Келәчәк партийәси пүтүн түркийәдә "шәрқий түркистандики зулумни тохтат" мавзулуқ имза йиғиш паалийити башлиди

Ихтиярий мухбиримиз әркин тарим
2021-03-31
Share
Келәчәк партийәси пүтүн түркийәдә Әнқәрәдики келәчәк партийәсиниң бинаси алдиға есилған "шәрқий түркистандики зулумни тохтат" лозункиси. 2021-Йили 31-март, түркийә.
RFA/Erkin Tarim

Түркийә ахбаратлирида америка, канада вә голландийә парламентлири хитайниң уйғурларға елип бериватқан бесим сияситини "ирқий қирғинчилиқ" дәп бекиткәнлики тоғрисидики хәвәрләргә орун берилгәндин кейин, түркийә президенти рәҗәп таййип әрдоғанниң сүкүттә туруши түркийәдики өктичи партийәләр, аммиви тәшкилатлар вә кәң хәлқ аммисида наразилиқ пәйда қилди. Сабиқ баш министир әхмәт давутоғлу қурған келәчәк партийәси пүтүн түркийәдә хитай һөкүмитиниң уйғурларға елип бериватқан қаттиқ қоллуқ сияситигә қарши туруш, шундақла түркийә һөкүмитини уйғурларға игә чиқишқа чақириш мәқситидә пүтүн түркийәдә "шәрқий түркистандики ‹зулумни тохтат' дәп сөзлә" мавзулуқ имза йиғиш паалийити башлиди. 15-Март күни башланған паалийәт бир милйон имза йиғилғичә давамлишидиған болуп, имза йиғиш паалийитиниң тунҗи имзасини сабиқ баш министир, келәчәк партийәсиниң рәиси әхмәт давутоғлу қойған.

Биз бу һәқтә техиму тәпсилий мәлумат игиләш үчүн келәчәк партийәси муавин рәиси абдуллаһ башчи әпәнди билән телефон сөһбити елип бардуқ. У, мәзкур паалийәтниң пүтүн түркийәдә давамлишиватқанлиқини баян қилип мундақ деди: "имза йиғиш паалийити һазир пүтүн вилайәт вә наһийәләрдә елип бериливатиду. Бәзи йәрләрдә вилайәтлик һөкүмәт рухсәт бәрмәйватиду. Лекин һәммә йәрдә имза йиғиш паалийити давамлишиватиду. Вилайәтлик һөкүмәт рухсәт қилмиған җайларда тор арқилиқ имза йиғиватимиз. Бу паалийәт башланғили 15 күн болди, йәнә 15 күн давамлаштурғандин кейин йиғилған имзаларни түркийә парламенти вә башқа мунасивәтлик органларға тапшуруп бәрмәкчимиз".

Келәчәк партийәсиниң әски шәһәр дегән йәрдики имза топлаш паалийитидин көрүнүш. 2021-Йили 31-март, түркийә.

Келәчәк партийәси муавин рәиси, сабиқ парламент әзаси абдуллаһ башчи әпәнди йиғиватқан имзаниң бир милйон болай дәп қалғанлиқини, буни түркийә парламенти билән һөкүмәткә тапшуруп беридиғанлиқини баян қилди. У, имза йиғиш паалийитини елип бериштики мәқсити һәққидә тохтилип мундақ деди: "бу паалийәтни елип бериштики мәқситимиз хитайниң шәрқий түркистанлиқларға елип бериватқан зулумини хәлққә аңлитиш, йиғилған имзани түркийә парламенти билән һөкүмәткә тапшуруп бериш арқилиқ уларға түрк хәлқиниң хитай зулумиға болған наразилиқини билдүрүп қоймақчимиз. Бу арқилиқ хитайниң шәрқий түркистанда елип бериватқан зулум сияситигә һөкүмәтниң диққәт-етибарини тартмақчи. Чүнки хитай һөкүмити һазир шәрқий түркистанда елип бериватқан ирқий қирғинчилиққа қарита нурғун дөләтләр наразилиқ билдүрүватиду. Әмма түркийә һөкүмити техигичә сүкүттә туруватиду. Түрк дуняси вә түрк бирликини тәрғиб қиливатқан түркийә һөкүмитиниң шерики милләтчи һәрикәт партийәси рәиси дәвләт бағчәли әпәндиму, мусулманлиқни тәкитләватқан түркийә президенти рәҗәп таййип әрдоғанму сүкүттә туруватиду. Бизниң мәқситимиз уларниң бу сүкүтини бузуштин ибарәт".

Мәлум болғинидәк 25-март күни хитай ташқи ишлар министири ваң йи башчилиқидики һәйәт билән түркийә ташқи ишлар министири мәвлут чавушоғлу башчилиқидики һәйәт елип барған учришишта, түркийә билән хитай оттурисидики тиҗарий мунасивәт, район характерлик вә хәлқара мәсилиләр, хитайдин сетивалған 50 милйон ваксининиң қалған қисминиң түркийәгә қачан елип келинидиғанлиқи қатарлиқлар тоғрисида музакирә елип берилидиғанлиқи хәвәр қилинди. Булардин сирт түркийә ташқи ишлар министири мәвлүт чавушоғлу уйғур мәсилигә көңүл бөлүватқанлиқини дегән болсиму, түркийә президенти рәҗәп тайип әрдоғанниң ваң йи билән қолини уруп көрүшүши түркийәдики һәр қайси өктичи партийә вә аммиви тәшкилат мәсуллирини биарам қилди. Келәчәк партийәси муавин рәиси абдуллаһ башчи әпәнди бу һәқтики көз қаришини баян қилип мундақ деди: "партийәмизниң рәиси әхмәт давутоғлу һәр һәптә изчил һалда шәрқий түркистан мәсилисини күн тәртипкә елип келиватиду. Президентимиз рәҗәп тайип әрдоғанниң хитай ташқи ишлар министири ваң йи билән қолини уруп көрүшүши көңлимизни бәкла йерим қилди. Биз һеч болмиса рәҗәп тайип әрдоғанниң ваң йидин уйғурлар тоғрисида соал соришини, уйғур мәсилисини қандақ һәл қилидиғанлиқини соришини арзу қилаттуқ. Буниму қилмиди, яхши күтүп йолға селип қойди".

Зияритимизни қобул қилған истанбулдики шәрқий түркистан кишилик һоқуқи тәшкилати баш катипи нуриддин избасар әпәнди келәчәк партийәсиниң уйғурларни қоллаш үчүн пүтүн түркийәдә елип бериватқан имза йиғиш паалийитиниң зор әһмийәткә игә икәнликини, түрк хәлқигә уйғурларниң һазирқи еғир вәзийитини аңлатқандин сирт, түркийә һөкүмитигә бесим пәйда қилидиғанлиқини баян қилди.

Келәчәк партийәси 2019-йили 12-айда қурулған болуп, қурулған күндин тартип изчил һалда уйғур мәсилисини күнтәртипкә елип кәлмәктә. Мәзкур партийәниң рәиси сабиқ баш министир әхмәт давутоғлу вә аяли саһра ханим 4-март күни "шәрқий түркистанда аял болуш" темисида доклат бериш йиғини уюштуруп, йиғинда уйғур ханим-қизлириниң һазирқи трагедийәси оттуриға қоюлғаниди. Келәчәк партийәсиниң коня вилайитидики ячейкиси бу йил 13-январ күни вилайәт бойичә имза йиғиш паалийити өткүзүп, 15-феврал күни 15 миң имзани түркийә парламенти билән һәр қайси сиясий партийәләргә тапшуруп бәргәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт