Sha'ire nur'ela göktürk xanimning "Kökbayraqning köz yéshi" namliq kitabi edebiyatchilar uchrishishida alqishqa érishti

Ixtiyariy muxbirimiz erkin tarim
2021-07-12
Share
Sha'ire nur'ela göktürk xanimning Enqerede ötküzülüwatqan 1-nöwetlik yazghuchi-sha'irlar uchrishishida Uyghur sha'ire nur'ela göktürk xanim kitabqa imza qoymaqta. 2021-Yili 11-iyul, türkiye.
RFA/Erkin Tarim

Türkiyening paytexti enqere shehiride ötküzülüwatqan 1-nöwetlik yazghuchi-sha'irlar uchrishishigha alahide teklip boyiche Uyghur sha'ire nur'ela göktürk xanim ishtirak qildi. 11-Iyul küni axsham aldi bilen mezkur kitabi we Uyghurlar toghrisida doklat bergen nur'ela göktürk xanim, kéyin "Kök bayraqning köz yéshi" namliq kitabini oqurmenlerge qol qoyup tarqitip berdi. "Sebilurreshat zhurnili" ning mes'uli fatih bayxan riyasetchilik qilghan yighilishta Uyghur xewer we tetqiqat merkizining mes'uli xemit göktürk ependimu söz qilip, Uyghurlarning hazirqi éghir weziyiti we Uyghur dewasining xelq'aradiki tereqqiyati toghrisida melumat berdi. Pa'aliyetke edebiyat sahesidiki birqisim muhim kishilermu ishtirak qilghan bolup, hemmisi dégüdek nur'ela xanimning kitabigha qol qoydurdi.

Hazir tunji qétimliqi ötküzülüwatqan yazghuchi we sha'irlar uchrishishigha türkiyening 30 etrapida rayonidin, shundaqla türkiyede yashawatqan türkiy milletlerdin bolghan sha'irlar, enqerede chiqiwatqan edebiyat zhurnallirining mes'ulliri, her derijilik kadirliri, enqerediki Uyghur ziyaliyliri we edebiyat heweskarliridin bolup köp sanda kishi ishtirak qildi.

Bu pa'aliyetni uyushturghan idarining mes'uli fatih bayxan ependi ziyaritimizni qobul qilip mundaq dédi: "Sherqiy türkistan mesilisi bizning qan éqiwatqan yarimizdur. Edebiyat heqiqiy hékayilerdin terkib tapidu. Sherqiy türkistanda hazir nurghun weqeler boluwatidu. Bu mesilini edebiyat heweskarlirining semige sélish üchün bu pa'aliyetni uyushturduq. Menche yaxshi qiliptimiz, kishilerning qiziqishi bek yuqiri boldi. Biz sherqiy türkistan heqqide mexsus doklat teyyarlashni oylawatimiz. Bügünki pa'aliyitimiz bek yaxshi pa'aliyet boldi".

Enqerede ötküzülüwatqan 1-nöwetlik yazghuchi-sha'irlar uchrishishida Uyghur sha'ire nur'ela göktürk xanim(sehnining otturida) sözlimekte. 2021-Yili 11-iyul, türkiye.
Enqerede ötküzülüwatqan 1-nöwetlik yazghuchi-sha'irlar uchrishishida Uyghur sha'ire nur'ela göktürk xanim(sehnining otturida) sözlimekte. 2021-Yili 11-iyul, türkiye.

8-Iyuldin 15-iyul künigiche dawamlishidighan sha'irlar uchrishishining tötinchi künidiki pa'aliyette sha'ire nur'ela göktürk xanim ata-anisi bilen özining wetinidin ayrilish jeryani, weten hesriti we Uyghurlarning hazirqi weziyiti bayan qilin'ghan shé'irlirini oqup kishilerning qattiq alqishigha érishti.

Nur'ela göktürk xanim ziyaritimizni qobul qilip, bu pa'aliyet toghrisida qisqiche toxtaldi.

Enqerede ötküzülgen bu uchrishigha qatnashqan türkiye döletlik radiyo-téléwiziye idarisi muxbiri mirkamil qeshqerli ependi, bu pa'aliyette Uyghurlargha orun bérilishining Uyghurlarning hazirqi éghir weziyitini anglitish üchün paydiliq ikenlikini otturigha qoydi.

Mezkur shé'irlar toplimigha sha'ire nur'ela göktürk xanimning weten hesriti, xitayning Uyghurlargha élip bériwatqan bésim siyasiti we Uyghurlarning hazirqi éghir weziyiti bayan qilin'ghan 105 parche shé'ir kirgüzülgen.

Nur'ela xanimning 4 shé'ir kitabidin sirt "Uyghur ta'amliri" namida bir kitabi bar. U, söyün'gül janishif xanimning "Köz yéshida nemlen'gen zémin" namliq kitabini türkchige terjime qilip neshr qildurghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet