Lagér qurbanlirining yéqinliri istanbul kochilirida Uyghurlarning nöwettiki weziyitini anglatti

Ixtiyariy muxbirimiz azigh
2021-04-30
Share

Lagér qurbanlirining türkiyediki yéqinliri we a'ile-tawabi'atliri bir qanche yildin buyan xitaygha qarshi her xil namayish we naraziliq pa'aliyetlirini teshkillep kéliwatqan bolup, lagér qurbanliri yéqinlirining pa'aliyetliri türkiyede we dunyada Uyghur mesilisining tonulushi üchün muhim rol oynimaqta.

29-Apiril küni lagér qurbanliri yéqinliri ay-yultuzluq kök bayraq ésilghan mashinilarni heydep istanbulning yawropa qirghiqini aylan'ghan. Pa'aliyetchiler istanbulning küchük chekmeje rayonidin yolgha chiqqan bolup, Uyghurlarning nöwettiki weziyiti bilen munasiwetlik plakatlar ornitilghan 30 din artuq mashina bilen istanbulning yawropa bölükide teshwiqat pa'aliyiti élip barghan.

Pa'aliyetchiler sariyerdiki xitay konsulxanisi jaylashqan kochining aldigha yighilip, xitayning irqiy qirghinchiliq siyasetlirige qattiq naraziliqini ipadilep söz qilghan.

Pa'aliyetke istanbuldiki Uyghur jama'et erbabliri, kishilik hoquq pa'aliyetchiliri we lagér qurbanliri yéqinliri qatnashqan. Pa'aliyet jeryanida türk xelqining qizghin yardimi we qollishi pa'aliyetchilerni qattiq tesirlendürgen.

Medine nazimi xanim ziyaritimizni qobul qilip, pa'aliyet heqqide tepsiliy toxtaldi we mundaq dédi: “Türk xelqi bizning yénimizda, biz bu zulumning toxtishi we gunahsiz a'ile ezalirimizning qoyup bérilishi üchün élip bériwatqan bu kürishimizni hergiz toxtatmaymiz.”

Lagér qurbanliri yéqinliridin alimjan turdi ependi ziyaritimizni qobul qilip, pa'aliyetning meqsiti we sewebi heqqide tepsiliy toxtaldi. Lagér qurbanliri yéqinliri teripidin ötken yili 18-dékabir bashlan'ghan “Millet nöwette” pa'aliyiti 120-künide türkiyening wabagha qarshi tedbirliri seweblik waqtinche toxtitilghan idi. Lagér qurbanlirining türkiyediki yéqinliri a'ililiri erkinlikke chiqmighuche pa'aliyetlirini hergiz toxtatmaydighanliqini tekitlep kelmekte.

Mirzexmet ilyas'oghli ependi imkaniyet bolmighan ehwaldimu, imkaniyet yaritish arqiliq xitayning irqiy qirghinchiliqigha qarshi küreshte toxtap qalmay dawamlashturidighanliqini, zulumgha qet'iy bash egmeydighanliqini bildürdi.

2016-Yilidin kiyin xitayning Uyghur élidiki yerlik milletlerge qaritilghan assimiliyatsiye siyasiti irqiy qirghinchiliqqa qarap tereqqiy qilghan bolup, muhajirettiki Uyghurlar bir qanche yildin buyan xitay teripidin ziyankeshlikke uchrighan a'ile tawabi'atlirining iz-dérikini qilip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet