Qeshqer wilayiti “Terbiyilesh merkezliri” ni chet'eldin mexpiy tutush heqqide mexsus höjjet tarqatqan

Muxbirimiz shöhret hoshur
2019.09.25
Qeshqer-Lagerlarni-Mexpiy-Tutush-Heqqidiki-Hojjet-01.JPG Qeshqer wilayetlik muqimliqni saqlash xizmet guruppisi qomandanliq shtabi chiqarghan “Kespiy téxnika terbiyilesh mektepliri” ning mexpiyetlikini chet'ellerge ashkarilimasliq heqqidiki höjjet.
Photo: RFA

Yéqinda radi'omiz qeshqer wilayetlik partkomning herqaysi yéza-bazar we idare-jem'iyetlerge tarqatqan “Terbiyilesh merkezliri” ning mexpiyetlikini qattiq saqlash heqqidiki höjjitini qolgha chüshürdi. Bu höjjette “Kespiy terbiye” xizmitining partiye merkizi komitétining bir tutush qomandanliqida élip bériliwatqan, Uyghur aptonom rayonluq partkom ijra qiliwatqan istratégiyelik bir muqimliq tedbiri ikenliki eskertilip, bu xizmetke alaqidar herqandaq bir uchurni chet'eldiki “Üch xil küch” lerdin qet'iy mexpiy tutush tekitlen'gen. Bu heqte pikir bayan qilghan siyasiy közetküchi élshat hesen ependi “Mushu höjjetning ashkarilinip qélishining özimu insaniyetke qarshi herqandaq bir jinayetni yoshurup qélishning mumkinsizlikning bir ispati,” dédi.

Hörmetlik radi'o anglighuchilar, mezkur mexpiy höjjetning nami “Kespiy téxnikiwiy terbiyeleshning mexpiyetlik xizmitini qattiq ching tutush heqqide uqturush” dep qoyulghan. Höjjet qeshqer wilayetlik muqimliq xizmet guruppisi qomandanliq shtabi namida chiqirilghan. Herqaysi yéza-bazar, idare-jem'iyet we kent ahaliler komitétlirigha tarqitilghan. Mezkur höjjette aldi bilen “Kespiy téxnika terbiye xizmiti” ning partiye merkizi komitétining orunlashturushi, qollishi we qomandanliqida Uyghur aptonom rayonluq partkom ijra qiliwatqan “Merkizi hökümetning shinjang xizmet körsetmisidiki istratégiyelik bir tedbir” ikenliki eskertilgen.

Höjjet 2018‏-yili 3‏-ayning 19‏-küni, yeni yighiwélish lagérliri tesis qilinip bir yildin kéyin chiqirilghan bolup, höjjetning bash qismida mezkur xizmetning bir yilliq atalmish “Netijiliri” mu'eyyenleshtürülgen we duch kelgen qiyinchiliqlar sherhlen'gen. Uningda eng zor qiyinchiliq süpitide chet'eldiki atalmish “Üch xil küch” lerning bu bir yil jeryanida Uyghur rayonidiki “Terbiyilesh merkezliri” heqqide toxtimastin ehwal éniqlighanliqi we pitne-ighwa tarqitip, partiye we hökümetning obrazigha qara chaplighanliqi, térrorluqqa qarshi orunlashturush we muqimliq weziyitige putlikashang chiqiriwatqanliqi tilgha élin'ghan. Arqidin “Terbiyilesh merkezliri” ge a'it herqandaq bir uchur we ehwalni alaqidar orunlardin bashqa herqandaq kishi we herqandaq orun'gha bildürüshke bolmaydighanliqi we buning mutleq mexpiyetlik ikenliki tekitlen'gen shundaqla bu mexpiyetlikni qoghdashning 9 türlük tedbiri tepsiliy otturigha qoyulghan.

Uqturushta bu höjjetning rohining öymu-öy bildürülüshi, hemme kishige uqturulushi, yeni jem'iyette “Terbiyilesh merkezliri” ge a'it uchurning mutleq mexpiy ikenlikini bilmeydighan adem qalmasliqi telep qilin'ghan. Bu heqte pikir bayan qilghan washin'gtondiki siyasiy közetküchi élshat hesen ependi uqturushning öymu-öy tarqitilish telipige asasen bu yerde tekitliniwatqan “Mexpiyetlik” ning peqetla chet'eldin mexpiy tutush ikenlikini eskertti. Élshat ependi yene buninggha asasen bu höjjetke xitayning özi ishlewatqan bir jinayetni étirap qilish mahiyitidiki bir matériyal, yeni pakit süpitide qarilishqa bolidighanliqini tilgha aldi. 

Höjjettiki tedbirlerning biride “Düshmen küchler” ning özlirini “Palani idarining rehbiri”, “Palani idarining tetqiqatchisi” dégendek salahiyetlerde tonushturup uchur élishqa urunidighanliqi, ’ulargha qet'iy aldanmasliq kérekliki telep qilin'ghan. Höjjette yene “Meblegh bilen teminlesh”, “Qutquzush yardimi bérish” dégendek bahaniler bilen telep qilin'ghan söhbet we ziyaretlernimu qet'iy ret qilish buyrulghan. Élshat hesen ependi xitayda axbarat erkinliki bolmighanliqi, yeni xitay da'iriliri özliri ötküzüwatqan irqiy qirghinchiliq jinayitini pütün küchi bilen yoshuruwatqanliqi üchün Uyghur weziyitige köngül bölüwatqan teshkilat we shexslerningmu mezkur jinayetni pash qilish üchün her xil tedbir qolliniwatqanliqini ilgiri sürdi. 

Ilgiriki éniqlashlirimizdin melum bolushiche, “Terbiyilesh merkezliri” ni mexpiy tutush heqqide bashqa wilayetlerdimu höjjetler chiqirilghan. Xotendiki edliye ponkiti xadimi lagérlarning mexpiyetlikni saqlash heqqide qizil bashliq höjjet barliqini pash qilghan idi. 

Élshat hesen ependi mezkur mexpiy höjjetning erkin asiya radi'osining qoligha chüshüshining özining diqqetke sazawer bir ish ikenlikini bayan qildi. U mana buninggha asasen bügünki dewrde insaniyetke qarshi ishliniwatqan bir jinayetni bügünki dunyadin yoshurup qélishning mumkinsizlikini bayan qildi. 

Hörmetlik radi'o anglighuchilar, qeshqer wilayetlik partkomning lagérlargha a'it uchurlarni qet'iy mexpiy tutush heqqidiki bu höjjiti ashkarilinishtin bir hepte burun yopurgha nahiyesining erkin asiya radi'osining ziyaritini tosup bolalmighanliqi heqqidiki özini tekshürüsh doklati qolimizgha chüshken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.