Qeshqer yéngisheherde 22 yashliq alimjan emet lagérgha ekétilip 40 kündin kéyin jesiti chiqqan

Muxbirimiz shöhret hoshur
2019-07-05
Élxet
Pikir
Share
Print
Téz sürette köpiyiwatqan "Yépiq terbiyelesh lagéri" yeni xitayning jaza lagéridin birining körünüshi. 2018-Yili 3-dékabir, atush.
Téz sürette köpiyiwatqan "Yépiq terbiyelesh lagéri" yeni xitayning jaza lagéridin birining körünüshi. 2018-Yili 3-dékabir, atush.
AP

Qeshqer yéngisheherlik muhajirlardin biri bügün radiyomizgha mektup yollap, yéngisheher partiye mektipining qoghdash xadimi alimjan emetning ötken yilning otturiliri lagérgha ekétilip, 40 kündin kéyin a'ilisige jesiti bérilgenlikini xewer qildi. Muxbirimizning qeshqer yéngisheherge qarita élip barghan téléfon ziyaretliri dawamida alaqidar xadimlar bu uchurning toghriliqini delillidi. Alimjan emetning xizmet ornida yoshurunche namaz oqughanliqi yeni isharet namizi oqughanliqi üchün lagérgha ekétilgenliki ilgiri sürülmekte.

Hörmetlik radi'o anglighuchilar, bu heqte radiyomizgha kelgen mektupta, 22 yashliq alimjan emetning yéngisheher nahiyesining ermudun yézisigha nopusluq ikenliki, yéngisher nahiyelik partiye mektepte qoghdash xadimi bolup ishleshtin awwal bir mehel ermudun qerz kopiratipida ishligenliki we bu yerdiki waqtida namaz oquydighanliqi bayqilip qélip ishtin heydelgenliki ilgiri sürülgen. Ermudun yéziliq qerz kopiratipidiki qoghdash xadimliri, bu idaridin lagérgha ekétilgen we lagérda ölgenler barliqini inkar qilghan bolsimu, emma bu orunda burun alimjan isimlik bireylenning ishligenliki we ishtin heydelgenlikini ashkarilidi. Yéngisheher nahiyesidiki bir ayallar mudiri, nahiyelik partiye mektepning qoghdash xadimi 22 yashliq alimjan emetning lagérda ölgenlikini delillidi. Uning déyishiche, alimjan emet ötken yilning otturiliri lagérgha ekétilip 40 kündin kéyin a'ilisige jesiti bérilgen. Méyit yerlikke qoyulush dawamida, mezkur a'ile saqchilar teripidin nazaret astigha élin'ghan.

Alimjan emetning lagérda ölgenliki heqqide radiyomizgha kelgen uchurda, uning eslide bir oqutquchi a'iliside chong bolghanliqi, ottura mektepni püttürüp aliy mektepke ötelmigendin kéyin rohiy jehettin chüshkünleshken alimjanning diniy kitablarni oqush we tebligh anglash arqiliq, rohiy jehettin tiklen'genliki qeyt qilin'ghan. Mezkur ayallar mudiri alimjanning qembernisa isimlik oqutquchi hammisi barliqini bayan qildi؛ emma uning tutulush sewebi heqqide melumat bérelmidi. Mektupta, alimjan emetning hidayet yoligha mangghanliqi seweblik qerz kopiratipidiki ishidin ayrilghanliqi bayan qilinish bilen birlikte, bir yildin buyan xizmet qiliwatqan nahiyelik partiye mektep qoghdash bölümidimu, yoshurun yeni isharet namizi oqughanliqi saqchilargha doklat qilinip lagérgha ekétilgenliki yézilghan. Yéngisheher nahiyelik partiye mektipi, bu heqtiki so'allirimizgha jawab bérishni ret qildi. Mektupta yene alimjan emetning soraq jeryanida, özining isharet namizi oqughanliqini inkar qilghanliqi we bu sewebtin qéyin-qistaqqa élin'ghanliqi we uning qéyin-qistaqtin ölgenliki yézilghan. Mezkur ayallar mudirimu, alimjanning qéyin-qistaqqa élinish ehwalidin xewersizlikini éytti؛ emma alimjanning lagérgha ekétilishtin burun salametlikide mesile yoqluqi we saghlam biri ikenlikini tilgha aldi.

Ilgiri ziyaritimizni qobul qilghan bir lagér saqchisi lagérda isharet namizi oqushning alahide éghir ehwal dep qarilidighanliqi we bu xil ehwal sadir qilghanlarning dölet amanliq saqchilirigha yeni gobawgha tapshurulidighanliqini ashkarilighan idi.

Yuqirida isharet namizi oqughanliqi üchün lagérgha ekétilgen 22 yashliq alimjan emetning 40 künde lagérdin jesiti chiqqanliqi heqqide anglitish berduq.

Toluq bet