Gérmaniye parlamént ezaliri “Uyghur irqiy qirghinchiliqi” ni étirap qildurushqa küch chiqarmaqchi

Ixtiyariy muxbirimiz erkin tarim
2022.06.06
Share on WhatsApp
Share on WhatsApp
Gérmaniye parlamént ezaliri “Uyghur irqiy qirghinchiliqi” ni étirap qildurushqa küch chiqarmaqchi Lagér shahitliri gérmaniye fédératsiye parlaméntidiki kishilik hoquq we insanperwerlik komitétining re'isi renata alt xanim bashchiliqidiki libérallar partiyesining mes'ulliri bilen körüshti. 2022-Yili 2-iyun, gérmaniye.
RFA/Erkin Tarim

“Uyghur irqiy qirghinchiliqi” mesilisi amérika hökümitidin bashqa yene kanada parlaménti qatarliq 8 döletning parlaméntliri teripidin étirap qilin'ghandin kéyin, mezkur qirghinchiliqini bashqa döletlerning hökümet we parlaméntlirighimu étirap qildurush xizmetlirimu jiddiy élip bérilmaqta. Bundaq meqsettiki uchrishishlar gérmaniye parlaméntidimu ötküzüldi.

6-Ayning 2-küni yawropa sherqiy türkistan birlikining re'isi esqer jan, gollandiyede turushluq lagér shahitliridin qelbinur sidiq we ömerbek aliy we firansiyede turushluq lagér shahiti gülbahar heytiwaji qatarliqlar birlikte etigen sa'et 9 da birinchi bolup gérmaniye fédératsiye parlaméntidiki kishilik hoquq we insanperwerlik komitétining re'isi renata alt xanim bashchiliqidiki libérallar partiyesining mes'ulliri bilen körüshüp, ulardin “Uyghur irqiy qirghinchiliqi” étirap qilishi telep qilghan.

Lagér shahitliri gérmaniye xristi'an démokratiye partiyesining kishilik hoquq komitétining mes'uli micha'el brand(Michael Brand) ependi qatarliqlar bilen körüshti. 2022-Yili 2-iyun, gérmaniye.
Lagér shahitliri gérmaniye xristi'an démokratiye partiyesining kishilik hoquq komitétining mes'uli micha'el brand(Michael Brand) ependi qatarliqlar bilen körüshti. 2022-Yili 2-iyun, gérmaniye.
RFA/Erkin Tarim

Yawropa sherqiy türkistan birlikining re'isi esqer janning bildürüshiche, ular bu heqte küch chiqiridighanliqini bayan qilghan. Arqidin esqer jan qatarliqlar yene xristi'an démokratiye partiyesining kishilik hoquq komitétining mes'uli micha'el brand ependi bilen uchriship uninggha teleplirini yetküzgen. Micha'el brand gérmaniye fédératsiye parlaméntining “Uyghur irqiy qirghinchiliqi” ni qobul qilmisa bolmaydighanliqini, bu heqte xristi'an démokratiye partiyesining küch chiqiridighanliqini bayan qilghan.

Eng axirqi uchrishish gérmaniye fédératsiye parlaméntidiki kishilik hoquq we insanperwerlik komitétining xristi'an sotsiyal partiyesi ezasi sabine we'iss xanim bilen élip bérilghan. Mezkur uchrishish nahayiti qizghin shekilde dawamlashqan bolup, lagér shahitliri özlirining xitay jaza lagérlirida körgen-bilgenlirini anglitip, Uyghur qirghinchiliqi heqqide guwahliq bergen. Ularmu oxshashla gérmaniye fédératsiye parlaméntida “Uyghur irqiy qirghinchiliqi” gha bolghan diqqetning nahayiti yuqiri ikenlikini, buni étirap qildurush üchün küch chiqiridighanliqini éytqan.

Arqidin yawropa sherqiy türkistan birliki re'isi esqer jan ependi söz élip gérmaniye dölitining dunyada démokratiye bilen kishilik hoquqni terghib qiliwatqan chong dölet bolush süpiti bilen amérika bashliq birqisim gherb döletliri étirap qilghan “Uyghur irqiy qirghinchiliqi” ni derhal étirap qilishi kéreklikini tekitligen.

Radiyomiz ziyaritini qobul qilghan esqer jan ependi bu qétimqi uchrishishtin gérmaniye hökümiti we parlaméntining yéqin kelgüside “Uyghur irqiy qirghinchiliqi” ni étirap qilish éhtimali barliqini hés qilghanliqini bayan qildi.

Amérika hökümitidin bashqa yene, kanada, en'gliye, gollandiye, bélgiye, litwa, awstriye we firansiye parlaméntliri ilgiri-kéyin bolup, xitayning Uyghurlar üstidin yürgüzüwatqan basturush herikitini “Irqiy qirghinchiliq” dep étirap qilghanidi. Dunyaning herqaysi jaylirida yüz bériwatqan kishilik hoquq depsendichilikini eyibleshte aldinqi qatarda turup kéliwatqan gérmaniyening hazirghiche “Irqiy qirghinchiliq” ni étirap qilish mesiliside birer qarar chiqarmasliqi, her sahening diqqitini qozghimaqta. Esqer jan ependi buning sewebliri heqqide toxtaldi.

Esqer jan ependi bérlindiki ikki künlük ziyaret jeryanida gérmaniye axbarat wasitiliriningmu burunqigha oxshimaydighan shekilde qiziqqanliqini tekitlidi.

Mezkur hey'et 6-ayning 1-küni gérmaniye tashqi ishlar ministirliqi xadimliri we gérmaniye hökümiti kishilik hoquq we insanperwerlik aliy komissari bilen uchrishish élip bérip “Uyghur irqiy qirghinchiliqi” ni étirap qilishi telep qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.