Франкфурт шәһиридики алий мәктәп оқуғучилири хитайниң җаза лагерлириға қарши намайиш өткүзгән

Ихтиярий мухбиримиз әкрәм
2020-11-02
Share
Frankfurt-shehridiki-Aliy-mektep-uyghur-mesilisi.jpg Франкфурт шәһиридики алий мәктәп оқуғучилири хитайниң җаза лагерлириға қарши өткүзгән намайиштин көрүнүш. 2020-Йили 31-авғуст, германийә.
RFA/Ekrem

31-Авғуст германийәниң франкфурт шәһиридики алий мәктәп оқуғучилири өзлүкидин тәшкиллинип хитайниң җаза лагерлириға қарши намайиш елип барған.

Йеқинқи мәзгилләрдин буян германийәдики бәзи алий мәктәп оқуғучилириниң иҗтимаий таратқуларда хитайниң җаза лагерлири сияситигә қарши паалийәтлири әвҗ елишқа башлиған иди. 31-Авғуст күни германийәниң франкфурт шәһиридики гйоти университети, франкфурт университети, франкфурт теббий университети қатарлиқ 8 алий мәктәпниң оқуғучилири өзлүкидин тәшкиллинип, шәһәр мәркизидики гйоте мәйданида хитайниң уйғур диярида тәсис қилған җаза лагерлириға қарши намайишлирини башлиған.

Игилишимизчә, бу қетимқи намайишқа әслидә франкфурт вә майниз шәһәрлиридики 8 университетниң миңлиған оқуғучилириниң қатнишиши пиланланған. Әмма явропада хитайдин тарқалған коруна вирусиниң 2-қетимлиқ долқуни көтүрүлгән, германийәдә бу вирусниң тарқилиши әң юқири чәктә әвҗигә чиққан бир күнгә тоғра келип қалғанлиқи үчүн, һөкүмәт даирилири 20 дин артуқ адәмниң топлишип намайиш қилишиға иҗазәт бәрмигән. Буниң билән 8 университеттин 2-3 тин оқуғучи вәкил болуп қатнишип, бу намайишни елип барған.

Германийәниң карлсрухе шәһиридә яшайдиған бир бөлүк уйғурларму алий мәктәп оқуғучилириниң бу намайишини қоллаш үчүн франкфурт шәһиригә йетип барған. Карлсрухе шәһиридин келип бу намайишқа иштирак қилған д у қ тәтқиқат мәркизиниң мудири әнвәр әһмәт әпәндиниң бу һәқтә мәлумат беришичә, 2 саәт давамлашқан бу намайиш гйоте мәйданида башлинип, хитайниң франкфурт шәһиридики консулханиси алдида ахирлашқан. Униң билдүрүшичә, намайишқа герман оқуғучилардин сирт, асия, африқа әллиридин кәлгән охшаш болмиған ирқ, милләткә тәвә болған алий мәктәп оқуғучилириму қатнашқан.

Намайишчилар гйоте мәйданидин йүрүп, шәрқий түркистанниң ай-юлтузлуқ көк байрақлирини көтүргән һалда шәһәрниң ават кочилирини бесип өтүп, хитайниң франкфурт шәһиридики консулханиси алдиға келип тохтиған. Бу йәрдә хитай һакимийитини қаттиқ әйибләп нутуқлар сөзлигән. Бир герман оқуғучиси қоллирини хитай консулханисиға шилтип туруп: «биз һәммимиз уйғур! һәй хитай консуллири, чиқип бизниң соаллиримизға җаваб бәр!» дәп варқириған.

Намайиш мәйданида шәрқий түркистанда давам қиливатқан паҗиәлик вәқәләр һәққидә тохталған бир алий мәктәп оқуғучиси өзлириниң һеч болмиса бир инсан болуш сүпити билән хитайниң инсанийәткә қарши җинайәтлиригә инкас қайтуруш мәҗбурийити барлиқини тилға алиду. У мундақ дәйду: «хитай коммунистик һакимийитиниң уйғурлар үстидин йүргүзүатқан ирқий қирғинчилиқлириға сүкүт қилиш, хитайниң бу җинайәтлирини қоллиған билән баравәрдур. Бизниң бир инсан болуш сүпитимиз билән һеч болмиса хитайниң инсанийәткә қарши җинайәтлиригә инкас қайтуруш мәҗбурийитимиз бар.»

Йәнә бир герман оқуғучи нутқида хитай билән иқтисадий һәмкарлиқлири давам қиливатқан германийәниң даңлиқ ширкәтлиридин «адидас», «земинс» қатарлиқ ширкәтләрни «хитайниң қанлиқ қирғинчилиқлириға шерик болуватисән!» дәп қаттиқ әйиблигән.

Германийәниң карлисрухе шәһиридин берип бу қетимқи намайишқа қатнашқан уйғур зиялийси әкбәр қасим бу һәқтә тохталғанда, гәрчә намайишниң көлими чоң болмисиму, әмма тәсириниң наһайити яхши болғанлиқини тилға алди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт