Вәзийәттин хәвәрдар киши: «тәрбийиләштә яшта чоңлар өлүм гирдабиға кәлгәндила қоюп берилмәктә»

Мухбиримиз шөһрәт һошур
2019-07-12
Елхәт
Пикир
Share
Принт
Әтрапи сим тор вә қораллиқ әскәрләр билән қоршалған «тәрбийәләш лагери».
Әтрапи сим тор вә қораллиқ әскәрләр билән қоршалған «тәрбийәләш лагери».
Social Media

Йиғивелиш лагерлири һәққидә елип бериватқан ениқлашлиримиз давамида, ғулҗиниң чапчал наһийисидә йеши 80 дин ашқан бир пенсийигә чиққан оқутқучиниң лагердин чиқип җан үзгәнлики ашкариланди. Йеқинқи бу хил пакитлар, лагердики яшта чоңларниң пәқәт өлүм гирдабиға кәлгәндила қоюветилип барғанлиқи һәққидики җәмийәт учурлириниң тоғрилиқини ишарәтлимәктә. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Икки йерим йилдин буян йиғивелиш лагерлирида тутуп буриливатқан кишиләр ичидин интайин аз сандики кишиләрниң қоюп берилгәнлики, әмма буларниң орниға йәнә башқиларниң солиниватқанлиқи ашкариланған болсиму, зади қандақ кишиләрниң қоюп бериливатқанлиқи намәлум иди. Җәмийәт хәвәрлиридә лагердикиләр ичидә яшлардин аталмиш мәсилиси еғирларниң күчәйтип тәрбийиләш нами астида кесиветилип барғанлиқи вә хели бир қисминиң хитай өлкилиридики түрмиләргә йөткәлгәнлики оттуриға қоюлса, яшанғанлар ичидә кесили еғирлишип өлүм гирдабиға кәлгәнләрниңла аилисигә қайтурулғанлиқи илгири сүрүлгән. 

Йеқинда чапчал наһийисигә қарита елип барған телефон зиярәтлиримиз давамида, вәзийәттин хәвәрдар кишиләрдин бири чапчалниң җағистай йезисида пенсийигә чиққан оқутқучи турғун җаппарниң лагердин чиқип бир айдин кейин вапат болғанлиқини мәлум қилди. Турғун җаппар олтурушлуқ мәһәллә комитетида вәзипә өтәватқан бир хадим, өзиниң хизмәт җәрянида турған җаппарниң өлүмигә қатнашқанлиқини ашкарилиди. Вәзийәттин хәвәрдар киши, 25 йил аввал пенсийигә чиққан турғун җаппарниң 10 йил аввал өзини йоқлап кәлгән оқуғучилириға 1945 ‏-йилидики шәрқи түркистан миллий армийисиниң қудрити вә интизамчанлиқи һәққидә гәп қилғанлиқи үчүн, кишиләргә бөлгүнчилик идийисини сиңдүрүшкә урунуш гумани билән тутулғанлиқини мәлум қилғаниди. Алақидар хадимлар турғун җаппарниң өлүминиң назарәт астида узиғанлиқи, өлүм мурасимиға интайин аз санда киши қатнашқанлиқини ашкарилиған болсиму, әмма униң немә үчүн тутулғанлиқи вә қоюп берилгәнлики һәққидә мәлумат берәлмиди. 

Вәзийәттин хәвәрдар киши турғун җаппарниң лагерда еғир кесәл һалитигә чүшүп қалған әһвалда аилисигә қайтурулғанлиқини мәлум қилғаниди. Алақидар хадим, турғун җаппарниң кесәл сәвәби билән буниңдин 3 ай аввал өлгәнликини тилға алди. Әмма йәнә бир алақидар хадим, турғун җаппарниң өлүмидин аввал ғулҗидики бир тәрбийиләш мәркизидә бир мәзгил тутуп турулғанлиқини ашкарилиди. 

Өткән йили қәшқәр нәшриятидин тутқун қилинған бир пешқәдәм кадирниңму кесили еғирлашқанлиқи сәвәблик өйигә қайтурулғанлиқи, азрақла яхшиланғанда йәнә лагерға әкетилгәнлики мәлум қилинғаниди. Өткән айда атақлиқ язғучи нурмәмәт тохтиниңму лагерда кесили еғирлишип өйигә чиққанда, бир айдин кейин вапат болғанлиқи дәлилләнгәниди.

Һөрмәтлик радио аңлиғучилар, юқирида лагердики яшанғанларниң саламәтлики еғирлишип өлүм гирдабиға барған чағдила қоюветилип барғанлиқи һәққидә аңлитиш бәрдуқ.

Пикирләр (0)
Share
Толуқ бәт