Уйғур аял актиплири: "хитайниң уйғур аяллири һәққидики тәшвиқати ялғанчилиқ вә номуссизлиқтур"

Мухбиримиз меһрибан
2021-03-06
Share
zumret-dawut Зумрәт давут нйо йорктики б д т баш шитабида
RFA

2017-Йилдин буян хитай даирилириниң милйонлиған уйғурни лагерға қамап, уйғурларға қарита ирқий қирғинчилиқ йүргүзиватқанлиқи хәлқара таратқуларда барғанчә көп ашкара болмақта. Шуниң билән бир вақитта, хитай һөкүмитиниң уйғурларни бастурушиға йеқиндин һәмкарлашқан хитай әмәлдарлири вә ширкәтлиригә қарита җазалаш тәдбири қоллиниш садалири хәлқарада барғансери күчәймәктә.

2021-Йили 1-айдин башлап америка, канада, голландийә қатарлиқ ғәрп демократик дөләтлири хитайниң уйғурларға ирқий қирғинчилиқ йүргүзүватқанлиқини җакарлиди. Болупму хәлқара таратқуларниң бу һәқтики хәвәрлиридә уйғур аяллириниң әң қаттиқ зиянкәшлик вә хорлинишқа учраватқанлиқи лагер шаһитлириниң гуваһлиқи билән хәлқарада зилзилә қозғиди вә хитайни әйибләш садалири барғансери күчәйди.

Лагер шаһити зумрәт давут ханим америкадики һөкүмәт органлири вә таратқуларда өзиниң лагерда учриған ечинишлиқ қисмити вә 2017-йилдин кейин уйғурлар учраватқан қаттиқ бастурулуш вәзийити һәққидә көп қетим испат бәргәнлики вә өзи көргән әһвалларни аңлатқанлиқи үчүн, хитай һөкүмитиниң һуҗум нишаниға айланған.

Радийомиз зияритимизни қобул қилған зумрәт ханим өзиниң хитай һөкүмитиниң бу хил тәшвиқат хәвәрлиригә йеқиндин диққәт қилип келиватқанлиқини билдүрди.

Зумрәт ханим хитай һөкүмитиниң ғәрп таратқулирида ашкара болуватқан уйғурларға даир хәвәр вә мақалиларни изчил түрдә инкар қилип кәлгәнликини; милйонлиған уйғурниң лагерларға қамилиши, лагердин қоюп берилгән вә лагер сиртидики уйғурларниң хитай ширкәтлиридә әрзан әмгәк күчи яки қул әмгәкчи сүпитидә мәҗбурий ишлитиливатқанлиқидәк реаллиқни пәрдазлап көрситиватқанлиқини тәкитләп өтти. У йәнә хитай һөкүмитиниң уйғурларни мәҗбури тәшкилләп, америка қатарлиқ ғәрб дөләтлирини тиллашқа салғанлиқини, уйғурлар дейишни халимиған сөзләрни уларға сөзлитишкә, ейтишни халимиған қизил нахшиларни ейтишқа мәҗбурлиғанлиқини билдүрди.

Зумрәт давут ханим йәнә хитай таратқулиридики "өз әркинлики бойичә хитай әрлири билән тойлишиватқан" уйғур аяллири һәққидә ишләнгән тәшвиқат филимлири һәққидиму тохтилип өтти.

Униң билдүрүшичә, уйғур аяллири хитай һөкүмитиниң мәҗбурлиши билән өзлириниң тутқун қилинған уруқ-туғқанлирини қутқузуш үчүн хитай әрлиригә ятлиқ болушқа мәҗбур болуватқан болса, хитай әрлири һөкүмәттин бәһриман болудиған түрлүк мәнпәәтләр үчүн уйғур қиз-аяллири билән тойлишидикән.

Зумрәт ханим йәнә хитай таратқулирида тәшвиқ қилиниватқан аталмиш "қошмақ туғқан" вә "уйғурларға ярдәм" сияситини уйғурларни өз өйидиму назарәт қилиш үчүн йүргүзүливатқан бир вастә дәп қарайдиғанлиқини билдүрди. У буниңда әң еғир зиянкәшликкә учриғучиларниң аяллар икәнликини билдүрди.

Америкидики "уйғур һәркити" тәшкилатиниң башлиқи зошән аббас ханим, хитай һөкүмитиниң уйғурларға ирқий қирғинчилиқ йүргүзүваткқанлиқини инкар қилишқа урунуватқанлиқини, әмма хитай һөкүмитиниң бу ялған тәшвиқатиниң хәларни алдиялмиғанлиқини билдүрди.

Рошән аббас ханим хитай һөкүмитиниң уйғур аяллири һәққидики тәшвиқатлирида, "уйғур аяллири қатмал идийәдин қутулуп, аяллар һоқуқиға еришти", "туғут машинисиға айлиниш қисмитидин қутулуп, завутларда өз күчигә тайинип пул тепип, бәхтлик яшимақта" дегәндәк сахта тәшивиқат елип барғанлиқини, әмма бу ялған тәшвиқатлириниң хәлқарада әкс тәсир пәйда қилип, уйғур аяллириниң әң еғир ирқий қирғинчилиқниң қурбаниға айлиниватқанлиқини дуняға техиму рошән ашкарилап бәргәнликини тәкитлиди.

Рошән аббас ханимниң қаришичә, хитайниң уйғурларға қаратқан ирқий қирғинчилиқида уйғур аяллири әң еғир зиянкәшликкә вә хорлинишқа учраватқан топлуқ икән. Әмма хитай һөкүмити түрлүк усуллар арқилиқ бәзи дөләтләр, тәшкилатлар вә мәшһур шәхсләрниң сүкүттә турушини қолға кәлтүривалған. Шуңа хитай һөкүмитиниң бу хил ялған тәшвиқатлириниң маһийитини ечип ташлаш нөвәттики әң җиддий ишларниң бири икән. Униң қаришичә, хитай һөкүмитиниң уйғурларға қаратқан ирқий қирғинчилиқ сияситини дуняға ашкарилашта, лагерлар һәққидә пидакарлиқ билән гуваһлиқ бәргән уйғур аял шаһитлар һәқиқәтәнму тәқдирлинишкә мунасип кишләр икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт