Korlida dawam qilghan “Qara, rezil küchlerge zerbe bérish” dolqunida 76 kishi “Ikki yüzlimichi” dep békitilgen

Shinjang téléwiziye istansisining xewer qilishiche, Uyghur aptonom rayonluq “Qara, rezil küchlerge zerbe bérish” xizmet guruppisi mushu ayning 14-küni yighin échip, yilda bir nöwet élip bérilidighan bu dolqunni yene qozghighan. Bu xewerdin melum bolushiche, yighinda “Qayta tekshürüsh usuli boyiche nuqtiliq sahelerdiki mes'uliyitini ada qilmighanlarni bayqash we uni jazalash” otturigha qoyulghan. 2016-Yil “Qayta tekshürüsh”, “Arqigha qarash herikiti” depmu atalghan bolup, u chaghda edebiyat-sen'et we tetqiqat saheside ilgiriki yillarda élan qilin'ghan eserlerdin mesile tépish we aptorlirini jazalash sheklide ijra bolghan.

Biz bu zerbe dolqunining, bolupmu “Qayta tekshürüsh” ning qandaq dawam qiliwatqanliqini éniqlash üchün Uyghur élidiki bir qisim idare-jem'iyetlerge téléfon qilduq. Korla sheherlik xelq hökümet binasida nöwetchilik qiliwatqan saqchi xadimi, ötken ayning axiridin bashlap, jiddiy halette turuwatqanliqini bayan qilish bilen birlikte, “Qara küchlerge zerbe bérish” dolquni seweblik shekillen'gen bu jiddiy weziyette, “Ikki yüzlimichi” lerge zerbe bérishning asasliq nishan bolghanliqini ashkarilidi.

Xitay xewerliridin melum bolushiche, “Qara, rezil küchlerge zerbe bérish” bashqa ölkilerde asasliqi jem'iyettiki qara guruh we jinayetchi unsurlarni nishan qilghan bolsa, Uyghur éligha kelgende asasliqi siyasiy sahediki kishilerni, bolupmu Uyghur rehbiriy kadirlar, dölet xizmetchiliri we partiye ezalirini nishan qilghan. Ilgiriki éniqlashlirimizda, 2021-yildiki bu dolqunda, xotende qara küchlerge zerbe bérish dolqunida, “Milliy bölgünchi” we “Diniy esebiyler” ni qanat astigha alghan rehbiri kadirlarning “Qara küch” dep békitilgenliki we “Ikki yüzlimichilik” bilen eyiblinip jazalan'ghanliqi melum bolghanidi.

Korlidiki mezkur saqchining bayanliridin melum bolushiche, da'iriler dolqun bashlan'ghan qisqighine waqit ichide 76 neper “Qara küch” ning “Jinayiti” ning xaraktérini béktip bolghan؛ emma bulargha qandaq jazalarning bérilidighanliqi hazirche melum emes.

Ilgiriki “Qayta tekshürüsh” heriketliride, nöwet adettiki puqralargha kelgende, ularning 10-20 yil burun qétilghan diniy pa'aliyetliri “Qanunsizliq” dep békitilip éghir jazalargha höküm qilin'ghanidi. “Qeshqer konasheher saqchi arxipliri” de xatirilinishiche, 10 nechche yil burun dadisi yaki bowisidin ögen'gen qur'an sawadlirimu diniy esebiylikning pakiti qilin'ghanidi.

Bu qétimqi “Qara, rezil küchlerge zerbe bérish” dolqunida teshebbus qilin'ghan “Qayta tekshürüsh” ning adettiki puqralargha qarita ijra qiliniwatqan yaki qilinmaywatqanliqi hazirche melum emes.