Түркийәдики уйғурлар б д т ни өз мәсулийитини ада қилишқа чақирди

Ихтиярий мухбиримиз азиғ
2021-12-10
Share
Түркийәдики уйғурлар б д т ни өз мәсулийитини ада қилишқа чақирди Истанбул казли чәшмә мәдәнийәт мәркизидә өткүзүлгән “уйғурлар үчүн бирләшкән дөләтләр тәшкилатини мәсулийәткә чақириш” намидики чоң типтики паалийәттин көрүнүш. 2021-Йили 9-декабир, түркийә.
RFA/Azigh

“дуня кишилик һоқуқ күни” мунасивити билән түркийәдики уйғурлар, болупму юртидики уруқ-туғқанлири лагерға тутулуп кетилгән уйғур паалийәтчилиридин тәшкилләнгән бир мунбәр, 9-декабир күни истанбул казли чәшмә мәдәнийәт мәркизидә “уйғурлар үчүн бирләшкән дөләтләр тәшкилатини мәсулийәткә чақириш” намида чоң типтики паалийәт өткүзди.

Бу паалийәткә түркийәдики кишилик һоқуқ паалийәтчилири, уйғур зиялийлири, уйғур вә түрк пуқрави тәшкилатлириниң мәсуллири, журналиситлар, сиясий партийәләрниң вәкиллири вә аилә әзалири лагерға тутулуп кетилгән түркийәдики бир қисим уйғурлар қатнашти.

Бу паалийәткә қәдәм тәшрип қилған “ийи” партийәси истанбул шөбисиниң башлиқи буғра кавунҗу хитайға қайтурветиш хәвпигә дуч киливатқан уйғурлар үчүн күрәш қиливатқанлиқини билдүрүп, мундақ деди:

“биз хитайға қайтурулуш үчүн тутқун қилинған шәрқи түркистанлиқларниң йенида болуватимиз. Уларниң хитайға қайтурулмаслиқи үчүн күрәш қиливатимиз. Бундин кейинму биз силәргә охшаш енергийә вә қизғинлиқ билән бу күрәшни бирликтә давамлаштуримиз.”

Истанбул казли чәшмә мәдәнийәт мәркизидә өткүзүлгән “уйғурлар үчүн бирләшкән дөләтләр тәшкилатини мәсулийәткә чақириш” намидики чоң типтики паалийәттин көрүнүш. 2021-Йили 9-декабир, түркийә.

Мәзкур паалийәткә қатнашқан ақ партийә истанбул шөбисиниң муавин башлиқи йилдиз конак сүслү әпәнди сөз қилип, мундақ деди: “хитайға охшаш чоң бир дөләт силәрдин қорқиватиду. Хитай қоруққанлиқи, тутқунларни йоқ қиливетиш имканийити болмиғанлиқи вә силәрниң буниңға әсла йол қоймайдиғанлиқиңлар сәвәбидин силәрниң авазиңизни өчүрүшкә тиришиватиду. Биз партийәмиз вә дөлитимизниң сиясити бойичә бу зулумға қарши турушни давамлаштуримиз.”

Бу паалийәтни уюштурған паалийәтчиләрдин җәвлан ширмәмәт әпәнди зияритимизни қубул қилип, мәзкур паалийәтни орунлаштурушниң мәқсити вә сәвәблири һәққидә тохталди.

Ата-ана вә уруқ-туғқанлири лагерға тутулуп кетилгән түркийәдики бир қисим уйғурлар, хитайниң уйғур районидики қирғинчилиқ сияситигә қарши туруш мәқситидә “шәрқий түркистан үчүн анатолийә сәпири” намлиқ һәрикәтни тәшкиллигән, бу җәрянида кәң көләмлик имза топлаш паалийити елип барған иди. Улар “дуня кишилик һоқуқ күни” мунасивити билән “шәрқи түркистан үчүн анатолийә сәпири” паалийити җәрянида топланған имзаларни бирләшкән дөләтләр тәшкилатиға әвәтип, б д т ниң хитайниң бу қирғинчилиқ сияситигә қарита өз вәзиписи вә мәсулийитини ни иҗра қилишқа чақириқ қилиди.

Зияритимизни қобул қилған мәдинә назими ханим, имза топлаш паалийитиниң җәряни вә бирләшкән дөләтләр тәшкилатини өз мәсулийитини ада қилишқа чақириқ қилишниң реал әһмийити һәққидә тохталди.

“лагер тутқунлири мунбири” ниң вәкили мирзәхмәт илясоғли әпәндиму зияритимизни қубул қилип, бирләшкән дөләтләр тәшкилати вә шуниңға охшаш хәлқаралиқ органларниң уйғур мәсилисигә тутқан позитсийисиниң йетәрлик болмайватқанлиқи вә уйғур қирғинчилиқини тохтитиш үчүн хәлқара органларниң мәсулийитини ада қилиши керәкликини ейтти.

Хитай һөкүмитиниң уйғур елида елип бериватқан қирғинчилиқ сиясити түпәйли аилә әзалиридин айрилип қалған муһаҗирәттики уйғурлар һәрхил сиясий вә иҗтимаий паалийәтләр арқилиқ, өз авазни дуняға аңлитишқа тиришип кәлмәктә. Улар түркийәдә “милләт нөвәттә” вә “шәрқий түркистан үчүн анатолийә сәпири” қатарлиқ паалийәтләрни тәшкилләш арқилиқ түркийәдә вә хәлқарада уйғур лагер тутқунлириниң паҗиәлик тәқдирини аңлитип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт