyétnamliqlarning birleshme namayish ötküzüsh arqiliq, xitay hökümitining 70 yildin buyanqi zorawan basturushigha qarshi naraziliqini ipadilewatqanliqini bildürüp, xitay kommunist hökümitining kommunizm tüzümi astida ötken 70 yilning tebriklinishi emes belki uning bu zémindiki xelqlerge élip kelgen ziyankeshliki dunyagha anglitilishi kéreklikini tekitlidi.

1-Öktebir küni kanadada élip bérilghan xitaygha qarshi naraziliq namayishimu, kanada sherqiy türkistan birleshme jem'iyitining teshkillishi, kanadadiki tibet, xongkong, xitay démokratliri we wiyétnamliqlarning hemkarliqida élip bérildi.

Kanada sherqiy türkistan birleshmisining re'isi tuyghun abduweli ependi ziyaritimizni qobul qildi.

Uning bildürüshiche, 1-öktebirdiki xitaygha qarshi birleshme naraziliq namayishi, kanada waqti etigen sa'et 11-din chüshtin kéyin sa'et 2 giche kanadaning toronto, montériyal qatarliq birqanche shehiridiki xitay konsulxanisi aldida birla waqitta élip bérilghan.

Tuyghun abduweli ependi kanadada ötküzülgen birleshme namayishning ehmiyiti heqqide toxtilip, bundaq birleshme namayishning kanada hökümitining Uyghur mesilisi we xitaydiki kishilik hoquq depsendichiliki mesiliside xitaygha qaratqan siyasitide bésim peyda qilishta ünümi bolidighanliqini bildürdi.

Birleshme namayishqa qatnashqan kanada tibet jem'iyitining bashliqi sonnam xanimmu ziyaritimizni qobul qildi.

Sonnam xanim bu qétimliq namayishni kanada sherqiy türkistan birleshmisi teshkilligenlikini bildürüp, xitay kommunist hakimiyiti teripidin bésiwélin'ghan zéminlarda yashawatqan Uyghurlar we tibetlerning 70 yildin buyan, xitay hökümitining basturushi we ézishigha uchrighan bolsimu, emma öz erkinliki üchün küresh qilip kelgenlikini bildürdi. U, kanadadek démokratik döletlerdiki Uyghur, tibet xelqlirining bir septe turup, xitay hökümitini eyiblishi we ana yurtlirida boluwatqan basturulush weziyitini mushundaq birleshme namayishlardin paydilinip, kanada xelqi we hökümiti hem dunyagha dawamliq anglitishning muhim ehmiyetke ige ikenlikini tekitlidi.

Kanadadiki birleshme namayishqa qatnashqan wiyétnamliq pa'aliyetchimu ziyaritimizni qobul qilip, özining néme üchün bu namayishqa qatnashqanliqini bildürdi.

U mundaq dédi: "Méning bu namayishqa qatnishishimdiki seweb, biz xitaygha qarshi hemkarliqta we bir septe turushimiz we naraziliqimizni ipadilishimiz kérek dep qaraymen. Chünki, biz hemmimiz xitay xelq jumhuriyitining ortaq ézishigha uchrawatimiz. Men qizil xitayni yawuz hakimiyet dep bilimen. Chünki, biz wiyétnamliqlar, sherqiy türkistanliqlar, tibetler, mongghullar we xongkongluqlar hemmimizning heq-hoquqliri xitay hakimiyitining depsende qilishigha uchrawatidu. Shunga biz bir septe turushimiz, birleshme küchimiz arqiliq xitay hökümitige qarshi turushimiz kérek dep qaraymen."

Melum bolushiche, xitay kommunist hökümiti dölet ichide, özining 70 yilliq hökümranliqini qutluqlawatqan 1-öktebir küni yene xongkong, teywen we gherb démokratik döletliridiki xitaygha qarshi öktichi teshkilatlarning uyushturushida yer shari xaraktérlik naraziliq namayishliri élip bérilghan.

Toluq bet