Lagérgha tutup kétilgen er-xotundin tursunjanning 10 kündin kéyin jesiti chiqqan, gülbehrem téxiche iz-déreksiz

Muxbirimiz shöhret hoshur
2020-09-28
Élxet
Pikir
Share
Print
"Qayta terbiyelesh" lagérining aldida posta turghan saqchi. 2018-Yili 7-séntebir, xoten.
"Qayta terbiyelesh" lagérining aldida posta turghan saqchi. 2018-Yili 7-séntebir, xoten.
REUTERS

Er-xotun teng tutulup kétish, bir-biri bilen körüshelmeslikla emes, aqiwitidin 3 yildin kéyinmu xewersiz qélish Uyghur rayonida lagérlar qurulghandin buyan misali köp körülgen tragédiyelik bir hadisidur. Ghulja nahiyesining döngmazar baziri 2-kent ezasi tursunjan sawut bilen ayali gülbehrem 2017-yilning béshida bir kéchide tengla tutup kétilgen. Sapmisaq ekétilgen tursunjan sawutning 10 kündin kéyin jesiti chiqqan ؛ emma, ayali gülbehremdin ta hazirghiche a'ile we tawabi'ati we mehelle-koy héchqandaq uchur alalmighan.

Ghulja nahiyelik bir muhajirning radiyomizgha inkas qilishiche, 2017-yilining béshidiki bir kéchide 30 din artuq saqchi mashinisining signallirini bolushigha qoyup bérip döngmazarning 2-kent 2-mehelliside peyda bolghan we bu mehellidiki déhqan tursunjan sawutning qorusini qorshawgha alghan. Inkasta teswirlinishiche, tursunjan sawutning qoruq témidin atlap chüshken 10 nechche qara kiyimlik saqchi, bu öydin ikki kishining béshigha qara xalta kiydürüp élip chiqqan we saqchi mashinisigha ittirip solighiniche yene shu ensiz signalliri bilen mehellidin ayrilghan. Aridin 10 kün ötkende, aldinqi qétimkidek köp sanda saqchi mashiniliri bu mehellide yene bir peyda bolghan. Bu nöwet saqchi mashinisidin béshigha qara xalta kiydürülgen ikki tirik jan emes, aq xalatqa yögelgen bir jeset hoyligha élip kérilgen we jeset hoylidiki birqanche kishige tutquzulghandin kéyin, uzun turghuzulmastin, yene shu saqchi mashinilirining nazaritide döngmazar tewelikidiki zaratgahliqqa élip kétilgen.

Biz inkastiki bu uchurning toghriliqini aydinglashturush üchün, ghulja nahiyesidiki alaqidar idare-organlargha téléfon qilduq. Téléfonimizni qobul qilghan döngmazar 2-kenttiki saqchi xadimi deslepte bu kentte bundaq bir weqening yüz bergenlikini yoshurushqa tirishti. Biz qolimizdiki inkasqa asasen weqe heqqide bir qisim so'allarni sorighandin kéyin, u bu kentte tursunjan sawut isimlik birining lagérda ölgenlikini delillidi. Uning déyishiche, tursunjan sawut lagérgha élip kétilip 10 kündin kéyin jesiti chiqqan. Uning jesiti hoylisida birqanche sa'et turghuzulghan we bir qisim qérindashlirigha yüz-közi yépiq halette körsitilgendin kéyin, saqchilarning nazariti astida zaratgahliqqa qoyuwétilgen.

Inkasta déyilishiche, déhqanchiliqtin bashqa ish-oqiti bolmighan, hetta döngmazarning sirtighimu bek chiqip ketmeydighan, bashlan'ghuch ma'arip sewiyesige ige bu er-ayalning bunche ensiz tutup kétilishi deslepte, bu timtas mehellining ahalilirini bekla heyran qaldurghan. Ular, aridin birqanche ay ötkende, saqchi mashiniliri toxtimay mehellini kézishke bashlighan we öy basturup ahalilerni tutqun qilishqa bashlighandin kéyin, bu saqchi mashinilirining nahiyede tesis qilin'ghan atalmish terbiyelesh merkezlirige adem toplawatqanliqini bayqighan.

Ular, emma shuningdimu kemsöz tursunjan sawut bilen bashlan'ghuch medeniyet sewiyesidiki gülbehremning zadi qaysi qilmishi seweblik lagérgha ekétilgenliki we ölümige seweb bolghudek derijide soraq qilin'ghanliqining sirini yéshelmigen.

Mezkur kent saqchisi bu er-xotunning bir mezgil "Oqup salghan" liqi üchün tutulghanliqini ashkarilidi. Emma bu oqushning din oqush yaki namaz oqush ikenliki heqqide melumat bermidi.

Inkasta déyilishiche, tursunjanning ayali gülbehremning nahiyege ekétilginidin bashqa herqandaq bir uchur kent kadirlirighimu, uning a'ile tawi'abatighimu ta hazirghiche bildürülmigen. Hetta tursunjan sawutning jesiti hoylida uruq-tughqanlirigha tapshurulghan waqittimu, u meydanda ayali gülbehrem körülmigen.

Mezkur saqchi xadimi gülbehremning tursunjanning jesiti a'ilisige tapshurulghan we zaratgahliqqa qoyulghan mezgildimu gülbehremning qoyup bérilmigenlikini delillidi.

Ghulja nahiyelik muhajirning inkasida ene shundaq heywetlik tutulghan we biri öltürülüp, yene biri ghayib qiliwétilgen bu ikki tutqunning a'ile-tawabi'ati heqqide melumat bérilmigen. Melum bolushiche, tursunjan we gülbehremning 3 perzenti we birqanche qérindashliri bar bolup, ularning nöwettiki qismiti hazirche melum emes.

Toluq bet