Канададики аммивий тәшкилатлар гвиллимбури шәһри билән шихәнзә шәһири оттурисидики «достлуқ» қа наразилиқ билдүрди

Мухбиримиз меһрибан
2019-11-08
Елхәт
Пикир
Share
Принт
Канада шәрқий түркистан җәмийитиниң башчилиқида «канада коммунизимға қарши тәшкилатлар бирлики» гә әза тәшкилатларниң вәкиллири канададики гвиллимбури шәһри билән шихәнзә шәһири оттурисида 21 йилдин буян давамлишип келиватқан «достлуқ мунасивити» гә наразилиқ билдүргән. 2019-Йили 7-ноябир. Гвиллимбури, канада.
Канада шәрқий түркистан җәмийитиниң башчилиқида «канада коммунизимға қарши тәшкилатлар бирлики» гә әза тәшкилатларниң вәкиллири канададики гвиллимбури шәһри билән шихәнзә шәһири оттурисида 21 йилдин буян давамлишип келиватқан «достлуқ мунасивити» гә наразилиқ билдүргән. 2019-Йили 7-ноябир. Гвиллимбури, канада.
Tuyghun Abduweli teminligen.

Канада шәрқий түркистан җәмийитиниң башчилиқида «канада коммунизимға қарши тәшкилатлар бирлики» гә әза тәшкилатларниң вәкиллири канададики гвиллимбури шәһри билән шихәнзә шәһири оттурисида 21 йилдин буян давамлишип келиватқан «достлуқ мунасивити» гә наразилиқ билдүргән.

Канада шәрқий түркистан җәмийитиниң башлиқи туйғун абдувәли әпәндиниң билдүрүшичә, улар бу йил 3-айдин башлап, канада шәрқий түркистан җәмийити намидин гвиллимбури шәһәр башлиқиға арқа-арқидин икки хетим наразилиқ хети әвәткән. Әмма шәһәрлик һөкүмәт уларниң наразилиқ хетигә җавап қайтурмиғанлиқи үчүн бу қетим канада шәрқий түркистан җәмийитиниң башчилиқида канададики «коммунизимға қарши тәшкилатлар бирлики» гә әза болған қалған 6 тәшкилат вәкиллири 7-ноябир күни гвиллимбури шәһәрлик һөкүмәткә берип, 3-қетимлиқ наразилиқ хетини тапшурған. Мәктубни шәһәр башлиқи вирҗинийә хаксонниң ярдәмчиси тапшуруп алған. 

Гвиллимбури шәһәр башлиқиниң ярдәмчисигә тапшуруп берилгән наразилиқ хети икки парчә болуп, бири канада шәрқий түркистан җәмийитиниң башлиқи туйғун абдувәли әпәндиниң шәхсий намидин шәһәр башлиқи виргинийә хаксон ханимға йезилған. Йәнә бир парчә хәт «канада коммунизимға қарши тәшкилатлар бирлики» намидин канада шәрқий түркистан җәмийитиниң тәлипини қоллаш мәктуби икән.

Һәр икки парчә мәктубта хитай һөкүмитиниң 2015-йилниң ахири башланған, 2017-йилдин кейин җиддий елип берилған уйғурларни лагерларға қамаш һәркитидә 3 милйонға йеқин уйғур вә башқа йәрлик хәлқләрниң йиғивелиш лагирлириға қамалғанлиқи, шихәнзә шәһириниң өзидә 7 орунда бу хилдики лагерларниң мәвҗутлуқи, мушундақ әһвалда канаданиң гвиллимбури шәһириниң шихәнзә шәһри билән «дост шәһәр» мунасивитини давамлаштурушиниң кишилик һоқуққа хилап қилмиш һесаблинидиғанлиқи, буниңға қарита әпсуслуқ вә наразилиқ билдүридиғанлиқи баян қилинған. Мәктубта шәһәр башлиқи виргинийә хаксондин икки шәһәр оттурсидики сода мунасивәтләрдә уйғурлар мәсилисини оттуриға қоюшини, әгәр хитай һөкүмити уларниң пикиррлиригә қулақ салмиса, гвиллимбури шәһириниң шихәнзә шәһири билән болған достлуқ мунасивитини үзүши лазимлиқи чақириқ қилинған. 

Туйғун әпәнди йәнә канада шәрқий түркистан җәмийитигә вакалитән өз имзалиқида йезилған хәтниң толуқ тәпсилати һәққидә тохталди.

7-Ноябир күнидики гвиллимбури шәһәр башлиқиға наразилиқ хети тапшуруш паалийтигә қатнашқан шең шө ханимму радийомиз зияритини қобул қилди.

Шең шө ханимниң билдүрүшичә, канада шәрқий түркистан җәмийитиниң башчилиқида «канада коммунизимға қарши тәшкилатлар бирлики» гә әза тәшкилатлардин «хитай демократлар федератсийони», «бир аваз бир дуня» тәшкилати, «әркин тибәт оқуғучилар тәшкилати», «диний әркинлик тәшкилати», «канада тәйвәнликләр кишилик һоқуқ тәшкилати», «шималий корийә кишилик һоқуқ кеңиши» қатарлиқ 6 тәшкилат вәкиллири биликтә наразилиқ билдүрүш үчүн шәһәр башлиқиниң ишханисиға барған икән.

Шең шө ханим өзлириниң канада шәрқий түркистан җәмийитигә аваз қошуп, гвиллимбури шәһәрлик һөкүмәткә наразилиқ билдүрүшниң сәвәби һәққидә тохтилип, мундақ деди: «бу ишни дәсләп канада шәрқий түркистан җәмийити башлиған иди. Биз бүгүн тунҗи қетим шәһәрлик һөкүмәт ишханисиға кәлдуқ. Бизму өзимизниң наразилиқ хетимизни елип кәлдуқ. Мәйли шәһәрлик һөкүмәтниң инкаси қандақ болушидин қәтийнәзәр, биз бу ишқа йол қоялмаймиз. Канаданиң бир шәһириниң бүгүнкидәк вәзийәттә 7 орунда лагер қурулған бир шәһәр билән өз-ара достлуқ мунасивитини сақлап қелишини қобул қилғили болмайду. Әгәр улар бизниң тәпимизни қобул қилмиса, у һалда биз бу мәсилини тартқулар арқилиқ авамниң муназирисигә қоюмиз. Әлвәттә, биз йәнә канадада сайлап чиқилған бир шәһәр башлиқиниң канада хәлқиниң йүрәк сөзигә қулақ селишини үмид қилимиз. Униң канада пуқралириниң мәйдани вә қиммәт қариши нуқтисида туруп, бу мәсилигә җиддий қарап чиқиши керәк дәп қараймиз.»

Зияритимиз ахирида туйғун абдувәли шәһәр башлиқи ярдәмчисиниң мәзкур хәтни тапшуруп алғандин кейин уларға бир һәптә ичидә җаваб беридиғанлиқи һәққидә хәт әвәткәнликини билдүрди.

Пикирләр (0)
Share
Толуқ бәт