Lagér shahitlirining gérmaniyede élip bériwatqan guwahliq bérish pa'aliyiti zor tesir qozghighan

Ixtiyariy muxbirimiz erkin tarim
2021-11-16
Share
Lagér shahitlirining gérmaniyede élip bériwatqan guwahliq bérish pa'aliyiti zor tesir qozghighan
RFA/Erkin Tarim

Hazir fransiyede yashawatqan lagér shahiti gülbahar héytwaji bilen gollandiyediki lagér shahiti qelbinur sidiqning 11-ayning 6-küni gérmaniyening myunxén shehiride bashlan'ghan guwahliq bérish pa'aliyiti dawamlashmaqta.

Gérmaniyediki “Yawropa sherqiy türkistan birliki” ning mes'uli esqer jan ependining bildürüshiche, xelq'ara kechürüm teshkilati bilen az sanliq milletlerni qoghdash teshkilati birlite uyushturghan bu pa'aliyet gérmaniye taratquliri, siyasiyonliri we awam xelqning diqqitini Uyghurlar mesilisige qaritishni meqset qilghan iken. Yeni bu pa'aliyet gérmaniye xelqining diqqet-étibarini xitayning Uyghurlargha qarita élip bériwatqan irqiy qirghinchiliqigha tartish, shundaqla buni toxtitish üchün heriketke ötüshke chaqirish iken.

Esqer janning éytishiche, mezkur pa'aliyet gérmaniyening 10 shehiride ötküzülidighan bolup, 11-ayning 6-künidin 20-künigiche bolghan ariliqta aldi bilen gérmaniyening 5 chong shehiride ötküzülmekte iken.

Guwahliq-Myunxen-202111-02.jpeg

Esqer jan bu pa'aliyening 11-ayning 6-küni myunxénda axbarat élan qilish bilen bashlan'ghanliqini, ikki hepte ichide gérmaniyening awgustburg, frankfurt qatarliq 5 chong shehiride ötküzülgenlikini bildürdi. Lagér shahitliridin gülbahar héytwaji bilen qelbinur sidiq xanim bu hepte ichide yene gérmaniyening göttén'gén, laypzig, xanowér, bérlin we karlsruxé qatarliq 5 shehiride guwahliq béridiken.

Esqer jan ependi guwahliq bérish pa'aliyiti ötküzülgen her bir sheherde 3 türlük pa'aliyet élip bériliwatqanliqini, bu paliyetlerning bezilirige shu sheherlerning bashliqlirimu qatniship, lagér shahitliridin melumat igilewatqanliqini bayan qildi.

Esqer jan ependi gérmaniye xelqi Uyghur lagér shahitlirining béshidin qandaq paji'elerning ötkenlikini, ularning qandaq qiyin-qistaqlargha duch kelgenlikini öz aghzidin anglisun dep bu pa'aliyetni teshkilligenlikini, shu sewebtin bu pa'aliyetning ünümining intayin zor boluwatqanliqini bayan qildi.

Lagér shahidi gülbahar héytwaji xanimmu bu munasiwet bilen ziyaritimizni qobul qilip, özining 6-noyabir künidin bashlap qelbinur xanim bilen birlikte gérmaniyening her qaysiy sheherlirini aylinip guwahliq bériwatqanliqini, bu guwahliqlarni anglighan kishilerning inkaslarning nahayiti tesirlik boluwatqanliqini bildürdi.

Igilinishiche, hazirgha qeder lagérdin qutulup chiqqan jem'iy 13 kishi guwahliq bergen bolup, lagérdin qutulghan bolsimu, emma özini ashkarilashni xalimighan kishilerning sanimu az emes iken. Qelbinur xanim lagérlarning téxi taqalmighanliqini, xitay da'iriliri lagérlardiki Uyghurlargha qiyin-qistaq, basqunchiliq, tughmas qilish we xorlashni öz öz ichige alghan insaniyliqqa qarshi türlük wehshiyliklerni yürgüziwatqanliqini, shunga lagérlarning ich yüzini pash qilishning her bir Uyghurning burchi ikenlikini tekitlidi.

Esqer jan ependining éytishiche, gérmaniyede élip bériliwatqan guwahliq bérish pa'aliyitini gérmaniye axbaratliri bes-beste xewer ishlep tarqatqan iken. Mezkur pa'aliyetning xewerliri gérmaniye dölet téléwiziyesimu köp qétim bérilgenliki melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet