Meshhur lagér resimidiki tutqunlardin biri karxanichi éziz haji shangtang ikenliki delillendi

Muxbirimiz shöhret hoshur
2019-04-23
Élxet
Pikir
Share
Print
Lop nahiyesidiki 4-yighiwélish lagéridiki tutqunlar siyasiy öginishte. 2017-Yili mart, xoten.
Biri bir mehel réstoran achqan we shangtang dep leqimi bolghan éziz haji istrélka arqiliq körsitilgen.
Lop nahiyesidiki 4-yighiwélish lagéridiki tutqunlar siyasiy öginishte. 2017-Yili mart, xoten. Biri bir mehel réstoran achqan we shangtang dep leqimi bolghan éziz haji istrélka arqiliq körsitilgen.
Social Media

Uyghur rayonidiki lagérlar heqqide tarqalghan süretler ichide eng diqqet tartqini lop nahiyelik atalmish terbiyelesh merkizidiki tutqunlarning kök mehbus kiyimi bilen yighin meydanida olturghan körünüshi bolup, bu dunyaning herqaysi jaylirida lagérlargha qarshi ötküzülgen namayishtin tartip amérika dölet mejlisidiki yighin zallirighiche keng tarqalghan we qollinilghan idi. Yéqinda muhajirettiki Uyghurlar ene shu resimdiki tonushliridin birqanchisining kimlikini feysbokta ashkarilidi. Ashkarilinishiche, 5-qatarda olturghan kishilerdin biri bir mehel réstoran achqan we shangtang dep leqimi bolghan éziz haji dégen kishidur. Muxbirimizning éniqlashliri dawamida bu uchurning toghriliqi delillendi.

Lagérlar heqqidiki meshhur resim-lop terbiyelesh merkizidiki tutqunlarning körünüshi xelq'ara jama'et arisida eng diqqet tarqatqan idi. Bolupmu bu resimde yighin meydanidiki tutqunlarning jiddiy we ensiz chirayi, hemmisiningla alghanlirini tizigha qoyup olturushi, qoralliq saqchilarning nazariti, lagér tamlirining sim tikenler bilen qorshilishi qatarliq körünüshler lagérining xitay dewatqandek bir kespiy terbiye merkizi emes, bir jaza lagéri ikenlikini ashkarilap bergen idi. 19-Aprél küni dunya Uyghur qurultiyining mu'awin re'isi perhat muhemmet ependining feysbok bétide ene shu resimdikilerdin 4 kishining ismi we kespi ashkarilan'ghan. Biz bu yip uchigha asasen ene shu 4 kishidin éziz hajining ehwali heqqide lop nahiyesidiki alaqidar orunlargha téléfon qilduq. Xadimlardin biri lopta ilgiri réstoran tijariti bilen shughullan'ghan éziz haji isimlik bir kishining barliqini delillidi. Uning déyishiche éziz hajim buningdin 15 yil burun réstoran tijaritini bashlighan؛ yéqinqi yillarda bu tijaritini toxtatqan. Emma u éziz hajining kéyinki tijariti we nöwette qaysi terbiyelesh merkizide ikenliki heqqidiki so'alimizgha jawab bermidi. Esli yurti xotenning lop nahiyesidin bolghan muhajir toxti rozi ependining bayan qilishiche, éziz haji, lop nahiye baziridiki chong meschitning arqisida olturushluq bir karxanichi bolup, u ilgiri yorungqash deryasi boyida réstoran achqan, yéqinqi yillarda péchine-pirenik dukini échip keng baza tapqan. Andin u bir pirenik zawuti qurush üchün loptiki béyjing sana'et échiwétish rayoni dep atalghan jaydin yer sétiwalghan ؛ zawut pütüp ishqa chüshüshning aldida lagérgha ekétilgen. Loptiki alaqidar xadimlar éziz hajining tutulush sewebi heqqidimu melumat bermidi. Toxti rozining perez qilishiche, éziz haji ilgiri hej ibadini ada qilghan bolup, uning chet'eldin ziyaret qilghan bolushi, uning tutulushigha seweb bolghan bolushi mumkin.

Melum bolushiche, éziz haji lop nahiyeside eng baldur igilik tikligen we iqtisadiy jehette lopta aldinqi qatardiki soda-karxanichilardin biri bolup, u sodida taza ronaq tépiwatqan we minglarche kishini ish bilen teminlesh aldida turuwatqan bir mezgilde lagérgha soluwélin'ghan.

Toluq bet